3
Yesuusay Museme afanako
1 Wontoy fedituke xheydese hayla maaqe nuundo nayshito! "Ha esako nu aadexe" hidi nu hineesuse anxuttasaara kahinituse afana adiyara maaqe Yesuusa maxuwayte. 2 Musey Wontoy indo hanta uddi hantisine muxhuraxe maaqichonike yeydiwo Yesuusay biya maagessa Wontose muxhuraxuko e maaqicha. 3 Zawa keexhesi ye zawame gardese kuxa e keengenike Yesuusani Museme gardese kuxay esuse bishesha maaddhi bentiko e yese. 4 Zawiti be bidzi bidzina bemba keexhesako u keenge. E uddina meddhasimay Wontoko.
5 Museni buro gara zeerutte abakose bisha maaqese Wontoy indo hanta uddi hantisine hade fedase hante hantaxuke muxhuraxuko e maaqicha. 6 Kristosamay Wonto zawa axi gara muxhuraxe e maaddhosi hade yeleke maaddhiko. E zawa axitini numbako. Ye esa nu maaqesini nu naasse zeeriyara nu cee'utte gobbowara minsi nu aytakoko.
Olo Isra'eelaxituke maaqe e worgusuwa gisha
7 Ye e gisha Ayaana Geeshi ohisine
"Hanzo Wontoy zeerusune siisine
8 hinadiyaxhiti Wonto saha melaaka be huulusso woggaa esuse woosutte dheebena u matonike hinuni onta beysofita.
9 Yaha tamba naadhi beedi u huulusso. Ta hantosani uddi oyddi tammi bera aallo u beedo.
10 Ye e gisha ye beraa yecha axiti gara huulli 'U muxhuroy uddi woggako e hale, ta ogeni erutto baasso' yeydiko ta hido.
11 Assini 'Ta inge kaxe ekkuso godowa fetto geluttuwasso' yeydiko huulli ta caadho" yeydi e hido.
12 Nuundo nayshito! Hinukaafa ooneni en'a maaqe Wonto garafa e zaroronike mahe iitaara aadexuwasara maaqe muxhuroy yesuwannike bemba kakkuwaye. 13 Fetto hinukaafay cubbona qaarusutti Wonto gara onta be beyseeme "Hanzo" yeydi hiyutte wontay yese aallo uddi wonte wola maxusisine wola minxuwayte.
14 Ye esini acha nu aadessoniyaka nu keengicho miimete aallicira makko modhussi nu aytako Kristosaara wolkoko bidzo maaddhi nu yese. 15 Yeydiwo fissharowa "Hanzo Wontoy zeerusune siisine woosutte dheebena u matonike hinunini Wonto gara onta beysofita!" yeydiko e zeerdese.
16 Haaya mee, ye e otosa siidi woosutte inxhadhaasiti ooniyaxhituni u maaqicha? Ye usini Musey uso durti Gibxhefa kessechooshita uddi maaquttuwaye? 17 oyddi tammi bera aallo Wonto huulusisine yechashiti ooniyaxhituni u maaqicha? Cubbo u hantine u ahay saha mela undi attosita maaquttuwaye? 18 Assi "Ta inge kaxe ekkuso godowa geluwaytako" yeydi e caadhoositi ooniyaxhituni u maaqicha? Ye esuse woosutte inxhadhaasitawo maaquttuwaye? 19 Yoonase, ye kaxe ekkuso godowa esuna gele u dheeddosi Wonto aadexe dheebiyafa dendasuna e maaqenikeko nu beene.