1 Kiikwa ꞉piiko ānkōōruruukyi keey yēē kimiitē ꞉Yēēsu kōt kukuunykuuny keey ānkutic keey. Yooto, kuŋāloolyi ꞉Yēēsu kāānoomikyii kule, “Āriipēē keey ŋaleekaap *Farisaayeek, āmnyēē sutē keey ꞉picu kule ciikuu tāpoonēc, nteenee māyuu nyoo. 2 Kiy nyēē yeelaat, +/māciipoor, nto kiy nyēē wuŋaat, ākoy kutook pēsyēēt ake. 3 Kiy nto ŋālyoo ake tōkōl nyēē mwoowuu ꞉ciito kuusōōtē kule tōōs mēēpērē /mācēēlimē, kusyooru keey ꞉ŋālyoontoonoo ām pēsyēēt ake. Nto yoo kācoomci ꞉cii ake ŋal kumiitē kōōto nyēē maalaat, ākoy /cēēlimēē ŋaleecaa saaŋ.”

4 Kutasta keey ꞉Yēēsu taay kumwooci kāānoomikyii kule, “Piikyuu, -māāmuyēē piiko coo poonto kāāmuukēywēēk kupakac pōōrwoonikwook, nteenee māpoonto kāāmuukēywēēk kukeetyee yooto. 5 Mii ꞉nyēē mācēktōōs āmuyēē! Poonto ꞉nyooto kāāmuukēywēēk kutōōrcook wulēē po maata nyēē māmisē yoo kāāpōku.

6 -/Mācoolyēē nee tiitiiyiin muut peesaan cēē māpo laat? Nkal kuyuu nyooto, mēēpērē mākuyuutyēē ꞉Yēyiintēēt cii ake tōkōl. 7 Ntēē nkēt mpo ꞉Yēyiintēēt wulēē tēēnto ꞉puutēēk ām mētitaap ciito. Kunyoo, -māāmuuyē, āmnyēē sōōtook akweek ꞉Yēyiintēēt miisin kukeetyee tiitiiyiin cēē caaŋ.”

8 Kutasta keey ꞉Yēēsu taay kumwooci kāānoomikyii kule, “Yoo kācāmciin ꞉cii ām taatyaap piiko kule cāmoo, +maacam ꞉anii, *Wēēritaap Cii, ciicaa ām taatyaap *malayikaanikaap Yēyiintēēt kule ciinyuu. 9 Nteenee nyoo kataya ām taatyaap piiko, +maatay ꞉anii ām taatyaap malayikaanik.

10 +/Maciikaalya piiko coo ŋāloolēēnoo anii nyēē miyaat, nteenee -/māciikoolyooy piiko coo cupē Muuyēēt nyēē Tiliil.

11 Yēē /kāciiyooŋtēēnook kōōk ām kōōkwōōsyēkaap Yutaayeek āk cēpo pātyooyik alak, -maakany kuuyiimaak mēt ꞉kiy nyēē +māāmwoowu nyēē ātuucēē keey. 12 Mākukōōnook yooto ꞉Muuyēēt nyēē Tiliil ŋaleek cēē +māāmwoowu.”

13 Yoo kāwokuuwaany ꞉Yēēsu ŋaleecaa, kumwoow ꞉ciito ake ām piiko kwēēn kule, “Mākoryoontēēt, mwoocinoowoo paa mutaapiya kucwiwoo tukuukaap paapa.” 14 Kuwēēkyi ꞉Yēēsu ciicaa kule, “Mānāmoo ꞉ŋala cēē yuu coo.”

15 Kumwooci ꞉Yēēsu piiko kule, “Āriip keey! Māmācēktōōs ātukuulyi keey tukuuk ām kōōrooni, āmnyēē māruptooy keey ꞉sāpoonto nyēpo man āk mākoryoontiit nyēē poonto ꞉cii.”

16 Kutasta keey ꞉Yēēsu taay kurār tyoonkōōcēēt ake kule, “Kimiitē ꞉ciito ake nyēē kiipoonto mpareenyii nyēē wōō. Kikwiiy ꞉āmiik ām mparaanaa miisin. 17 Yooto, kumwoowunēē moo kule, ‘+Maayiy kule nee? Ākōnōrēē ānu āmiicu tēē cu tōkōl?’ 18 Kumwoow kule, ‘Kiito nyēē miitē, +maapuryeet cookēēnik coo kupo kwaak ankaateec cēē wōōyēc. Mākukōōno ꞉cooto pārooyinto wulēē +maakonoree āmiikyuu āk tukuukyuu tōkōl. 19 Yēē kaakonor, āmwooci keey kule: Kany akiste ankaapaypayiitu āmnyēē kaakonor āmiik cēē yēmoo ām kēnyiisyēk cēē caaŋ coo kwoonii.’ 20 Nteenee kumwooci ꞉Yēyiintēēt ciicaa kule, ‘Parpar ꞉nyi kule nee! Mii /wociinumunēēniiŋ sāpoonŋuuŋ kōōmooy. Kunyi ii, mākupooyiit ŋoo ꞉tukuucaa ^keekonor?’

21 Kunyoo, parpar ꞉cii nyoo tukuulyinii keey mākoryoontiit ām kōōrooni āmāpoonto mākoryoontiit ām wulēē mii ꞉Yēyiintēēt.”

22 Yooto, kumwooci ꞉Yēēsu kāānoomikyii kule, “Kunyoo, āmwoowook kule -maayiim keey kule āyoomē nee, nto āloocii nee. 23 Wōō ꞉sāpoon kukeetyee āmit āk sirooy. 24 Mācē ākāsēē tōrtōk. Māpātiisyi, mākisiisyi, māpoonto mpo cookēēn, nteenee pāyē ꞉Yēyiintēēt. Ntēē āpooyē ꞉akweek laatik ām wulēē mii ꞉Yēyiintēēt kukeetyee tariit! 25 Mātāsyinii keey ꞉pēsyēēt mpo akeenke yoo keeyiimee keey ꞉cii sāpoontaap kōōrooni. 26 Nto yēē -mēēmuucē ꞉yooto kukaalyaak kiy mpo kisic, nyēpo nee kuuyiimaak ꞉tukun mētēwoy?”

27 Kutasta keey ꞉Yēēsu taay tākumwoow kule, “Akas paa, wulēē yuunto ꞉lēēlyēēt ake tōkōl ām samiiy. Mākwiiyiisyi āmānāpcinii keey sirooy. !Kāāmwoowook, kiipoonto ꞉Sōlōmōōn mākoryoontiit nyēē wōō, nteenee kiimāpoonto sirooy cēē kāroorānēc kuyuu ꞉lēēlyoonoo. 28 Nto akweek cu -māākoosēēnoo keey kuyam, yoo muucē ꞉Yēyiintēēt kuukaraaran lēēlyēēt nyoo lēēlē yawuut nto nyēē matyaa kulalac, kucam nee wulēē makuulaaktaak akweek?

29 -Maayiimee keey ŋaleekaap āmiik nto ŋal alak tōkōl. 30 Piiko coo -mēēnkēt Yēyiintēēt ꞉cēē wuulyootēē tukuucaa tōkōl, nteenee nkēt ꞉Kōōn kule āmācē ꞉akweek tukuucaa. 31 Aceeny kurook pātyooyiisyēētaap Yēyiintēēt, anku /mācēētāswook tukuuk cuut alak tōkōl.

32 -Māāmuuyē ꞉akweek, piikyuu coo tukusiic, āmnyēē kucāmwook ꞉Yēyiintēēt kule āwut Pātyooyiisyēēnyii. 33 -Māātukuulyi keey tukuuk cēē āpoontē, nteenee akaalyee coo poonto nyalilya. Yoo kaayiy kuyuu nyooto, +māānyōōru mākoryoontiit nyēē -māpōku ām kipkōōnkō. Māmii wulooto ꞉cōōriinto āmāmii ꞉kuutya nyēē makunyeeree. 34 Tiiyēē ꞉cii mēt wuloo miitē ꞉mākoryoontiinyii.”

35 Kutasta keey Yēēsu taay yēēc kumwoow kule, “Ayitye keey nyēē tāpoon ankupukaakta taariinak kulāytōōs. 36 Akarkeyiitu keey mutwoorik cēē mii kukānyē mākoryoontēēmwaa kuwēēcēē keey saakweetaap kooyēēy. Yoo āyikuu yityootiin, +māāyootyi mākoryoontēēt kurkeet pakeenke, yoo kēēŋēētiis. 37 +/Maciikat mutwoorik coo /kācēēnyōōr kukāsu. !Kāāmwoowook kupooyiit man, mākwiityooci ꞉mākoryoontēēt mutwooricaa āmiik ānkupāyiis ꞉nee nkit.

38 Muucē ꞉mākoryoontēēt kupun ām saaweet ake tōkōl. Muucē ku kōōmooy kwēēn nto kutoompo kuurirē ꞉kōōrēēt. Nteenee ām asiista ake tōkōl nyēē kāpunto, +/maciikat mutwoorik coo kānyōōr kwiityootiin.

39 Mācēktōōs ākērēsyi ŋālyoontooni: Ntēē nkēt ꞉cii asiista nyēē cōōrunēē keey ꞉cōōriintēēt, nto riipē kanyii -/mācēēput. 40 Kunyoo, ācōpē keey ꞉akweek, āmnyēē makuceeraak *꞉Wēēritaap Cii.”

41 Yooto, kuteepee ꞉Pēētērō Yēēsu kule, “Mākoryoontēēt, aceek nkit ꞉cēē miitē mwoowēēc ŋaleecu, nto cii ake tōkōl?”

42 Kuwēēkyi ꞉Yēēsu kule, “Mutwooriin ꞉nyēē tōōrcinii ꞉mākoryoontēēnyii kuuyoonkyi cuut ku nyēē /ciikoosēē keey ānku ŋoom. 43-44 !Kāāmwoowook kupooyiit man, yoo karup ꞉mutwooriintoonoo kuyuu wulēē māktooy ꞉mākoryoontēēnyii, kataat. +/Maciilaaŋtee kuuyoonkyi tukuuk tōkōl cēpo katya.

45 Muucē kuusoot ꞉mutwooriintoonoo kule lōō yēē wokucōōnii ꞉mākoryoontēēt. Yooto mākupir mutwoorik cuut kukeetyee yēē kātāriipē nyēē tāpoon ānkupōktēē āmiisyēēt āk pōōkitēēt. 46 Makuceer ꞉mākoryoontēēt mutwooriintoonoo kumiitē kukwiiyē kuyuu nyooto, +/māciinum /anceelal /āncēēwēēkyi komosta nyoo po coo -/māciikoosēē keey. 47 +/Māciimwoontyi ciicaa miisin, āmnyēē kēēnkēt kiy nyēē /kācēēmākyini kule kwiiy āmēēpērē kakwiiy kuyuu nyooto. 48 Nteenee cii ake tōkōl nyēē -mēēnkēt kiy nyēē /cēēmākyini kule kwiiy āmēēpērē kakwiiy, mēēpērē nyōōru ꞉nyoo mwooninto nyēē wōō kuyuu nyoo nkēt. Cii nyoo /kāciikooci pārooyinto nyēē wōō kukwiiyē kiito ake, +/maceemacee kiy nyēē wōō. Nto yoo /kāciikooci ake kāāmuukēywēēk kukeetyee cēpo ake, +/maceemacee kiy nyēē wōō kukeetyee nyēpo nyiin.”

49 Kumwoow ꞉Yēēsu yēēc kule, “Kāācōō cāālooci maata kōōrēēt nyēē mākuutiliil piiko. Lēyē, pērē ꞉mētit nto kaalay mayi pakeenke. 50 Nteenee +/māciipuuntēēnoo nyāliluutook ām pēsyōōsyēk coo kwoonii anku makukiinya ꞉ŋaleecu ākoy pēsyēēt nyoo mākupōkunēē.

51 Āsōōtii ꞉akweek kule kāācōōntē anii toloosyēēt kōōrooni? Puryo, kāāsutu nyalilya ākoo cwiyateet. 52 Makucwiy keey ꞉piikaap katya ake. Yoo kā muut ꞉picaa, makucama ꞉sōmōku ankutaya ꞉cuut āyēēŋu, nto mā nyoo, kucama ꞉āyēēŋu ankutaya ꞉sōmōku. 53 Makucama ꞉wēēriit kutaya ꞉kwaan, nto kutaya ꞉wēēriit kucama ꞉kwaan. Mākucuuncuun ꞉cēēpto āk kaameet. Mākwiil ꞉kāāywāyiisyēēt nyēē kupoontēē keey ꞉koorkēētaap wēēriit āk ceepyoosyeetaap piikooy.”

54 Yooto, kuwēēkyi keey ꞉Yēēsu piiko ānkumwooci kule, “Yoo kaakas ꞉akweek poolyeet kulooŋunēē tinkeey,* Ām kōōrēētaap Isrāyēēl cōōnēē roopta tinkeey, nto yoomeet nyoo layaat kucōōnēē tō. āmwoowuu ꞉akweek kule, ‘Mākurōōpēn yawuut,’ kukwiiyakay kuyuu nyooto. 55 Nto yoo kāwusunēē ꞉yoomeet komostaap tō, āmwoowuu kule, ‘Makulay yawuut ꞉asiista,’ kukwiiyakay kuyuu nyooto. 56 Kāāmustooyōōticu! Āpērē tōōs ānkēt cēē caaŋ. Ānkēt ꞉akweek āmwoowu kiy nyēē pooruu ꞉wuliin po tarat āk ŋuny -āmāānkēt kiy nyēē mii kwiiyēktōōs pēsyōōsyēcu.

57 Ām nee māānkēt ꞉akweek kiy nyēē po man? 58 Yoo mii ꞉ciito ake kuwāsāntyinēēniiŋ kōōtiini, kumācēktōōs syeem ālimciinē āk ciicaa kutoompo āpuntooy kōōtiini. Yoo munaayiy kuyuu nyooto, muucē ꞉ciicaa wokuratiŋ. 59 Nto yēē /kaceeratiŋ, mēēpērē /maciityaaktiiŋ ākoy yoo ^keeyaakte pēsēntaap piic tōkōl.”