13
Cubbowafa maaqe gisha
1 Ye woggaaka bidzi bidzi axiti Yesuusako yoodi "Galila wude axiti Wontose kaasha u kaashichoyneko Philaxhosey uso woddhi also. U suuxini u kaashaara wolko worqutto" hidi u odusso. 2 Yesuusani "Hine ye axiti ye e gede baysoy u gara ellosi fede Galila wude axitume uddi gardi cubbache u maaqichoshuwa hinumba e bishe? 3 Fetto maaquwasso hidiko tayne. Hi cubbo dhaddi maaqe hi dheeba'ayko hinunini hade usukeko hi maaqe. 4 Siloome shuchi zaway u gara woddi also tamma hazzuppi axituse am hi maxe? Ye tamma hazzuppi axiti Yerusaleeme yese axitume uddi gardese cubbachituwa hinumba u bishe? 5 Fetto garuttuwasso hidiko tayne. Hi cubbo dhaddi maaqe hi dheeba'ayko hinuni hade usukeko hi baane" yeydi e hido.
Belese sunge mixi mamako
6 Ye e geede Yesuusay bidzi mamako e mamatto. Ye esini "Bidzi axi be gatiya tottecho bidzi mixi belese sungesi e yecha. Ye mixi garafa aafe maxhese handi bidzoni e dheeddo. 7 Hinne ye e gisha ye gate hanticha ade 'Ha mixi garafa e aafe maxhese haydzi bera aallo maaddhi maaddhiko ta yoodo. Bidzi aafeni hatte aallo e garafa degesso baasso. Yoonase esa bursi ooxuwa, abasuna saha ayti godo e tuce?' hidi e hido. 8 Ye godo hantichashini 'Laaxo, mee, ha berase dhagguwa! Modhussi madhetti igisa e baala gussi ta beyyeese. 9 Yoone berase aafe e kaxho'ayko modheko, kaxhe e dheeba'aykoma buroko e bure' hidi e mato" hidi e hido.
Sanbata wonte loolla bidzi indo
10 Ayhuda sanbata wonte Yesuusay bidzi Bhikkilo Zawaa erusiya e yecha. 11 Hinne yahani tamma hazzuppi bera makko xhoozi iso ayti doomusecho indoy i yecha. I zahey doondine gizzi hante eruwadi i yecha. 12 Yesuusani iso be beedo wogga xheydi "Nuunde, ne hargey nemba dattosso" hidi e hido. 13 Kuchena iso e dollinne yenniyawo gizzi eedhi Wonto kedda kedda i hisso.
14 Ayhuda Bhikkilo Zawase afana maagay sanbata wonte e loolusso gisha huulli yaha yecha axituse "Bidzi saminte giddaa hanta essa hantuso izzuppi wontay yesako yese, yeenxhi wonta aallo yoodi looluwayte! Sanbata wonte loole worgusuwasso" hidi e hido.
15 Laaxi Yesuusani esuse "Hinuno awshachito! Hi bidzi bidzikaafa sanbata wonte hi maydo sollaafa birshi harre zawafa kessi waaxe e ushorosa aanguwasi ooneni yesa? 16 Abrahaame nayshaafa maaqe ha indoy tamma hazzuppi bera aallo Humbayey ayti tutti maddhunxusune dooddiko i yecha. Hinne esuna tufutti be yecho hargiyafa sanbata wonte birchutte iso worgusuwaye?" yeydi e hido. 17 Yeydi e zeerdine ye iilichaashiti uddina u borso. Axitimay Yesuusay hanto micushe hanta uddi beedi u maddo.
Laaqi mor'e mamako
Mat 13:31-32; Mrq 4:30-32
18 Yesuusay assi "Wonto kaatetey am e bishe? Fetto aba garawa yeraddi ta oho? 19 Bidzi axi be gatiya baallo bidzi senafice sunge mixi aafe laaqiyoko e bishe. Ye esini dicci mixi malla e maaddho. Kafitini e hange gara keexxhi utto" hidi e hido.
Iraacite mamako
Mat 13:33
20 Yesuusani sekke "Wonto kaatete aba garawa yeraddi ta oho? 21 Bidzi indoy haydzi jhal'a dhiilaaka iraacite etti esaara i dhon'o. Hinne aalliciraaka ye dhiilay be kumena dendosako e bishe" yeydi e hido.
Xhuumo suma gisha
Mat 7:13-14,21-23
22 Ye e geede Yesuusay Yerusaleeme e aadho. Hangisineni katama giddaannani katamame wude yese axiti giddaannani erusisine e hangicha. 23 Bidzi adey "Laaxo, Wontoy looluse axi lagaani oddhena?" hidi e oycco. Yesuusani esuse 24 "Xhuumo sumaanna gelese karduttuwayte! Hinuse ohoko ta ohe, ye xhuumo sumaanna gelese worgeesiti lagako, maaqe baa gelese danda'uttuwasso. 25 Ye zawaadey dendi gasa e ayto geede hinuni sumaaka eedhi gasa dolisine 'Laaxo, odde, gasa nuuse do'uwa!' yeydi hiye hi ayke. Esini 'Ayafa hi yoodosa eruwasso' hidi e mahe. 26 Yenniya hinuni 'Ha nunichi neera wolko muuta ussho nu giddaani axe erusa ne hichoshi?' yeydi hiine. 27 Hatteni esi 'Ayafa hi yoodosa tani eruwasso. Hinuno iita hanteesito, hayafa ukke haruwayte' yeydiko e hine. 28 Hinunimay wudena hi atte. Abrahaameni, Yissaaqeni, Yayqoobeni kaayaxita uddina Wonto kaatetiya hi beeneniyaka yenniyani hi yeeke, gaggoni hi qiice. 29 Laga axiti oshichi badefa, hadursi badefa, afa badefa, oomo badefa yoodi Wonto kaatetowa tato gara u utte. 30 Aadewoko geede yeseesitaafa bidzi bidziti burose u maaqe, buro yeseesitaafa bidzi bidziti geedese u maaqe" yeydi e mato.
Yerusaleemey murutto
Mat 23:37-39
31 Yenniyawo bidzi bidzi Farasaxiti Yesuusako yoodi "Herodisey nemba wodhese worge gisha hayafa dhaddi hanguwa!" hidi uydo. 32 Yesuusani "Ye fayanka geedalako handi ' "Hanzowara gutaarako xhooze ta goode, hargaxe ta looluse, ta hanta haysso wonteko ta alse" hidi e hido' hidi esuko ohuwayte. 33 Maaquwaye baaka kaayaxe hay'e e worgusesi Yerusaleeme baaka are e worgusuwa gisha hanzo guta hinto oge gara yeseko taa e worguse. 34 Yerusaleeme, Yerusaleeme! Kaayaxita wodheyo! Neeka anxuttechaashitani shuchuna iceyo! Lukkali be fange oomo be nayshita bhikkilenike aanxhi woggani ne axita bhikkilese ta wordo. Hinunimay 'Eehuwanxhiko' yeydi hiido. 35 Ha e gisha hi gatey kayako e atte. Hinuse ohoko ta ohe, hinuni 'Wonto sunxuna yoonesi suuzuttesesako' yeydi hi hiyoro makko koolo taa bewaytako" yeydi e hido.