3
Xhamaqicha Yohanisey erusosa
Mrq 1:1-8; Luq 3:1-18; Yoh 1:19-28
1 Ye woggaaka Xhamaqicha Yohanisey yoodi Yuuda wude yese saha melaaka ohe e ayto. 2 Ohisineni "Afa kaatetese woggay ellosso, hi cubbo dhaddi maaquwayte!" yeydi e hicha. 3 Kaayaxi Isayasey Yohanise gisha ohisine
" 'Laaxi oge naquwayte, modhussi gizusuwayte' yeydi hissine saha melaa uwwara axi kato" hidi e hidecha.
4 Yohanise maa'oy gaalo ufussaafa meddhuttesesako e maaqicha. Be elfani zalabhitena e gixhicha. E muucho kaxani booliyara ziizita degessi shidiyarako e maaqicha.
5 Ye woggani axiti Yerusaleeme katamaafa Yuuda wudiyafa Yordanose googe yese wudittaafa uddi Yohaniseko u yoocha. 6 Be cubbo u bazzicha, Yohanisey Yordanose waassaa uso e xhamaqicha. 7 Yohanisey laga Farasaxitaara Sodoqaxitaaray xhamaquttiya esuko yoosune beedi "Hinuno gappasshi nayshito! Qaaruseesitoa! 'Wontokofa yoone huulaafa kesoko nu kese' hidi waydi hi maxe? 8 Hi cubbo dhaddi hi maaddhonike esuna eruso hanta hantuwayte! 9 'Nuni Abrahaame nayshuko' hidi cee'uttofita! Hinuse ohoko ta ohe. Wontoy ha shushaafa etti Abrahaamese nayshe mahesuko e danda'e. 10 Fetto hatte mixita e xhabhowafa bursi dafese gandey naquttiko e yese. Yoonase modhe aafe kaxhuwa mixiti uddina burdiko tamaa u dafutte. 11 Hay, tani hi cubbo dhaddi hi maaddhosi esuna eruttorosako waaxuna ta xhamaqe. Ta geede yoonesimay taame gare osaxuko, e toke kobhani iddese tani elluwasso. Ayaana Geeshunaara tamanaarako hinumba e xhamaqe. 12 Esini kaxa butti falaafa e aafe esuna shahese haxhoole aytiko e yese. Aydaafa geesshi gossa li'iyako e gelse, falama bayese danda'uwa tamanako e megge" yeydi e hido.
Yesuusay xhamaquttosa
Mrq 1:9-11; Luq 3:21-22
13 Ye woggaaka Yesuusay Yohanisey xhamaqorosa Galilaafa Yordanose shoore e yoodo. 14 Yohaniseni "Ha esi maaquwasso, neni taa xhamadhakoko e bishe. Waanidi neni taako yoonne?" yeydi hissine inxha'e e ayto. 15 Yesuusani "Wontoy woossosa uddi hante e worguse gisha dhagguwa, ta otonikewo mahuwa!" hidi e hido. Yohaniseni ye zeere etti Yesuusa e xhamadho. 16 Yesuusay xhamaqutti waassaafa kessonikewo afay e do'utto. Wonto Ayaanani hade woyya bisshi hoddhi Yesuusa gara e uttusune e beedo. 17 Ye woggawo "Ta eehe ta yeley ha esako, esuna maggako ta magge" yeydi hine katoy afaafa e sinto.