1 Kiimii ꞉pēsyēēt ake yēē kiimii ꞉Yēēsu kusoomēē yēētēt ake. Yooto kuwokuuwaany, kuwēēci ꞉kāānoomiintēēt akeenke ānkumwooci kule, “Mākoryoontēēt, neeteec aceek wulēē /cēēsoomtooy, kuyuu wulēē kiinēētitooy ꞉Yoowaana kāānoomik ceecii.” 2 Kumwooci Yēēsu kule, “Āsoomē kule, ‘Paapa Yēyiintēēt,* Mwoowuu ꞉siluutookaap Kirikiik alake kule ‘Paapa Yēyiintēēt nyoo miitē tarat.’ kany kuwōōyiit ꞉kaannyeeŋuuŋ, kucō ꞉pātyooyiisyēēŋuuŋ.† Mwoowuu ꞉siluutookaap Kirikiik alake kule ‘Kany kwiiyēkiis ꞉kāāmuukēywēēkuuk ām wuli po ŋuny kuyuu wuloo yuunto ām wuloo po tarat.’ 3 Kōōnēēc āmiik cēē yēmēēc ām pēsyō ake tōkōl. 4 Kaalyeec ām miyootyōōnikyoo kuyuu wuloo ciikoolyooy ꞉aceek coo lēēlwēēc. Nteenee riipēēc sumāciisuuci syēēmuutook.‡ Mwoowuu ꞉siluutookaap Kirikiik alake kule ‘nteenee raraaceeneec wulēē miitē ꞉puunnyoontēēt.’’”

5-6 Yooto kutākumiitē ꞉Yēēsu kuunēētē kāānoomikyii wulēē /cēēsoomtooy, kumwooci ceekto kule, “Yēē kaceeriŋ ꞉too kōōmooy, muucē wēēci coorweeŋuuŋ ankiiŋeet mwoocinii kule, ‘Coorweenyuu, coorweenyuu! Ntēē mēēsārwoo! Kaalyaa āmiik wokwaam ꞉toontēēt nyēē kāācōōntyoo.’ 7 Muucē ꞉ciicaa kiimii rwoo kumwoowuuŋ kule, ‘Kāāruci keey ꞉anii nto yēēc, kāāruuyo mpo ꞉lēēkōōkwaanii kunyi, -meeyiimaa. Māāmuucii kōt āsāruuŋ.’” 8 Kumwooci ꞉Yēēsu kāānoomikyii kule, “Nkal kāmāyootuuŋ, yoo keetas taay ŋēētiisyē, makuŋeet ānkukōōniŋ kiyēē kēēmācē.

9 Kāāmwoowook, yoo ^kēēsoom, /cēēkōōniŋ, yoo keeceeny, +mēēnyōōru, nto yoo kēēŋēētiisyē, /cēēyootuuŋ. 10 Cii ake tōkōl nyēē soomē kiy, /ciikoocinii, nyoo cēēnyē, kunyōōru, nto nyoo ŋēētiisyii, /cēēyootyinii kurkeet.

11 Ŋoo ām akweek ꞉nyēē yoo kateepee ꞉leekweenyii purpuryoontēēt kuukooci yeereen? 12 Nto yoo kateep mākēyoontēēt, kuukooci kēnēyoo? 13 Kunyi, yoo āmuucē ꞉akweek, cēēpŋōōkisiis ākooci lēēkōōkwook tukuuk cēē tāpoonēc, nto nyuun Kōōn nyoo mii kipkōōnkō? Numu keey ꞉nyoo kukōōnook Muuyēēt nyēē Tiliil yoo kāāsoom neeto.”

14 Nto mii pēsyēēt ake, kuupēpēēto ꞉Yēēsu *muuyēēt nyēē miyaat nyēē kikiikwiiy ciito ake kutoomimii. Yoo kāwokuŋeetee ꞉muuyoonoo miyaat ciicaa, kucac kuŋalaal. Kiikitee ꞉piiko koroomun. 15 Nteenee kumwoow ꞉alake kule, “Nkal kōt muucē kuupēpēēto muuyōōnik cēē miyootēc, nyōōrtooy kāāmuukēywēēk wulēē mii *꞉Pēēlsēpuul nyoo yoonkyinii muuyōōnik coo miyootēc.” 16 Yooto kutyam ꞉piiko alake Yēēsu kumwooci nee kule, “Pēēluut nee nyēē +mēēpoorunēēnēēc kule poontē ꞉nyii kāāmuukēywēēk cēē kwoonēē kipkōōnkō.”

17 Nteenee kiinkēt ꞉Yēēsu kāāsōōtēywēēkwaa, kumwooci picaa kule, “Puryo kōōr nyēē pciyē keey ānkupooryo, nyēē māturpuupē. Nto katya ake nyēē pciyē keey, kusērētē. 18 Āmwoowuu ꞉akweek kule ānyōōrtooy ꞉anii kāāmuukēywēēk wulēē mii pātyooyiintēēt nyēpo muuyōōnik cēē miyootēc? Nto kikiikōōnoo, nto kāpooryēē nkit ānkuturpuup ꞉pātyooyiisyēēnyii. 19 Yoo naas ākwētitooy ꞉anii muuyōōnik cēē miyootēc kusiir Pēēlsēpuul, kusiir ŋoo nyēē kwētitooy ꞉kāānoomikwook muuyōōnik? Kunyoo, makusees ꞉kāānoomikwook kule āyikuu moosootiin nto puryo. 20 Nteenee yēē ākwētitooy ꞉anii muuyōōnik cēē miyootēc kusiir kāāmuukēywēēk cēpo Yēyiintēēt, kuupoor kule kāācō ꞉pātyooyiisyēēnyii wulēē mii ꞉piiko.

21 Yēē mii ꞉cii nyēē poonto nkuruuk āk tukuukaap pooryēēt kuriipēkiis tukuukyii tōkōl nyēē /māciinumunē. 22 Nteenee yoo kācō ꞉ciito nyēē poonto nkuruuk kuupēl nee, muucē kuunumunēē tukuukaap pooryēēt tōkōl coo kēnē keey ānkusutēē tukuukyii tōkōl.

23 Ciito nyēē māmii kamasnyuu ku puunnyoontēēnyuu. Nto cii ake tōkōl nyoo -mēēruruucē tukuuk ākoo anii, kweenee nyēē sērēētē.”

24 Kumwoow Yēēsu kule, “Yoo /kaaceekwatita *muuyēēt nyēē miyaat kucōōnēē ciito, makuumpakaatee surkwēēnto nyēē kiilay ꞉asiis kucēēnyē wulēē kāāmuuŋēē. Nto yoo kāmunāākunyōōr, kumwoow kule kaykay āwō wulēē kyāāminyē. 25 Nto yoo kaaweec keey muuyoonoo miyaat wulēē mii ciito nyēē kiiŋēētēē, kunyōōru wulooto kōōpuukoot ankuyiityaat nyēē tāpoon. 26 Wēēti ānkuwokucōōnto keey muuyōōnik alak tisap cēē miyootēc ānkucēēkōōwut ꞉tōkōl ciicaato. Kunyi, miyātiitu ciicaa kukeetyee yoo kiipo taay.”

27 Kutākumii ꞉Yēēsu kuŋāloolē, kukuurci ꞉ceepyoosyeet ake nyēē kiimii yooto kāākōōruruukyi keey ꞉piiko kule, “Kataat ꞉koomut nyoo kiiyiiŋ ānkuurēēryiiŋ.” 28 Kuwēēkyi ꞉Yēēsu ceepyoosyaanaa kule, “Man, nteenee cēē kātyootiin miisin ku piiko tōkōl coo limē ŋālyoontēētaap ꞉Yēyiintēēt ānkukwiiyē wulēē māktooy.”

29 Yooto kāwokucaaŋiit ꞉piiko miisin ām yēē kiimii ꞉Yēēsu, kumwooci piiko kule, “Miyootēc ꞉piiko alake cēē mii yuutēyu kule nee! Tēēpēēnoo anii pēēluut nyēē pooruu kule kiiyookwaani ꞉Yēyiintēēt, nteenee pēēluutyēēt paatee nyēē /māciikooci ku nyoo po Yoona. 30 Kuyuu wuloo kiikwēēk Yoona pēēluut ām piiko cēē kiiminyēē Niinēēfi, kunyoo mpo yēēc ꞉Wēēriitaap Cii mākwēēk nyēpo picaato.”

31 Kutasta keey ꞉Yēēsu taay kumwoow kule, “Māsākuuyo ꞉ceepyoosyeet nyēē kiipātyooy kōōrēētaap Tō ām pēsyoonoo po musaankuut ānkuwāsāntyi piiko cēē yuu cuutēcu, āmnyēē kiicōōnēē ꞉ceepyoosyaanaa lōōyin cokulimta ŋoomnēnēētaap Sōlōmōōn. Nteenee miitē yu yawuut ꞉nyēē wōō nyēē pēlē Sōlōmōōn. 32 Māsākuuyooŋiis ꞉mpo ceek piikaap Niinēēfi ām pēsyoonoo po musaankuut ānkuwāsāntyi piiko cēē yuu cuutēcu, āmnyēē kiiwēēwēēcēkiis ꞉ceek kurupta keey ākoo mwaatyaayateetaap Yoona. Nteenee mii yu yawuut ꞉nyēē wōō nyēē pēlē Yoona.”

33 Kutasta keey ꞉Yēēsu taay kumwoow kule, “Māmii ꞉cii nyēē pēēlē taariit ānkuwuny nto kēēkupuuyē kērēpēēt. Nteenee /ciitōōrē yēē tōrōōroot sākulēkwēēci cii ake tōkōl nyoo cōōnii kō.”

34 Kutasta keey ꞉Yēēsu taay kumwoow kule, “Kooŋuuŋ nyēē koocinii pōōrŋuuŋ lēkwēēyēēt. Yēē kāstooy kooŋuuŋ nyēē tāpoon, kupoonto pōōrŋuuŋ lēkwēēyēēt. Nto yēē mākāstooy nyēē tāpoon, kumiitē mēēnēn nyēē mā miniŋ. 35 Kunyoo, kas kule lēkwēēyēēt nyoo poontē kule mā mēēnēnēēt. 36 Yoo kēēŋoonkyi pōōrŋuuŋ tōkōl lēkwēēyēēt nyēē māmii wulēē kāŋōt, +mēēnyōōru lēkwēēyēēt kutōkōl, kukarkeey ākoo yoo keekwanyiiŋ ꞉taariit.”

37 Kutākumii ꞉Yēēsu kuŋāloolē, kutorooc ꞉Fārisooyiintēēt ake Yēēsu kanyii wokwoomiis. Kucam ꞉Yēēsu wokōōpuur ŋuny ānkukwoomiis. 38 Kiikitee ꞉ciitaap katya miisin kukas Yēēsu kukwoomiis kumunaakoowuun yēwunnyēkyii kuyuu yuu wulēē kiiyuunto kāāpuurtaap Yutaayeek.

39 Kumwooci ꞉Yēēsu ꞉Fārisooyiintoonoo kule, “Ācāmē ꞉akweek *Farisaayeek ātiliilē cikōōmpēēt saaŋ ākoo saaniit, nteenee ām āriit āpoontē moorooŋnyaantiit ākoo ŋal cēē miyootēc. 40 Akweek sōlōōnōcu! -Māānkēt ꞉akweek kule Yēyiintēēt nyoo kiitoonyē coo /cēēkāsē, kiitoonyē mpo coo -/mācēēkāsē? 41 Ākoocinii pānoonik tukuuk coo āpoontē. Yēē kaayiy yuu nyooto, +māātililiitu ām taatyaap Yēyiintēēt.

42 Āmiitē kwapi kule nee ꞉Farisaayeek! Āmnyēē āriipē keey yoo ānumcinii Yēyiintēēt akeenke ām taman cēpo tukuuk tōkōl coo ānyōōru nkal mpo coo tukusiic, nteenee āyuutyēē ꞉akweek tukuuk cēpo laatik kuyuu /ciici alak ŋal cēpo man ākoo kule ceecam Yēyiintēēt. Yēmē ciiyē tukuuk coo po laatik, ankaataste keey ꞉akweek ākoocinii Yēyiintēēt akeenke ām taman.

43 Āmiitē kwapi kule nee ꞉Farisaayeek! Kyaacam ꞉akweek āpuurē ātēpuutēk coo po taay ām kooriikaap saayeet. Ācāmē mpo /ciisupooyootook nyēpo tarat ām wulēē caaŋ ꞉piiko.

44 Āmiitē kwapi kule nee, āmnyēē āyuuyē mwēēnoon cēē mātooku cēē /kicēēmuci piic, /cēēpunto tarat -/amāāciinkētē.”

45 Kuteepee ꞉poonwookēēt ake nyēpo *ntarastiit Yēēsu kule, “Kāānēētiintēēt, yoo keeŋalaal yu nyoo, miitē cupēēc mpo aceek.”

46 Kuwēēkyi ꞉Yēēsu kule, “Āmiitē mpo akweek poonwookiikaap ntarastiit kwapi kule nee, āmnyēē ātiinyēē piiko alak tukun cēē nyikiisēc ānku māāmācē ꞉akweek kōt ākuskusyi ceek.

47 Āmiitē akweek kwapi kule nee! Āmnyēē kyaateec akweek tukuuk kunyool cēē āsōōtēē wōōrkooyik cēē kiipākācē mpo ꞉kuukoomwooŋ. 48 Kunyoo āmiitē ꞉akweek ācāmciintōōsii coo kiikwiiy mpo kuukoomwooŋ. Kiipakac ꞉ceek wōōrkooyik ānkāāmiitē ꞉akweek ātēēkyinii tukuuk cēē /ciisōōtē. 49 Kunyoo, kiimwoow ꞉Yēyiintēēt ām ŋoomnēnēēnyii kule, ‘+Māāyooktē wōōrkooyik āk *kiiyookiik. +/Maceepakac alak āncēēwus alak.’ 50 Kunyoo, +/maciimwoontyook akweek waanak ākoo coo kyāācāmciintōōsii kule /ceepakac wōōrkooyikaap Yēyiintēēt kucakee yēē /kiciiyee kōōrēēt. 51 Kiicakee yoo /kicēēpākācē Āpēl ākoy yoo /kicēēpākācē Sakariiya nyoo /kicēēpākākyi kwēēnuutaap *kāāpkōrōs āk *Kōōtaap Yēyiintēēt. Kupooyiit man kāāmwoowook, +/māciimwoontyi akweek tōkōl ām ŋaleecu.

52 Āmiitē kwapi kule nee ꞉akweek poonwookiikaap ntarastiit! Āpoontē ŋoomnēnēētaap Yēyiintēēt. Nteenee kyaatay maarup wuloo māktooy ꞉Yēyiintēēt, ankaakarakte piiko alak makwiiy ŋaleekaap Yēyiintēēt.”

53 Yēē kāwokuŋeetee ꞉Yēēsu yooto, kunyēēr Farisaayeek koroomun āk poonwookiikaap ntarastiit ankuteepaatee Yēēsu tēēpuutooy cēē caaŋ. 54 Kiimāce ꞉picaa kule kutac ām ŋaleek cēē mākumwoow /saceenam.