1 Nto mii yoo, kumwooci ꞉Yēēsu kāānoomikyii yēēc kule, “Kimiitē ꞉ciito ake nyēē kii mākoryoo nyēē kiipoonto ciinyii nyēē kiiyoonkyinii komosta nyēpo peesaanik. Kiilim ꞉ciitaap katya ŋaleek kule kimiitē ꞉ciicaa kwoomēē tukuuk keelat. 2 Kukuur ꞉ciitaap katya ciicaato kuwō kō ānkumwooci kule, ‘Kwaalim ŋal cēē mā tāpoonēc ām wulēē miitē. Kunyoo, āmācē cōp kiy ake tōkōl nyēē tāpoon, āmnyēē āmiitē wāāyooŋtiiŋ ām yiisyēēt.’

3 Yooto /kāwocēēmwooci ꞉ciicaa ŋaleecaa kuusoot ānkumwoow kule, ‘Kāāpoot yiisyēēnyuu! +Maayiy yawuut kule nee? Ntēē -māāpoontē swaama nyēē tāāyiyootēē yiisyōōnuut cēē nyikiisēc -ānkumācāmē soomso. 4 Oo, kāānkēt wulēē māyiytooy yoo sāānyōōru cōōrōōnuutēk cēē sākuriipo yēē kāāpoot yiisyooni.’ 5 Kiikuur piiko coo kiipoonto pēsēntaap mākoryoontēēt. Yooto, kuteepee nyēē kiipo taay kule, ‘/Cēēyoociiŋ ata?’ 6 Kuwēēkyi ꞉nyoo kule, ‘Ntēēpēēnik pokolwookik āyēēny cēpo mwaatyaap *sēytuuniit.’ Kumwoow ꞉kāāyooŋiintoonoo kule, ‘Pooyē man, kunyoo, sil konom.’

7 Kuteepee nyēē kiikēērē kule, ‘Ntēē nyii /cēēyoociiŋ ata?’ Kuwēēkyi ꞉nyoo kule, ‘Nkaanuuk kuniyaanik pokol.’ Kumwooci nyoo mpo kule, ‘Sil tāmānwookik sisiit.’

8 Kumwoow ꞉mākoryoontēēt kule, ‘Ntēē ka ŋoomŋook man ꞉ciici.’”

Kunyoo, kumwoow ꞉Yēēsu kule, “Nkēt keey ꞉piikaap kōōrooni ām wulēē yityooy tukuukwaa kukeetyee wulēē nkētitooy keey ꞉piiko coo kiinyōōr lēkwēēyēētaap Yēyiintēēt.”

9 Yooto, kumwoow ꞉Yēēsu kule, “Āyiisyēē peesaanikwook kukaalya piiko alak sākukwēēk cōōrōōnuutēkwook. Nto ām lētuut, yoo kāāpōk peesaanik, +mawokuutoroocaak āminy kooriik cēpo akookay ām Kaap Yēyiin. 10 Cii nyoo /ciikoosēē keey ānkuriipē tukuuk cēē ŋēri, kuriipē mpo cēē caaŋ. Nto nyoo -/māciikoosēē keey āmāriipē tukuuk cēē ŋēri, kumāriipē mpo tukuuk cēē caaŋ. 11 Nto yoo -māāriipē tukuuk cēpo mākoryoontiitaap kōōrooni, ku ŋoo ꞉nyēē mākucāmwook āriip mākoryoontiitaap sāpoontaap Muuyēēt. 12 Nto yoo -māāmuucii āriipci piiko alak peesaanikwaa, /cēēkōōnook cēēkwook kupo nee?

13 Māmii ꞉cii nyēē pēēlyiintōōs kōrōkōōn āyēēny āmnyēē ākoy kulay ꞉ake. Kunyoo, mēēmuucēktōōs kunoomnyo yiisyēētaap Yēyiintēēt āk mucastaap peesaan.”

14 Yoo kāwokulim *꞉Farisaayeek alake ŋaleek cēē kiimwoow ꞉Yēēsu, kuroorci, āmnyēē kiicam ꞉ceek peesaan miisin. 15 Nteenee kumwooci ꞉Yēēsu kule, “Āsutē keey ꞉akweek kule ciikuu curtootiin ām taatyaap piiko, nteenee nkēt ꞉Yēyiintēēt tuuyintaap moo nyēē kyaawuŋte keey. Kiy nyēē sutē ꞉piiko kule po laatik, ku pēc paatee ām wulēē mii ꞉Yēyiintēēt.

16 Kutoompo kwoomtootii ꞉Pātisāniintēēt Yoowaana lōkōōywēk, kii siluutook coo kiikōōnu ꞉Muusa āk coo kiisutu *wōōrkooyik ꞉cēē /kyoomtooy. Kucakee kiicō ꞉Yoowaana ākoy yaawuut, lōkōōywēk cēē /kyoomtootii ku cēpo Pātyooyiisyēētaap Yēyiintēēt. Nteenee mii ꞉piiko cēē caaŋ kutāyē. 17 Muucē kupot ꞉wuliin po tarat āk ŋuny nteenee māpotē ꞉ŋālyoontēēt mpo akeenke ām siluutoocaa.

18 Cii ake tōkōl nyoo kakwat koorkēēnyii ankuumut ake, kaapar kooyēētyo. Nto nyoo keemut koorko nyēē kaakwat ꞉saanteenyii kāākuuntosuur ꞉nyoo kooyēēyaa.”

19 Kutasta keey ꞉Yēēsu taay kumwoow kule, “Kimiitē ꞉ciito ake nyēē kiiloocē sirooy cēē kāroorānēc cēpo āliisyō nyēpo tarat. Kikicam ꞉ciici kukwiiy sookwoonuut āk sāpoonto nyēpo tarat. 20 Nteenee kimiitē ꞉pananeet ake nyēē /kicēēkuurēē Lasaaru nyēē kiikusyēēn ꞉sērēkēēcōōk miisin. /Kikiciimukoontyi katyaap mākoryoontēēt kurkat. 21 Kumii yooto po kurkat kupērē nto ānyōōru mpo seenkakweekaap āmiik cēpo mākoryoontēēt, kukwoonii ꞉ŋōōkiik kwokumēēlē mwooyōōk.

22 Nto mii lētuut cokume ꞉Lasaaru. Kusut *꞉malayikaanik wokōōpuurto keey *Apraam. Nyēē munāākulōōyiit, cokume ꞉mpo ciicaa kiipoonto maaliit. /Ceemuy, 23 nteenee /kiwocēētōōrci muuyēēnyii wulēē mii ꞉maata nyēē māmusē. Kumii wulooto, kutoopēn Lasaaru kupoonto keey Apraam.

24 Kukuurso ꞉ciicaa kule, ‘Paapa Apraam! Ntēē keewaaŋtaa ꞉maata! Riiruneenaa ānkēēyooku Lasaaru cokōōwut ēē moorineet pēēko kutiswoo ŋalyapta.’ 25 Nteenee kumwooci ꞉Apraam kule, ‘Wēnyoo, mācēktōōs nkēt kule yoo kiitēēyiku sāpoot, ^kiinyōōru tukuukuuk cēē tāpoonēc cēē ^kimācē, nteenee kimiitē ꞉Lasaaru mwoonin. Kunyi, miitooci keey yawuut ꞉Lasaaru wulēē nusaat, ānkēēmiitē ꞉nyii mwoonin. 26 Nto yēēc, mii ꞉nkōrtiit nyēē wōō miisin kwēēnuunyoo nyēē yoo kālē ꞉cii ake tōkōl nyēē mii wuli kucō komosaa, mēēmuucēktōōs. Māmii mpo yēēc ꞉cii nyēē muucē kucōōnēē komosta nyoo miitē kucō komosi.’ 27 Kumwoow ꞉ciicaa kule, ‘Paapa Apraam, mwoocinoowoo naas Lasaaru kuwō kanyaa aceek 28 wokumwooci mpo mutaapiya muut cēē mii kaa kule kuriip keey /simācēētōōrci mpo wuli tēē nyi ꞉mwoonin kōōyiin kāpōk.’ 29 Nteenee kuwēēkyi ꞉Apraam kule, ‘Kany kuyēpci ꞉ceek yiit siluutookaap Yēyiintēēt coo kiikōōnu ꞉Muusa āk *wōōrkooyik.’ 30 Kuwēēkyi ꞉mpo ciicaa Apraam kule, ‘Paapa, māyēmē kuyuu nyoo paatee, nteenee kaykay yoo /kāāciiyookto ciito ake nyēē kiime. Muucē kuweecweec keey ām miyootyēēt nyēē kiikwiiy.’ 31 /Cēēwēēkyi ciicaa yēēc kule, ‘Yoo māmācē yaawuut mpo ꞉mutaapiya kulim kiy nyēē kiimwootyooy ꞉Muusa ākoo wōōrkooyik, ku mākiy kulimci cii ake tōkōl nyēē kaŋeetee meet.’”