1 Kuŋeet ꞉kōōkwēēt tōkōl ānkukwōrci Yēēsu Pilaato. 2 Yooto kucac ꞉picaa kuwāsāntyi neeto kumwoowu kule, “Miitē ꞉ciici kuutoonkōōyē piiko! Mwoocinii kuusērpēēn kwēyiisyēētaap musōrōōnik cēpo pātyooyiintēētaap Rooma. Sutē keey mpo yēēc kule āyikuu *kāārārookiintēēt nyēē māsākwēēk kiinkō nyēpo piikyoo.”

3 Kuteepee ꞉Pilaato Yēēsu kule, “Yikuu ꞉nyii kiinkō nyēpo Yutaayeek?” Kuwēēkyi ꞉Yēēsu kule, “Ntēē kēēmwoowu ꞉nyii nkit.”

4 Yooto, kumwooci ꞉Pilaato *pēēliikaap kōrōsēēk cēē yēēc ākoo leempeet tōkōl kule, “Ntēē māpoonto ꞉ciici lēēlis!”

5 Kupiciyiitu ꞉piiko kumwoow kule, “Miitē ꞉ciici kukwoonykwoonyē piikyoo kusiir kāānēētiisyēēnyii. Kiicacee wuliin po Kalilaaya kunyi kāāpun yawuut wuli po Yēērusālēēm.”

6 Yooto kāwokulim ꞉Pilaato yuu nyooto, kuteep kule, “Āpērē āmwoowuu kule po ciici Kalilaaya?” 7 Yooto kāwokuunkēt ꞉Pilaato kule kiipo ꞉Yēēsu Kalilaaya wuloo kiipātyooy *꞉Ērōōtē, kuukootyo neeto kuwō wulooto. Kiikiiruutooci ꞉Ērōōtē Yēērusālēēm pēsyōōsyēcaato.

8 Kiiŋarac ꞉Ērōōtē koroomun yooto kāwokukas Yēēsu āmnyēē kikiimac ꞉neeto kulōōyiit kule akas Yēēsu kwiiy ŋal cēē /ciikitēē. 9 Yooto kuteepee ꞉Ērōōtē Yēēsu tēēpuutook cēē caaŋ nteenee kiitay ꞉Yēēsu māwēēkyi. 10 Kutēē yooto tōkōl, kumii ꞉pēēliikaap kōrōsēēk cēē yēēc āk poonwookiikaap *ntarastiit kuwiiru ŋaleek kuwāsāntyinii Yēēsu. 11 Nto kaamiit, kwiici ꞉Ērōōtē ākoo riipiikyii Yēēsu ŋaleek cēpo nyiilateet ankuutaŋaany. Kiilookyi sireet nyēpo pātyooyiintēēt anku /ceekatita kuwō kaap Pilaato. 12 Kiikwiiy ꞉ŋaleecaato pēsyoonooto kucoomnyo ꞉Ērōōtē ākoo Pilaato coo kiimālumciintōōs.

13 Kukuur ꞉Pilaato pēēliikaap kōrōsēēk cēē yēēc, kāāntōōyik ākoo piiko tōkōl kukwa waanak. 14 Kumwooci piiko kule, “Kwāākwōrwoo ciici ānkāāmwoowoo kule kimiitē kukwoonykwoonyē mētēwookaap piiko. Kaateepee ꞉anii tēēpuutook ām taaymwaakweek, nteenee munāānyōōrci neeto lēēlis. 15 Munāānyōōrci mpo ꞉Ērōōtē neeto lēēlis nyēē misyinii /ceepakac. 16 Kunyoo masaapas ꞉anii neeto ankaatyaakte.”* Tāsyinii ꞉siluutookaap Kirikiik alake kērēywoontēētaap 17: Kiimācēktōōs kuutyooktooy mopuusyoontēēt akeenke yoo /kicoomē Saakweetaap Keetyaayeet. Kāsyiinē āk Mataayo 27:15; Māārkō 15:6, Yoowaana 18:38.

18 Kōōruumci ꞉piiko kule, “Waaŋte nyi ānkēētyookwēēc Parapaas!” 19 /Kikiceerat Parapaas āmnyēē kimācē kuweec kōōrēēt nto yēēc kikiipakac ciito ake.

20 Kiimācē ꞉Pilaato kule atyaakte Yēēsu, kumwooci piiko kule, “Ntēē māpoonto ꞉Yēēsu lēēlis.” 21 Kutasta keey ꞉piiko kupōl kule, “Apakac! Apakac!”

22 Kumwooci ꞉Pilaato ceekto areet nyēpo sōmōk kule, “Lēēlis nee ꞉nyēē kakwiiy ꞉ciici? Māmisyinii /ceepakac. +/Masaceepas neeto anku /ciityaakta.”

23 Kōōwuruur ꞉picaa Pilaato ām pōlātēēt nyēē wōō kumācē /ceepakac Yēēsu. Kiikwiiy ꞉picaa yuu nyooto kōt kuupēliis ꞉ŋaleekwaa. 24 Kucāmci ꞉Pilaato ŋaleekwaa cēē kimācē. 25 Kuutyaakta Parapaas ankucamta /woceepakac Yēēsu.

26 Yooto /cēēmii /cēēkwōrē Yēēsu, /cēēnyōōr ciito ake nyēē /kicēēkuurē kule Sumōōni. Kiipo ꞉ciicaa mōōŋēētaap Kurēēnē. Kiimii kuwēētii Yēērusālēēm. /Cēēkōpci /āncēēkērci kooŋ kukalapaat murtoowoontēēt ankuunaam Yēēsu. 27 Kiinaam ꞉piiko cēē caaŋ Yēēsu kumii ꞉cēēpyōōsōōk cēē kyoomootii mnyaat kuriirēē Yēēsu. 28 Kuwēēkyi keey ꞉Yēēsu ceek ānkumwooci kule, “Tipikaap Yēērusālēēm, -maakante āriiryēē kupo anii nteenee ariiree keey nkityōōniin ākoo lēēkōōkwook. 29 Mākupun ꞉pēsyōōsyēk cēē mākumwoow ꞉piiko kule, ‘Kātootiin ꞉cēēpyōōsōōy coo sōōnēnootiin ānku munāākuurēēri leekwa.’ 30 Māsākumwoow ꞉piiko kule,

32 /Kicēēkwōr mpo ceek kāāwuurtooyik āyēēny /wocēēwuutyo ākoo Yēēsu. 33 Yēē kuwō /cēēpunto yēē /kicēēkuurēē ‘Rokyeetaap Mēt,’ /cēēwuutyooci Yēēsu murtoowoontēēt. /Kicēēwuutyooci kāāwuurtooyicaa ake yēwuutaap taay nyēpo Yēēsu nto ake yēwuutaap lēt. 34 Kumwoow ꞉Yēēsu kule, “Paapa, kaalyee ceekto āmnyēē mēēnkēt ŋal cēē miitē kwiiyē.” Kiimācē ꞉ceekto kule cēēcwiciinē sirookaap Yēēsu, kupirci siimpiinēk sākuunkēt kule ŋoo ꞉nyēē mākusut sira nee.

35 Kiiyooŋiis ꞉piiko kumiitē kukāsē kiyēē kiimii kwiiyēktōōs. Kiincuruur ꞉kāāntōōyik Yēēsu kumwoocinii kule, “Kiiraraac ꞉nee alak kunyoo, kany paa kusor keey nkit, yēē neeto ku *Kāārārookiintēēt nyēē kiikway ꞉Yēyiintēēt.”

36 Kiincuruur mpo ceek ꞉riipiik Yēēsu yoo kiikoocinii *fiinyōōnik cēē mitilil kule kuye, 37 kumwoocinii kule, “Soop keey pok yēē yikuu ꞉nyii pātyooyiintēētaap Yutaayeek.”

38 Kimiitē ꞉ŋaleek cēē /kicēēsilyi yoo po murtoowoontēēt ām mētinyii tarat, cēē kiimwoowu kule, “Pātyooyiintēētaap Yutaayeek ꞉nyiitēnyi.”

39 Kiincuruur ꞉kāāwuurtooyiintēēt akeenke Yēēsu, kumwoow kule, “-Mēēyikuu ꞉nyii nee Kāārārookiin? Raraac keey ankeeraraaceec mpo aceek.”

40 Nteenee kuupuryooŋto ꞉kāāwuurtooyiintēēt nyiin ake kule, “Cipe wuliin! -Mēēywēyii ꞉nyii Yēyiintēēt? Mēēnkēt ꞉nyii kule cēēmiitē tōkōl mwooninto akeenke? 41 Kāmusyēēc aceek /ciimwoontyēēc ām tukuuk coo kiiciiwuurte. Nteenee munaakwiiy ꞉ciici lēēlis.”

42 Kumwooci ꞉ciicaato Yēēsu kule, “Mēēntē yuutyēēnoo yēē kāwēēpātyooyiisyē ām kaap Yēyiintēēt.”

43 Kuwēēkyi ꞉Yēēsu kule, “Kupooyiit man, +māsācēēpoontē keey ām kipkōōnkō.”

44 Kumii ꞉saaweet lo nyēpo pēēt, kuulaampuuc ꞉mēēnēnēēt kōōrēēt tōkōl ākoy kupunto ꞉saaweet sokool nyēpo kōōsōlēny. 45 Kukārēērunēē keey āyēēny ꞉sireet nyēē /kiciiyeelee Ātēpto nyēē Tiliil Kōt ām *Kōōtaap Yēyiintēēt. 46 Yooto kuuncō ꞉Yēēsu kule, “Paapa Yēyiintēēt! Ākwoosānuuŋ muuyēēnyuu.” Kuuwooŋtooy ŋaleecu, kuŋētē pakeenke!

47 Yēē kāwokukas ꞉nyēē wōō nyēpo sikaareek cēē kātook, kuukaasta Yēyiintēēt kule, “Kupooyiit man, kucurtaat ꞉ciici.” 48 Yoo kāwokukas ꞉piiko cēē kikiiruruukyi keey yooto ŋaleek cēē kātook, kukatita keey kaa nyēē kāāmwoontyi. 49 Kiiyooŋiis ꞉cōōrōōnuutēkyii āk cēēpyōōsōōk cēē kiikwoonēē Kalilaaya, kutoopēnē kiyēē kiimii kwiiyēktōōs.

50-51 Kiimii ꞉ciito ake nyēē /kicēēkuurēē Yōōsēēfu, nyēē kiicōōnēē mōōŋēētaap Aramataaya ām Yuteeya. Kii cii nyēē kikiikuunkēt ŋālyoontēētaap Yēyiintēēt ānkimii kuukēnē pātyooyiisyēētaap Yēyiin. Kii nee akeenke ām *kōōkwēētaap Yutaayeek, nteenee kiimācāmciintōōs ŋaleekaap cuut ām kōōk. 52 Kiiwō ꞉Yōōsēēfu kaap Pilaato wokusoom muustaap Yēēsu kule waamuy. 53 Yooto kucāmci ꞉Pilaato. Wokuurēēk muusto ankuratee sukeet ānkuwokuutōōr kēpēnēēt nyēē /kimunāācēēmuci cii kucakee.

54 Kii pēsyēēt ꞉nyooto nyēē kiikwiityoocinii keey ꞉Yutaayeek kukaariik kucac *꞉Sapaatu.

55 Kiinaam ꞉cēēpyōōsōōk cēē kiikwoonēē Kalilaaya Yōōsēēfu ākoy yoo po kēpēnēēt ankukas wulēē /kaceemutya pōōrtaap Yēēsu. 56 Nto kaamiit kukatita keey kaa wokwiitya mwaaniinak cēē pooŋuu nyēē anyiny sakuuyiilee muusto. Nteenee kiimuuny ām pēsyēētaap Sapaatu kuyuu wuloo mwootyooy *꞉ntarastiit.