4
Yesuusaara bidzi Samaraxhiyara
1 Ye woggaaka Farasaxiti Yesuusay Yohaniseme garsi be gara axe mahiya e yesenikiyara e xhamaqenikiyara u siido. 2 Maaquwaye baaka e erusichoshiti xhamaqichosha baaka esi beese xhamaquwadiko yecha. 3 Yesuusani ye esa Farasaxiti siidosa be erdo geede Yuuda wude dhaddi sekke Galila hamese e dendo.
4 Galila aange ogey Samariya wudiyana garxesa e maaqicho gisha yeyna garey worgusesa e maaddho. 5 Hinne Sikaare sunge Samariya katamaka e yoodo. Ye katamay Yayqoobey be na'i Yoosefese indecho sahase e da'aako e maaqicha. 6 Yahani Yayqoobey bootti waaxe essaafa shonqicho e hoboloy yecha. Yesuusay oge be yoodo gisha gatti yaha e utto. Yenniyani sahay wontaafa izzuppi saate ellesa e maaqicha. 7 Hinne bidzi ye wude indoy waaxe shonqese yaha i yoodo. Yesuusani iso "Waaxe taase inguwa ta ussheeshe" hidi e hido. 8 Ye wogani e erusichoshiti kaxa woomese katamaaka dhaddi u handecha.
9 Ayhudaxiti Samaraxitaara uddi ogena wola muhuwasa u maaqicho gisha ye indoni Yesuusako "Neni Ayhudaxe maaqisine waydiwu Samaraxhiyo maaqe taakofa waaxe usheshe ne ga'e?" hidi i hido.
10 Yesuusay "Wontoy aba bisha ingo neese ingesaara 'Waaxe taa usshuwa!' hidi hinesi oone maaqesaara erdako esa ne ga'esako yecha, hidakoko esi neese koolona yeso inge waaxe ingaane" hidi e hido.
11 Isini "Laaxo, waaxe esuna ne shonqe miijhe hay keenguwannako, waaxini yedena zarako hobolowa yese. Hinne yeso inge waaxe ayafani ne degexe? 12 Ha waaxi hobolo nuuse inda nuu yella ade Yayqoobeme neni garuwa gare? Esini e nayshini e keemoni ha hobolowafa waaxe usshiko yecha" hidi i hido. 13 Yesuusani "Ha waassaafa usheshi be uddina sekkeko waaxe e sazze. 14 Tani inge waaxe usheshimay koolo makkina sazzuwasso. Ye esini esukofa koolo makkina yesoy fol'e tultoko e maaqe" yeydi e hido.
15 Ye indoni "Laaxo, sekke waaxe ta sazzeesume hayani shonqiya ta yooneesume ha ne ohe waaxe odde taase inguwa!" yeydi i hido.
16 Yesuusani "Handi neeso ade etti yoowwa!" hidi e hido.
17 Isini "Tani ade keenguwasso" hidi i mato. Yenniyani Yesuusay " 'Tani ade keenguwasso' hidi ne hidosi aadeko. 18 Ichichi adiyaxhuko ne gellecha, hatte neera wolko yesesi eruttese ne ade maaquwasso. Ye e gisha aadeko ne zeerdo" hidi e hido.
19 Ye indoni "Laaxo, yoonase kaayaxe ne maaqenike hattese erdusso. 20 Numba yella nuwadiyaxhiti ha bakka garako u dissicha. Hinuni Ayhudaxitimay 'Axiti dissorosa e worgusesi Yerusaleemeko' hidiko hiine" yeydi i hido.
21 Yesuusani "Nuunde! Ha neese ta zeere zeere 'Aadeko' hidi ekkuwa! Ha bakka gara oo'oyne Yerusaleeme ade maaqe Wontose dissese hi maddhunguwa wonteko yoonesa. 22 Hinuni hi eruwasusuko hi disse, nunimay looloy Ayhuda badefa e yoone gisha nu ere Wontosuko nu disse. 23 Maaqe baaka 'Aadenawo dissoko u disse' yeydi hiyutteesiti ade maaqe Wontose Ayaanana durkuttiyara aadenaara u disse woggako yoonesa. Fetto hatteni yoodiko e yese. Ade maaqe Wontoni eehesi yeydi disseesitako. 24 Wontoy Ayaanako, Wontose disse worgeesiti Ayaananaara aadenaara disseko uso e worguse" yeydi e hido.
25 Ye indoni "Kristosa hidi hiyutte Mesihey yoonesa erako ta ere. Esi be yooneniyaka uddi abakoko nuuko e ohe" yeydi i hido.
26 Yesuusani "Hay niya zeerusiya yese tani ye ne ohesako" hidi e hido.
27 Yenniyani e erusichoshiti be handecho godofa u yoodo. Yesuusay ye indowara zeerusune beedi u micco. Maaquwaye baaka ooneni ye indo "Am ne worge?" hidi oo'oyne esa "Abasuna ha indowara ne zeere?" yeydi oycco baasso. 28 Ye e geede ye indoy be waaxi ota yaha datti dhaddi katamaaka handi axituko 29 "Bidzi axuko ta hanto hanta e uddina hanke mati taase zeerdasi yesa. Ye esa yoodi beewayte. Hanno esi Mesihe maaddho badi dheegguwasso" hidi i hido. 30 Axitini katamaafa kessi Yesuusako u yoodo.
31 I handoniyakani e erusichoshiti Yesuusako "Laaxo, bolto muuwa!" hidi u hido. 32 Esini ususe "Hinuni eruwasako tani muune kaxay yesa" hidi e hido. 33 Ha e gisha e erusichoshiti "E muune kaxaaneso hanno axi esuse oodi indo?" hidi wolko u hido.
34 Yesuusani "Ta miyoy tamba ansasi maxo hantiyara e hanta alsiyarako. 35 Hinuni 'Kaxa bhikkilese oyddi agunnako yoona attesa' yeydi maaquwaye hiinesi? Tanimay hinuse hinesi kaxa naddhi beewayte. Melli bhikkiluttese elliko e yese. 36 Kaxa aceshi ye be aceshi wooma efako e ekke. Koolo makkina yesese danda'e aafeko e bhikkille. Ye e gisha aylesini aceshini wolko maggako u magge. 37 Ha essaafa dendasuna 'Ha esi ayle se esi ace' yeydi hiyutta zeerey aadeko. 38 Hi gatto baasa hi acoronike ta anso. Fediti hantana u gatto, hinunimay u gafa giddaa gelli hinuse hi etto" yeydi e hido.
39 Ye indoy "Ta hanto hanta uddi hanke taako e oto" hidi i hidosuna ye Samariya katamaafa laga axiti esa aadesso. 40 Usini esuko be yoodo woggaa beera e decoronike esa u shidho. Esini lam'i wonte aallo yaha usaara e feyssho. 41 E otosa siidi fede laga axiti esa aadesso. 42 Usini ye indoko "Ha e geede esa nu aadexesi neni nuuko otosunawo e maaddho baane nuni nuuse nu siido gishaara aadewo ha saha gara yese axe loolusesa e maaqenike nu erdo gishaarako" yeydi u hido.
Bidzi maaga yeley loollosa
43 Yesuusay Samariyaka lam'i wonte be feyssho geede yahafa dhaddi Galila e hando. 44 Beesewo "Kaayaxi be wudiya kuxuttuwasso" yeydi e zeerdecha. 45 Galila e handoniyaka axiti Garo Massalase Yerusaleeme be handecho wogga yaha e hanto laga hanta uddi be beedecho gisha esa modhussi u motto.
46 Ye e geede ye wudiya yese Qaana katamaaka assi e hando. Ye katamani buro waaxe weyne daana e matecho katamaako e maaqicha. Yenniyakani Qifirnahoome katamaaka e yeley hardese bidzi kaati maagay e yecha. 47 Ye maagani Yesuusay Yuuda wudefa Galila e yoodosa siidi esuko handi "Taara Qifirnahoome aadhuwa! Ta yeleko yaha hardi lubbosewo yesa. Odde taase loolusena!" hidi e shidho.
48 Yesuusani "Hinuni micushe abakowara du'use abakowara hi beedo baasa fetto 'Loolusako e looluse' hidi taa gobbuwaytuwa?" hidi e hido. 49 Ye maagani "Laaxo, odde, ta yeley haydho baane ukkenawo yedena aadhuwa" hidi e hido. 50 Yesuusani "Dhaddi ne zawa hanguwa! Ne yeley loolliko yese hay'uwasso" hidi e hido. Ye maagani "Yesuusay otosa aadewoko" hidi hissine be zawa dhaddi e hando.
51 Ogiya hamiya e yesune e maaliti esaara ogiya muti "Ne yeley loolliko yese" yeydi u oto. 52 Ye maagani ye be yeley loollo saate e oycco. Usini "Zine laappi saatenako michay toydine e loollo" hidi u hido. 53 Ye yeliyadeni Yesuusay "Ne yeley loolliko yese hay'uwasso" hidi hidecho saate e maaqichonike e erdo. Ye wontiyafa ayti esaara e zawa axitaaray uddi Yesuusa aadesso. 54 Yuudafa Galila yoodi e hantusune ha esi lakkunxo micushe hantako.