1 Kimiitē ꞉yēē kiikwoontyi Yēēsu ꞉kāāruruukikaap *musōrōōn cēē caaŋ āk piiko alak cēē kikwiiyootii ŋal cēē miyootēc. Kiiwokuyēpcinii yiit ꞉picaa kiy nyēē kiinēētē ꞉Yēēsu. 2 Yooto kuuŋunyŋuunyiis *꞉Farisaayeek āk poonwookiikaap *ntarastiit kumwoow kule, “Ntēē tōrōōcē ꞉ciici piic cēē kāāwuurtooyik ānkwoomiisyi ꞉tōkōl?”

3 Kumwooci ꞉Yēēsu picaa kule, 4 “Yoo poontē ꞉cii kēēciirōk pokol ānkupot ꞉akeenke, pākookyinii ooyu cuut tāmānwookik sokool āk sokool yeecay ankuwokuceeŋaat nyoo kāpot? 5 Nto yoo kāānyōōr, kālāpcinii ooyu kaankaa ānkucōōnto kaa ām ŋarakweek? 6 Yoo kāāpunto kaa, kuurē ooyu cōōrōōnuutēkyii āk laatoosyekyii ānkuŋērēkiis ꞉tōkōl āmnyēē kānyōōr kēēciiryoonooto?

7 Ām areet nyēē yuu nyiitēnyi, makuŋarac ꞉mpo Yēyiintēēt kupo kāāwuurtooyiintēēt akeenke nyoo kāākōt keey kukeetyee piiko tāmānwookik sokool āk sokool coo kuurē keey kule ciikuu curtootiin āmāmācē kule ceeweecweec keey.

8 Nto yoo poonto ꞉ceepyoosya peesaanikyii cēpo laatik ānkōōsuutyo ꞉akeenke, nāmē ooyu taariit ānkuupuuc kōōto tōkōl kucēēŋso kōt kunyōōr peesyaantaanaa? 9 Ara yoo kāānyōōr paa, kuurē ooyu cōōrōōnuutēkyii āk laatoosyekyii ānkuŋērēkiis ꞉tōkōl?

10 Ām areet nyēē yuu nyiitēnyi, mākuŋērēkiis *꞉malayikaanik, yoo kaweec keey ꞉kāāwuurtooyiintēēt akeenke.”

11 Kiitasta keey ꞉Yēēsu taay kumwoow kule, “Kimiitē ꞉ciito ake nyēē kiipoonto wēērikyii āyēēny. 12 Kimiitē ꞉yēē kiimwooci ꞉wēēriit nyēē miniŋ kwaan kule, ‘Apaya, āmācē rōōpkwoo tukuuk coo ceecuu.’ Kucam ꞉kwaan. Kunyoo, kiirōōpci wēēriit nyēē wōō ceecii ānkurōōpci mpo nyēē miniŋ ceecii.

13 Yooto kakeetya ꞉pēsyōōsyēk cēē ŋēri, kunam ꞉wēēriit nyēē kii miniŋ ceecii ānkuwuci keey kōōr nyēē lōō. Kiiwokwaamee tukuucaa tōkōl keelat.

14 Kiicō ꞉rupeet kōōroonooto nyēē /kicēēpālē keey keelat. Kyaam wēēraa ꞉rupeet. 15 Kunyoo, kuwō katyaap ciito ake ām kōōroonooto ankuwokusaasyaay kule kōōpuurto keey sākwiicinii yiisyēēnyii ake tōkōl. Kuukooci ꞉ciicaa kuriipē tōōrōōk. 16 Puryo ꞉cii nyēē kiikooci kiy nyēē kaam. Kunyoo, kiilal ꞉rupeet kōt kule nto ayaam āmiikaap tōōrōōk. 17 Kuusoot ānkumwoow kule, ‘Ntēē nyōōruu ꞉mutwoorikaap paapamwaanii āmiik cēē yēmē kwaam kōt kuŋōt ꞉alake. Ām nee sakupakacaa ꞉rupaa ām wuli? 18 Kaykay akatite keey kaa ānkuwāāmwooci paapa kule: Kyāāwuurtooci Yēyiintēēt ākoo nyii. 19 Māyēmēktōōs tāāyiku leekweŋuuŋ, nteenee sutoo kuyuu mutwooriintēēŋuuŋ ake tōkōl.’

20 Yooto kāwokuuwaany ꞉wēēraa kuusoot kuyuu nyooto, kunam paanta kuwō kamwaa. Nto mākupunto kaa, kutoopēn ꞉kwaan. Kuunkēt kule kyaaki wēēriinyii. Kukāsyi riirik ankulapat wokutorooc. 21 Nteenee kumwooci ꞉wēēraa kwaan kule, ‘Paapa, kyāāwuurtooci Yēyiintēēt ānkucāāwuurtoowuuŋ. Māyēmēktōōs tāāyiku leekweŋuuŋ.’

22 Kumwooci ꞉kwaan mutwoorikyii kule, ‘Āsutu areet akeenke sireet nyoo tāpoon ām tōkōl, kamoololyeet āk kwēyōōk ānkuulookyi wēēri. 23 Ākwōru wuunweet nyoo naraat cēēyēēnkyi. Mācēktōōs cēēŋērēkyi 24 āmnyēē kyaa tākusāpoot ꞉wēērinyuu nyi kyāāpērē kiime. Kikiipot, nteenee kāātook.’ Nto ām yooto, /ceecac /caam saakweet.

25 Yooto tōkōl kimiitē ꞉wēēriit nyēē wōō mpareen kwiiyiisyi. Nto yēē kiirōōtu kaa, kukas kutuumē ꞉piiko. 26 Kukuur mutwooriintēēt ake ankuteepee kule, ‘Nee ꞉nyi mii kutuumcinii ꞉piiko?’ 27 Kuwēēkyi ꞉mutwooriintoonoo kule, ‘Kaaweec keey ꞉mutaapiya nyeeŋuuŋ tāpoon. Kunyoo kayeeny ꞉kōōn wuunwaanaa konoraat kwaam ꞉piiko kuŋērēkiis.’ 28 Kiimwoontyi wēēraa kii wōō kōt kutay mēēwut kō. Kucō ꞉kwaan saaŋ ankucokusaasyaay kule kuwō kō. 29 Nteenee kumwooci kwaan kule, ‘Yee, apaya! Kyāāyiwuuŋ ꞉anii yiisyēēt ām kēnyiisyēk cēē caaŋ nyēē mānāāwuurtoowuuŋ āmēēpērē ^kiikōōnoo mpo waarwa āyoomci keey ꞉anii āk cōōrōōnuutēkyuu. 30 Nto yooto kaweec keey ꞉wēēriiŋuuŋ ꞉nyēē kiiwokwaamee tukuukuuk keelat kuupootyi cēēmōrōniis, neennyi ^kēēyēēnkyi wuunwa nyēē kunāmē ꞉kooŋta kuŋērēkyi.’

31 Kuwēēkyi ꞉kwaan kule, ‘Wēnyoo, cēēpoontē keey ꞉aceek ākoo nyii akookay, anku nyeeŋuuŋ ꞉kiy ake tōkōl nyēē āpoontē ꞉anii. 32 Āpooyē man ayiy saakwaani, āmnyēē kiicēēpērē kiime ꞉mutaakwoomēt, neennyi kyaa tākusāpoot. Kikiipot, neennyi kāātook.’”