1 Nyēē mā lōō, kumwooci ꞉Yēēsu kāānoomikyii wulēē kimācēktōōs kusoomtooy akookay ānkumutyoocinii.

2 Kiimwooci kule, “Kimiitē ꞉ciito ake mōōŋēēt ake nyēē kiitiilyooy ŋal ām kōōk. Kiimēēywēyē ꞉ciicaa Yēyiintēēt ānkumēēywēyē piiko. 3 Kimiitē mpo ceepyoosyeet ake mōōŋoonooto nyēē kii musuk. Kiiwēētii ꞉ceepyoosyaanaa wulēē mii ꞉ciicaa akookay kumācē kule /cēēyityooci ŋaleekyii.

4 Kiikwētyi ŋaleekaap ceepyoosyaanaa wulēē lōō. Nto mii lētuut kumwoowunēē moo kule, ‘Nkal -māāywēyē ꞉anii Yēyiintēēt nto cii ake tōkōl, 5 +māāyici ceepyoosyaani cēpo manta, āmnyēē kaakootaŋaanya ankuyiima mēt.’”

6 Kumwooci ꞉Yēēsu kāānoomikyii kule, “Yēē muucē ꞉kāāwuurtooyiintō nyēē yuu nyoo kwiici ceepyoosyaanaa manta paa, 7 /cēēmwoowuu nee kurupta keey ām wulēē mii Yēyiintēēt? Mutyoocinii kōt kukas kule kākwiici ŋaleekaap manta piikyii coo riircinii nee pēēt āk kōōmooy ānkumwoontyi coo tāŋoonyē ceek. 8 !Kāāmwoowook, yoo kaweec keey *:Wēēritaap Cii, mākwiici piikyii ŋaleekaap manta areet akeenke. Nteenee ata ꞉piiko cēē muucē kumutyooci kōt āpunu ꞉anii ānkāānyōōru tākupoonto kāāyēnēēt?”

9 Nto mii yoo, kurārci Yēēsu ŋālyoo piiko alak cēē kiikuurē keey kule curtootiin ānkumōōntooy piic. Kiimwooci kule, 10 “Kimiitē ꞉piiko alake āyēēŋu cēē kiiwokusaay ām *Kōōtaap Yēyiintēēt. Kii *Fārisooyiin ꞉ake, nto ake ku kāāruruukiin nyēpo *musōrōōn. 11 Kiicō ꞉Fārisooyiintoonoo taay ankusaay kule, ‘Yēyiintēēt, āpiruuŋ kōōnkōy, āmnyēē -māāyikuu kāāwuurtooyiin kuyuu wuloo yuunto ꞉cōōriik, cēēmŋōōkisiis, coo ceesakwayiis āk mpo kāāruruukiintooniin po musōrōōn. 12 *Ākirē āmiisyēēt areet āyēēny ām wiikiit ānkāākootyooy akeenke ām taman nyēpo kiy ake tōkōl nyēē ānyōōru.’

13 Nteenee kiikiiyo ꞉kāāruruukiintoonoo po musōrōōn wuliin po lēt. Muneemuuc kukas tarat kusooyē, nteenee kiisyeec keey takat ankuriiree keey ām wulēē mii ꞉Yēyiintēēt kumwoocinii kule, ‘Paapa Yēyiintēēt, riiruneenaa anii kāāwuurtooyiin.’

14 !Kāāmwoowook, ciito nyēē kiiwo kaa ku /kaaciikaalyaa miyootyēēnyii ku kāāruruukiintoonoo po musōrōōn nyoo kiisut keey ŋuny āmēēpērē Fārisooyiintoonoo. Kunyoo, cii nyoo sutē keey tarat +/māciirēēkunēē, ntēē nyoo sutē keey ŋuny, +/māciitōrōōr.”

15 Nto mii pēsyēēt ake, kuumutyi ꞉piiko alake Yēēsu lēēkōōk cēē minkēēc kumācē kule kuukameer yēwunnyēk ankuukat. Yoo kāwokukas ꞉kāānoomik picaa, kuupuryooŋto. 16 Nteenee kumwoow ꞉Yēēsu kule, “Āpārooci lēēkōōk kukwa wulēē āmiitē ꞉anii, āmnyēē piiko cēē yuu cuutēcu ꞉cēē wutē Pātyooyiisyēētaap Yēyiintēēt. 17 !Kāāmwoowook, puryo cii nyēē muucē kōōwut Pātyooyiisyēētaap Yēyiintēēt tōōskāy yēē kacamta kuyuu leekwa.”

18 Yooto, kucōōntyi ꞉kāāntōōyiintēēt ake nyēpo Yutaayeek Yēēsu ānkumwooci kule, “Kāānēētiin, yikuu cii nyēē tāpoon! +Maayiy kule nee sāānyōōru *sāpoon nyēpo akookay?” 19 Kuwēēkyi ꞉Yēēsu kule, “^Keesoot kule nee sēēmwoowoo kule āyikuu ꞉anii tāpoon? Ntēē Yēyiintēēt nkit ꞉nyēē tāpoon! 20 Āpērē kiisuman *ntarastiitaap Yēyiintēēt nyoo kiikōōnu ꞉Muusa nyēē mwoowuu kule, ‘-Meesakwayaan, -meepakac cii, -mēēcōōrsē, -mēētiici cii ŋālyoo. Yway kōōn āk koomut.’† Ntarastiit 5:16-20” 21 Kumwoow ꞉ciicaa kule, “Kyāāriip ntarastiinacu kucakee āyiku leekwa.” 22 Kumwooci ꞉Yēēsu ciicaa kule, “Tākupotuuŋ ꞉kiito akeenke. Weeyaalye kiy ake tōkōl nyēē poontē ānkēēkooci pānoonik. Yoo ^keeyiy kuyuu nyooto, naamaa anii. +Mēēnyōōru mākoryoontiit nyēpo man ām Kaap Yēyiin.” 23 Kiimwoontyi ciicaa ꞉ŋaleecaa, āmnyēē kiipoonto mākoryoontiit nyēē wōō. 24 Yēē kāwokukas ꞉Yēēsu wulēē kanereekta ꞉ciicaa, kumwoow kule, “Wuuy paa kule nee kucam ꞉piiko coo poonto mākoryoontiit Pātyooyiisyēētaap Yēyiintēēt. 25 Kaykay mpo kupuntēē ꞉nkamiyeet kooŋtaap sintaaniit kukeetyee kōōwut ꞉ciito nyēē poonto mākoryoontiit Kaap Yēyiin.”

26 Kumwoow ꞉piiko cēē kiilimē ŋaleecaa kule, “Ara ŋoo, naas, ꞉nyēē muucē /ciiraraac?” 27 Kuwēēkyi ꞉Yēēsu picaa kule, “Kiy nyēē mēēmuucēktōōs ām wulēē mii ꞉piiko, kōōmuucēktōōs ām wulēē mii ꞉Yēyiintēēt.”

28 Kuteepee ꞉Pēētērō Yēēsu kule, “Kas paa! Kiiceepukaakte ꞉aceek tukuukyoo tōkōl anceerupiiŋ.” 29 Kumwooci ꞉Yēēsu kule, “!Kāāmwoowook, cii ake tōkōl nyēē kaapukaakta kooriikyii, koorkēēnyii, mpo mutaapiya, kwaan āk kaameet nto lēēkōōkyii kupo yiisyēētaap Yēyiintēēt, 30 mākuukooci ꞉Yēyiintēēt cēē caaŋ yaawuut kukeetyee coo kupoonto. Mākunyōōr mpo *sāpoonto nyēpo akookay ām kōōrēēt nyoo cōōnii.”

31 Kukwōr ꞉Yēēsu kāānoomikyii coo kii taman āk āyēēny tapan ānkumwooci kule, “Akas paa, cēēmiitē cēēpēētii Yēērusālēēm. Yoo kācēēpuntē wulooto, makuunyiitakay man kuyuu wuloo kiikiiŋoorta ꞉wōōrkooyikaap Yēyiintēēt kēny kunāmē keey ākoo *Wēēritaap Cii. 32 +/Maceenam /ānciiyokooci piikaap Rooma cēē mākuuntosuur, kuŋutyi, 33 kupiroot kulālyi ankupakac. Nto mii pēsyēētaap sōmōk, kōōtuutunēē meet.”

34 Muneemuuc ꞉kāānoomik kuunkēt kiy nyēē kimiitē ꞉Yēēsu kuŋāloolēē āmnyēē kiiyeelaat ꞉ŋālyoontēēt.

35 Yooto kikiiriik kupunto ꞉ceek mōōŋēētaap *Yēērikō, kunyōōr ceekworaatyaanteet ake nyēē kiisoomsii ām araan tapan. 36 Yoo kāwokulim ꞉ceekworaatyaantaanaa pōlātēētaap piiko cēē caaŋ cēē kiikēētyooy, kumwoow kule, “Keey kule nee ēē?” 37 /Cēēmwooci kule, “Yēēsu nyēpo Nāāsārēēt nyēē miitē kukēētyooy.” 38 Kukuurci ꞉ciicaa tarat pakeenke kule, “Yēēsu, Mucōkōrēētaap *Tāwuti, riiruneenaa!” 39 Kuupuryooŋto ꞉piiko cēē kimiitē taay kule, “Siis!” Nteenee kiiwookyi tarat miisin kule, “Mucōkōrēētaap Tāwuti, ankeeriiruneenaa!” 40 Kuuyo ꞉Yēēsu ānkumwooci piiko kule, “Ārēētoonu paa ciicaa kucō yu.” Yooto kāwokupun, kuteepee ꞉Yēēsu kule, 41 “Mācē āyiwuuŋ nee?” Kumwoow ꞉ciicaa kule, “Mākoryoontēēt, āmācē akaste.” 42 Kulēēnkyi ꞉Yēēsu, “/Kāāciisoopiiŋ, āmnyēē ^kēēpoontē kāāyēnēēt. Kunyoo, kaste.” 43 Yu kāwokumwoow ꞉Yēēsu kuyuu nyooto, kukasta ꞉ciicaato pakeenke ānkuwēēto keey Yēēsu kuukoostootii Yēyiintēēt. Kiikaasta mpo ꞉piiko tōkōl Yēyiintēēt coo kiikāsē ŋaleecaa.