Anxutta Phawlosey Teselonqaxituse Anso Bidzunxo Woosso
1
Burona sawo
1 Phawlosekofa, Sillaasekofaara, Xhimootoosekofaara.
Ade maaqe Wontowara Laaxi Yesuusi Kristosaara bidzo maaddhi yese Teselonqe katamaaka yese Wonto zawa axituse ha woosso nu anxe.
Wontoy axuse keenge modhe maxowara modhetiyaray hinuse maaquwaye.
Teselonqaxiti aadexowara u yesowara
2 Wonto nu shi'eniya hinumba maxisine hi uddi gisha uddi woggaako Wonto nu galate. 3 Ye esini hi aadexowafa densi hi hante hantaseni, hi eehaafa benta hi gafaseni nu Laaxi Yesuusi Kristosase hi keenge gobboy waydese miimo e maaqesani nuuse adiyara Wontowara maaqesi buroko uddhi burse baaka hinumba nu maxe.
4 Wontoy eehe nuundo nayshito! Wontoy hinumba xhardesenike erako nu ere. 5 Modhe odo hinuse nu otosi Ayaana Geeshi osanaara aadewo e maaqenike modhussi ohenaara baaka nuunana goshewo maaquwasso. Hi da'aa nu yecho woggaa hinume hissine waanidi nu yechonike erako hi ere. 6 Hi gara laga maddhay ellakoni Wonto kato Ayaana Geeshi indo magganako hi etto. Ye esuna nuura Laaxaara bisshiko hi yese. 7 Ye ogena Maqadoone wudiyara Akkaya wudiyara yese aadexeesiti uddi hinumba beedi hinuke u yesoronikeko e maaddho.
8 Wonto kato hi otine Maqadoone wudiyakaara Akkaya wudiyakaara sintewoni e maaddho baane uddi godowaka Wontokofa maaddhese hi aadexoy odusuttiyako e yese. Ye esa zeere numba worgusuwasso. 9 Numba waakidese mokkona hi mottosaara en'a maaqesaara aadena Wonto maaqe Wontowara kuxese Wonto maaquwa fede wontiti garafa dhaddi waydi hi maaddhonike usi beese zeerako u zeere. 10 Yeydiwo Wontoy haybowafa densine afaafa yoone e yele waydi kafiya hi yesenikeko zeeriyaka u yese. Esini yoone huulaafa numba maare Yesuusako.