Yayqoobey Anso Woosso
Do'o
Ha Yayqoobe woosso diizosi Yesuusayndo na'i Yayqoobe maaddho badi dhaguwasso hidiko e maxutte. Ha woossoy 49 Maaro beraako e diizutto hidiko e hiyutte. Isxhifanoose haybowafa dendasuna goodutti fede wude axiti giddaa budutti yecha Wonto axitusuko e anxutto. "Tamma lam'i omma" hidi hiyoy "Ayhudaxiti" hidi hiyoko. Yeydi eysune uddi Ayhudaxituse e maaddho baanne u giddaafa aadexeesituse e maaqeninkeko e erutte.
E diizuttosi Wonto zaway haga eedhosi geediya e maaqenikeko e maxutte. Haliya Galatiya woossoy ha woossome buro diizuttesso baaka burona diizuttasi ha woossoko.
Ha woossowaka eruttesaara buronasaaray aadexo keengesi be aadexo hantana beyseko e worguse yeydi hinesako. Ye esini awshay iita maaqesa addusesaara aadena aadexo gisha shati erusesaarako. Ye maxo kiidhesuko be bishana bishana yese maxo uqqussi e mure. Ye usini afaseni maaqqe sahase Wontoy indo gaxi gisha, keddaydese axi gishaara ullaydese axi gishaara, jheete gishaara wodunte gishaara yeydiwo naa'utti beeyuttey modhe e maaqe gishako.
Yeydiwo dhiidha gisha, modhete hanta gisha, bidzi urxhumiyafa iitaara modhiyara maaqe zeerey kese esa e worgusuwasaara yeydiwo hargaxuse Wonto shi'e gishaarako e eruse.
Ha fissharoy shahuttesi ichichi godoko:
1. 1:1 Burona sawo
2. 1:2-18 Aadexo gidda yese maddhaara naa'utti beeyuttiyara
3. 1:19 - 3:18 Be aadexo hantana beyse
4. 4:1 - 5:6 Wontose bemba inge gishaara wodumiti kashuttosaara
5. 5:7-20 Danda'o gishaara hargaxuse shi'e gishaara