8
Oyddi kuma axe muusse
Mat 15:32-39
1 Ye woggaaka sekke laga axiti bhikkilutto. U muunesi badi yecho gisha Yesuusay be erusichoshita xheydi usuko 2 "Ha axiti haydzi wonte aallo taara u deceshe gishaara u muunesi haya baa gishaara higilsako taa u higilse. 3 Naaydi u yesune 'Dhaddi hi zawa hanguwayte' yeydi tayta'ayko ogiyako gatti u unge. Bidzi bidzi geriti fetto zarafa yoodasiti handi aadhuttuwasso" yeydi e hido. 4 E erusichoshiti "Hine ha saha melaaka haanxhi axe uddina elle boora degexese oonena danda'esa?" hidi uydo. 5 Yesuusay "Aanxhi boorawa hi keenge?" hidi e oycco. Usini "Laappi bacheko yesa" yeydi u hido. 6 Esini axituko "Sahaaka uttuwayte!" hidi e hido. Ye laappi bache boorani etti Wonto e galatto. Meyssi gussi axituse u ingoronike be erusichoshituko e indo. Usini axiti buro garso.
7 Ususe assi giddha gulxhiti oddhey yechoyne etti Wonto galatti axituse u ingoronike be erusichoshituko e oto. 8 Axiti be uddina muudi missho. Atta baxe bhikkilli laappi kofa u denso. 9 Ye muudaasiti taafoy oyddi kuma ellesako u maaqicha. Ye e geede axiti be zawa hamoronike e mato.
Micushe hanta gisha uddha oyche
Mat 16:1-4
10 Be erusichoshitaara wolko zabhaaka gelli Dalmanuta hidi hiyutte wude e hando. 11 Farasaxiti Yesuusako yoodi esaara wolko berse u ayto. Esa qaxhese wordi afa osana hantuttese ato maaqesa bidzi micushe abako e beysorosa u oycco. 12 Yesuusay zeerey be gawwo orjena muunne "Ha bera axiti micushe abakoy ususe maaqorosa abasuwa u worge? Aadewoko hinuse ta ohe. Bidzoni micushe abakoy ha bera axituse hantuttuwasso" hidi e hido. 13 Uso yahaka datti sekke assi zabhaaka gelli bagade semfa e fotto.
Gaxhe dheebe gisha
Mat 16:5-12
14 E erusichoshiti gallase maaqe boora etti hame u botto gisha zabhaaka u yesune bidzi bache boorawoy ususe yecha. 15 Yesuusani "Farasaxiti iraacite garafaara kaati Herodise iraacite garafaara hinumba naddhi kakkuwayte!" hidi minsi e oto. 16 E erusichoshitini "Esi yeydi hiyese dandadhosi galla oowe nu bottineko" hidi sekke hanke u zeerdo. 17 Yesuusay u maxo erdi usuko " 'Yeydi e hidosi galla nu dheeddo gishako' hidi abasuna wolko hi zeere? Fetto gaxe keenguwaytu? Hinuse geluwaye? Hi muxhuro washey dhagaa maaddho? 18 Aafey yesune beewaytuwa? Washe keengisine siwwaytuwa? Waydi fetto hi gaxhwaane? 19 Mee, ichichi bache boora ichichi kuma axituse shati ta indoniya yaha atta baxe aanxhi kofani bhikkilli hi denso?" hidi e oycco. Usini "Tamma lam'i kofa kumeko" hidi uydo. 20 "Yeydiwo laappi bache boora oyddi kuma axituse ta indoniya atta baxe aanxhi kofawa hi denso?" hidi e oycco. Usini "Laappi kofako" hidi uydo. 21 Esini "Hine hatte aallo hinuse geliya baye?" hidi e hido.
Bal'ay loollosa
22 Beetesayda katamaa handi u ello. Bidzi aafe keenguwa bal'a be kuche e gara gaddi e loolusoronike axiti Yesuusako oodi u shidho. 23 Yesuusay ye bal'a kuche ayti goosshi katamaafa are e kesso. Ye axi aafiya be cuche cutti kuche e gara gaddi "Hatte abako beeta ne beene?" hidi e oycco. 24 Ye bal'ay wokke keddaydi "Eewwa, axita beyema beyako ta yese, hade mixukeko hantesa u bishe" hidi e hido. 25 Sekke assi ye bal'a aafe gara be kuche e gaddo. Yenniyawo e aafey modhussi beye gello. Uddi abako addussi e beedo. 26 Ye e geede Yesuusay "Neeso dhaddi hanguwa. [Oonekoni ne oduseeme] katamaa gellofuna!" hidi e anso.
Yesuusay oone maaqesa
Mat 16:13-20; Luq 9:18-21
27 Yesuusay be erusichoshitaara Filphoose Qesaariya yese katamittaa hangisine ogiya uso "Axiti tamba oonekoydi hine?" hidi e oycco. 28 Usini "Bidzi bidzi axiti 'Xhamaqicha Yohaniseko' hidiko u hine. Fediti assi 'Elaaseko' yeydiwo badey nemba 'Kaayaxitukaafa bidzoko' hidiko uyne" hidi u hido. 29 "Hine hinuni tamba oonekoydi hiine?" hidi e oycco. Phexhroseni "Neni Mesiheko" hidi e mato. 30 Yesuusani " 'Esako' hidi oonekoni tamba odussofita! " hidi minsi e oto.
Yesuusay be gara elle maddhase bidzunxo wogga e zeerdo
Mat 16:21-28; Luq 9:22
31 Ye e geede Yesuusay be erusichoshita erusisine "Axi yele hidi hiyuttase laga maddhaa geleko e worguse, durke cimitaara Wonto Hayla Zawa kahinituse afana maagitaara Muse woga eruseesitaaray u inxha'e, u wodhe. Maaqe baaka haysso wonte geedeko e dende" yeydi e hido. 32 Yeydi ye zeere addussi e oto. Phexhrosey Yesuusa e goshuna bade gara kessi "Yeydi ne nuunaafa kese worgusuwasso" hidi e kassho. 33 Yesuusani maaddhi be erusichoshita beedi Phexhrosese "Neno Humbaye, ta da'aafa dhaddi zaruwa! Ne maxoy Wontowara wolko maaddho badi e yesune axaara wolkoko e maaqe" hidi e kassho.
Yesuusa gisha be yeso aassi inge
Mat 10:38-39; 16:24-28; Luq 9:23-27; 14:26-27
34 Ye e geede laga axita be erusichoshitaara beeko xheydi "Taara hamese worgesi yesa'ayko bemba dhaddi be suxi mixe iddi taara yoowaye. 35 Beese be yeso kafese worgesi uddina baysako u bayse. Be yeso taamiyara ha modhe odomiyara garsi ingesimay yesoko e degexe.
36 Axi ha sahaa yese basita uddina degexa be yeso dheeba'eydako am esa e go'e? 37 Axi be yeso wozese danda'esa am e shange? 38 Wonto dhaddi fede wontoko hange cubbaxita maaqe yelutte buro taannaara ta katonaara borsesa u uddina axi yele hidi hiyuttasi biyade kuxa fuulana Wonto hayla woosaxitaara e yooworoniyaka esuna borsako e borse" hidi e hido.