1 Kutākumii ꞉Yēēsu *Kōōtaap Yēyiintēēt, kukas wulēē kiikoocintooy ꞉piiko cēē kii mākorēēn peesaanik loolēēt nyēē /kiciiruruukyini peesaanik kupo yiisyēētaap Yēyiintēēt. 2 Yooto, kucō ꞉ceepyoosya nyēē kii musuk anku kiipanan. Kiipōr ꞉nyoo peesaanikyii cēē kii ŋēri.

3 Kumwooci ꞉Yēēsu kāānoomikyii kule, “!Kāāmwoowook, ceepyoosyaani musuk ꞉nyēē kēēnum peesaanik cēpo laatik kukeetyee cuut tōkōl. 4 Kēēŋurunēē ꞉picaa mākorēēn peesaan tukusiic ām cēē caaŋ coo poonto, nteenee kāpōr ꞉ceepyoosyaanaa loolēēnyii tōkōl.”

5 Yooto, kucac ꞉kāānoomik kuŋalaalee *Kōōtaap Yēyiintēēt. Kiimwoowu kule, “Kāroorānēc kule nee ꞉rwoontōōcu /kiceeteecee Kōyi po Yēyiintēēt! Kāroorānēc mpo yēēc ꞉tukuuk cu /kicēēkōōn /ciikaraaranee kōyi!” Nteenee kumwooci ꞉Yēēsu kāānoomicaa kule, 6 “Mii ꞉pēsyēēt nyēē +/māciiturpuup tukuucu ācērēkyinii ꞉akweek. +/Māciiturpuup nyēē māmii ꞉rwaa mpo akeenke nyēē ŋōtu kukeekemeer keey ake.”

7 Yooto, kuteepee ꞉kāānoomik Yēēsu kule, “Mākoryoontēēt, yiyēktōōs āyu ꞉ŋālyoontoonoo ānkumākuupoor ꞉nee?”

8 Kuwēēkyi ꞉Yēēsu kule, “Āriip keey -/maciiperpeeraak. Cooŋēc ꞉piiko cēē makukwaanaat ānkukuur keey kule ciikuu kāārārookiintēēt. Mākumwoowook ꞉alake kule, ‘Kaariik ꞉Mākoryoontēēt.’ Yoo kāwokumwoow, -māāyēntyi. 9 +Maakas kupārē keey ꞉piiko ām kōōrēēt ānkuŋēētŋēētyi ꞉alake pātyooyiisyēētaap kōōrēēmwaa, nteenee -māāmuuyē. Mācōōni ꞉tapantaap kōōrēēt pakeenke nkal kōt kākwiiyēkiis ꞉tukuucaa tōkōl.

10 Mākupooryo ꞉pōrōryēēt ake āk ake, kupooryo ꞉kōōrēēt ake āk ake. 11 Mākutookunootēē ꞉riŋriŋnyēēt kōōrēēt. Mākutookunootēē ꞉rupeet nyēē wōō komoswookik cēē caaŋ ām kōōrēēt ankukwaanaat ꞉pōōrwoonik cēē miyootēc. Mākutook ꞉tukun ām wuliin po tarat cēē -/mākyoomuu. 12 Nto kutoompo kwiiyēktōōs ꞉ŋaleecaa tōkōl, +/mācēēwusook /āncēēwāsāntyook ām kooriikaap saayeet /anceerataak kupo anii. Nto yēēc, +/mācēēwāsāntyook ām taatyaap pātyooyik kupo anii. 13 Pārooyinto ꞉nyooto nyēē +māāmwoocinēē picaato lōkōōywēk cēē tāpoonēc. 14 Kunyoo, -maakany kwaamaak mēt kule wāāmwoowuu nee ām kōōk nyēē āyēētēē keey. 15 +Māākōōnook anii ŋoomnēn wulēē +māyēētitē keey nyēē -mākētwook ꞉cii ŋālyoo.

16 Makucaamtaak ꞉sikiikwook, tuupcōōsyēkwook, tilyōōnuutēkwook ākoo cōōrōōnuutēkwook /maceenam alak ām akweek /anceerat, nto alak /ceepakac. 17 Makuseenkaraak ꞉piiko āmnyēē āyēnwoo anii akweek, 18 nteenee -mākwoostook ꞉Yēyiintēēt mpo kiisiic! 19 Yoo kāāmutyooci ŋaleecaa, +māānyōōru sāpoonto nyēpo man ām lētuut.”

20 Kiimwooci ꞉Yēēsu yēēc kule, “Yoo kaakas ꞉akweek kēēmuut ꞉puunik Yēērusālēēm, ānkēt kule kaariik ꞉pēsyēēt nyēē turpupē ꞉Yēērusālēēm. 21 Mācēktōōs ꞉piikaap Yuteeya kumwēci lakam ānkumwēy ꞉mpo coo mii Yēērusālēēm. Nto nyoo kanyoorta ꞉ŋaleecu saaŋ, mēēntē kōōwut mōōŋēēt āriit. 22 Kuyuu wuloo mwootyooy ꞉siluutook, ku pēsyōōsyēcuutēcu ꞉cēē mākuumwoontyinēē ꞉Yēyiintēēt piiko coo kiikuwuurtooci. 23 Lēyē, mākuwuuyiityi pēsyōōsyēk cooto kule nee kooruuk coo kooyootiin āk coo rēēriisyi! Mākucō ꞉wuuyinto nyēē wōō kōōrēēt ānkumākuumwoontyi ꞉Yēyiintēēt piiko coo mārupē ŋaleekyii. 24 +/Maceepakac alak /anceenam alak wokwēēkunoot mutwoor ām kōōrōōsyēk tōkōl. Mākuminy ꞉pōrōryōōsyēk alake Yēērusālēēm ākoy yēē pōkunēē ꞉pēsyōōsyēkwaa.”

25 Kiimwooci yēēc ꞉Yēēsu kāānoomikyii kule, “+/Maceekasee mēēyintaap kōōrēēt wulēē mākōōpuurto ꞉asiista, araaweet āk kookeelik. Mākumuuyo ꞉piiko ām kōōrēēt ānkupotyi ꞉tāānkooy kule tākyini keey ānu, kumwēyēē kaaruumeet nyēpo pēēkaap ruurēētyēēt. 26 Mākuutimtiimakay ꞉wuliin po tarat kōt kumuuyo ꞉piiko cēē caaŋ yuu nyēē mākupōk kupo tukuuk cēē kāwokutook ām kōōrēēt.

27 Yooto, makukas ꞉piiko ācōōnii ꞉anii, *Wēēritaap Cii, ām poolyeet ām kāāmuukēywēēk āk lēkwēēyēētaap Yēyiintēēt. 28 Yoo kaakas ꞉akweek kutoowu keey ꞉tukuucaa tōkōl, āŋērēkiisyē, āmnyēē, āmiitē wāāpēētii kōōrēēt nyēē lēēl.”

29 Yooto yēēc, kumwooci ꞉Yēēsu kāānoomikyii kule, “Mācē ākāsēē mōkōywēēt āk keetiik alak. 30 Yoo keecuk ꞉sākēēkaap keetiicaa, ānkēt ꞉akweek kule kaariik kuŋootyēn. 31 Ām areet nyēē yuu nyooto, yoo ākāsē kwiiyēktōōs ꞉tukuucaa, ānkēt kule kaariik ꞉Pātyooyiisyēētaap Yēyiintēēt.

32 !Kāāmwoowook cēpo man, māpootōōs ꞉piikyuu coo kyaakway nkal kakwiiyēkiis ꞉tukuucaa tōkōl. 33 Mākupōk wuliin po ꞉tarat āk ŋuny, nteenee māpōku ꞉ŋālyoontēēnyuu.”

34 Kiitasta keey ꞉Yēēsu taay kumwooci kāānoomikyii kule, “Āriip keey! -Maakany ānyōōrwook āmiitē āpēktēē sookwoonuutēk āk yēēsyēēt. -Maakany mpo kuupootook ꞉kāāsōōtēywēēk cēpo wulēē +maanyoorte mākoryoontiit. Yoo kaayiy kuyuu nyooto, makuceeraak ꞉pēsyēēt nyoo ācōōnii ꞉anii. 35 Makuceer ꞉ŋaleecu piiko ām wuulyo ake tōkōl. 36 Mācē ārwootē ꞉akweek mukaankooy ānkāāsoom miisin saatitir āpuntēē ŋaleecaa saamuuc wāāyooŋēē taatyaap *Wēēritaap Cii.”

37 Kiinēētiisyi ꞉Yēēsu ām *Kōōtaap Yēyiintēēt yoo pēēt, nto kōōmooy wokurucinii keey wuliin po Lakameetaap *Sēytuuniinēk. 38 Nto yēē kayeec ꞉kōōrēēt, kiiwēēti Kōōtaap Yēyiintēēt wokuunēētiisyi. Kiimustooy ꞉mpo piiko cēē caaŋ wokulimtooy ŋaleek cēē kiinēētē ꞉Yēēsu.