21
Bidzi indoy Wontose indosa
Mrq 12:41-44
1 Yesuusay be googe beechine wodumiti be ingo oodi miijhey essa dafutticho saaxhiniya ollusune e beedo. 2 Bidzi i adey baadese indo jhi'oy lam'i saante ellesa lam'i laakaafa hantuttese miijhe oodi i ollusune e beedo. 3 Yesuusani "Aadewoko hinuse ta ohe, ha i adey baadese jhi'o indoy ha saaxhiniya miijhe olliya yese uddiyademe garsiko i indo. 4 Ha esini fedeesiti uddina u indosi be keengicho woduntiyafako. Isimay jhi'o maaqisine beese shato badi be keengichosha uddiko i indo" yeydi e hido.
Wonto Hayla Zaway wodde gisha
Mat 24:1-2; Mrq 13:1-2
5 Bidzi bidzi axiti "Ha Wonto Hayla Zaway waydi e moddhesi, aafese moddhese shuchunaara Wontose indo ingonaarako moddhi e keexhutto" hidi zeeriya u yesune 6 Yesuusani "Ha hi beene shuchi shuchi gara bidzini yaha attuwasso. Be uddina e wodde woggako yesa" yeydi e hido. 7 Usini "Laaxo, hinne aydewa e maaqe? Ha esi maaqese hisune esuna nu ere yeragoy amuna?" hidi u oycco.
Yesuusay yoonesume buro maaqesa
Mat 24:3-14; Mrq 13:3-13
8 Yesuusani "Haluxuttekofa hinumba naddhi kakkuwayte! Lagiti 'Tambako Kristosay, hay woggay uddhosso' hidi hissine ta sunxuna yootako u yoone, usaara handofita. 9 Toora gishaara koysi gishaara hi siineniya du'eydofita! Ha esi burona maaqese fettona attuwasso. Maaqe baaka aalliciray ukke maaquwasso" hidi e hido.
10 Sekke assi Yesuusay "Bidzi wude axiti fede wude axiti gara dende, bidzi wude kaatini yeydiwo fede wude kaati gara dende. 11 Iitana ha sahay e en'e, seya haya naayeni laga axe alse hargeni e maaqe. Afa gara jhashushe abakitaara micushe yeragowaray e bente. 12 Haanxhi uddi maaqeesume e buro axiti hinumba u ayke, hi gara u cange, yaa'ase Bhikkilo Zawaakaara tufe zawaakaara garsi u inge. Taameydi hissine kaataxhe buruwakaara aheesiti buruwakaara u aange. 13 Ta gisha hi odusoronike ogey ye esa e maaqe. 14 Ha e gisha 'Ta qino kessese am ta oho?' yeydi hissine hi hoodduwannike burussi hi muxhurowaka gaduwayte. 15 Ye esini hi iilaxi uddi hinumba iicheshaara hinunaara bersesaara u danda'uwa zeeriyara eraarako hinuse ta inge. 16 Hinumba fetto yella geritini hinindo na'axhitini, hi iginitini, esaara hi feyshichoshitini, hinumba aassiwoko u inge. Hinukaafa bidzo bidzoni u wodhe. 17 Ta gisha axi uddina hinumba iitana u inxha'e. 18 Yeydi e maaddhakoni hi qino ufussaafa bidzini bayese danda'uwasso. 19 Danda'ona ee'enako hi lubbo hi maare" yeydi e hido.
Yerusaleeme gara yoone maddha
Mat 24:15-21; Mrq 13:14-19
20 Sekkeni Yesuusay "Yerusaleeme iilaxiti gooddi yesune hi beeneniyaka ye katamay bayese e uddhosa eruwayte. 21 Ye woggaaka Yuuda wudiya yeseesiti bakkitaa ba'uttuwaye, katamaaka yeseesitini dhaddi kesuttuwaye! Wude yeseesitini hanke katamaa geluttoppe. 22 Yerusaleeme gisha diizuttese kaayoy uddina ittoronike ye woggay keddaydese gano kese woggako. 23 Ye woggaaka gawwaara yese indowaxhaara yele dhamusiya yese indowaxhaara uso baduffu! Ha saha gara iita maddhako yoonesa, Wonto huulay ha axiti garako e maaqe. 24 Usaafani satatana aale, feditani Ayhuda maaquwasiti seya haya be wudiya wudiya didhi etti u hange. Di'utti u hando beriti aaloro makko Ayhuda maaquwasiti Yerusaleeme be wordonkeysi u jheeche" yeydi e hido.
Kristosay lakko yoone gisha
Mat 24:29-31; Mrq 13:24-27
25 Sekkeni Yesuusay "Qoossi gara agunna gara xhoolinte gara du'use yeragiti u bente. Ha saha garani be wude wude yese axiti uddina bagade oosshaara jhiraho katowara siidi du'eydi u maddhunge. 26 Afaa yeseesiti osay en'e gisha axiti ha saha gara yooneesita kafe jhasshi du'eyena u mele. 27 Ye e geede tani axi yeley osanaara keddaydese kuxa fuulanaara dhumaanna ta yoosune u beene. 28 Haanxhi haga maaqe e aykusune hi wozutte woggay yoodi uddho gisha miindi eedhi wokke keddaydi beewayte" yeydi e hido.
Belese sunge mixe beedi maaqesa ere gisha
Mat 24:32-35; Mrq 13:28-31
29 Sekkeni Yesuusay ususe zeerisine "Belese sunge mixaara fede mixitaara uddi gaxxhi beewayte. 30 E washey haga wokke cultusune hi beedo geede bargoy yoodi uddhosako hi ere. 31 Ye esuke haanxhi uddi maaqusune hi beeneniyaka Wonto kaatetoy yoowese uddhesenike eruwayte. 32 Aadewoko hinuse ta ohe. Ha yeluttey gareesume buro haanxhi uddiko e aale. 33 Afani sahani baattako u baane, ta katomay miindi koolo makkinako e yese" yeydi e hido.
Yesuusa yoowe miindi kafe gisha
34 Sekkeni Yesuusay "Hinuni gawwetenaara usshi goojhenaara hinuse hi yesose maddhumenaara hi maxo hi budeeme hinumba naddhi kakkuwayte. Ha esini yeydi maaqe e dheeba'ayko ye wontay dedhawoko hade harbhake e unge. 35 Ye wontani ha saha gara uddi yese axuse atto badiko e yoone. 36 Yebo, ha yoowese hine haanxhikofa dhaddi tulxhi taa axi yele buro ee'ese osa hi degexoronike Wonto shi'isine uddi wogga oseydi hinumba kakkuwayte" yeydi e hido. 37 Yesuusay wontana wontana Wonto Hayla Zawaa e erusicha. Qama qama katamaafa kessi Zayte Bakka gara e aqicha. 38 Axiti be uddina e ohesa siyese ketiya sho'e dendi esuko Wonto Hayla Zawaa u hangicha.