2
Muxhuro e gara gade e worguse zeerita
1 Ye e gisha nu siidese zeere garafa halli e ogiyafa nu kesseeme orjena muxhuro ye zeere gara gadeko numba e worguse. 2 Afaase woosaxi badena ohutta katoy artuwasa maaddhiko e yese. Ye katoy otonike yesso baasitusaara esuse woosutto baasitusaara ususe bishe yaa'ay u gara yaa'uttiko yese. 3 Hinne ha orje maaqe loolo oge nu belxheydo geede waydini "Yaa'a garafa attoko nu atte" hidi nu maxe? Ha loolo gisha Laaxuko beese burussi ota. Ye esa siidasitini be siidonike nuuse aade e maaqenike addussiko u yese. 4 Wontoy loolo gisha ohe woossoy aade maaqenike beese ye ususi gara kossi beysiko e yese. E beysosini be osa beyse be bishana bishana yese micushe abakitunaara du'use abakitunaarako. Yeydiwo Wontoy be maxoke aadexeesituse Ayaana Geeshi badena ingo ususe ingenako.
Yesuusay axe loolusese axe maaddho
5 E gisha zeeriya nu yese buro gara yoone saha Wontoy afaase woosaxi adeto oomo mato baasso. 6 Hayla Fissharowa bidzi godowa
"Esa ne maxoronike esi axi am? Esa ne kaforonike axi am?
7 Oddhe woggase afaase woosaxitume ne ullaysso. Malla kuxa fuulaara galataaray esuse maaqoronike ne mato. [Ne kuchena ne hantosi gara esa ne maagesso.]
8 Uddi abako gara esuse adeto ne indo" yeydiko e hine.
Uddi abako gara esuse adeto ingisine e adeto oomo e mato baane atta basi bidzini baasso. Yeydi e maaddhakoni hatte uddi abakoy e adeto oomo yesune beya baanxhiko. 9 Hattema afaase woosaxitume oddhe woggaaka yekke ulla hidecha Yesuusay be hay'oronike biya mata maddha e gello gisha malla kuxa fuulaara galataaray esuse maaddhonike beyako nu yese. Esini Wontoy axuse keenge maxo modhetiyafa densi ni gisha uddi haydhiko e yese. 10 Uddi abako meddhasaara kiiddhesaara maaqe Wontoy laga nayshi be kuxa fuula shahaxe u maaqoronike hissine uso loolowaka durkesa maaqe Yesuusa maddhaa gelena facete keenguwasa e maaqoronike e mato. Ye esini worgusesako e maaqicha.
11 Axe haylonxe Yesuusaara haylonge axaaray bidzi ade nayshe u maaqe gisha uso "Nuundo nayshe" yeydi hiyey Yesuusa borsusuwasso.
12 "Ne gisha indo nayshukoko addaa ta ohe. U bhikkilo giddaaka zingalena nemba ta galate" yeydiko e hido.
13 Yeydiwo
"Tani Wontoko ta gobbe" hidi assi e hido.
Fede godoni
"Hay, taara taase Wontoy indo nayshaaray yesako nu yese" hidiko e hido.
14 Wonto nayshiti axe maaqenike Yesuusani haybo gara adeto keengicha Humbaye be haybona baysese usuke axe e maaddho. 15 Yeydiwo haybo jhashena be yeso makko maaketowa yechashita wozesuko.
16 Ye esini Yesuusay wordosi afaase woosaxita marese e maaddho baane Abrahaame fira fiixha marese wordiko. 17 Ye e gisha uddi ogena indo nayshe bishey esuse worgusesa maaddhiko e bento. Ye ogena uddi axi cubbo ooxese Wontose hantisine muxhuraxaara higilesaara maaqe kahinituse afana ade e maaddho 18 Ye esini beese maddhaa be gelloniya naa'utti be beyuttecho gisha naa'owa gele axita maresuko e danda'e.