1 Nto mii pēsyēēt ake, kukuur ꞉Yēēsu kāānoomikyii taman āk āyēēny ānkumwooci kule, “Kāākōōnook swaameet āk kāāmuukēywēēk cēē āpēpēētēē *muuyōōnik tōkōl cēē miyootēc ānkāāsoop piiko cēē mnyoontōōs. 2 Kunyoo, ape woyaamtaate lōkōōywēkaap pātyooyiisyēētaap Yēyiintēēt ānkāāsoopootē piiko.”

3 Kutoompo kōt kupēētii ꞉kāānoomicaa, kumwooci ꞉Yēēsu kule, “-Maanamaate kiy ake tōkōl ām paani. Manam ꞉cii kōrōk, lool, āmnyoo, peesaan nto ka sira. 4 Yoo kāāruutooci katya ake, āpuur yooto kōt āŋēētyēē saaŋaa. 5 Nto yoo kāāpuntē saaŋta ake, amatoroocaak ꞉piikaap saaŋaa, alaleekte tēērtit ām kwēyōōkwook ānkaapuuci keey kuupoor kule tākōōpuurto ŋōōkismwaa.”

6 Yu kāwokuuwaany ꞉Yēēsu kumwooci kāānoomikyii ŋaleecaa, kupeesyetaatee sāāŋwēkaap kōōroonooto kwoomtootii lōkōōywēk cēē tāpoonēc ānkuusoopooti piiko cēē mnyoontōōs.

7 Yooto kiilim Pātyooyiintēēt *Ērōōtē ŋaleek cēē kimiitē ꞉Yēēsu kukwiiyē. Kiinam kōōt. Kiimwoow ꞉piiko alake kule, “Kiikōōtuutunēē meet ꞉Pātisāniintēēt Yoowaana.” 8 Kumwoow ꞉alake kule, “Nto *Eriiya noo!” Kumwoow ꞉alake kule, “Nto kiikōōtuutunēē meet ꞉akeenke ām wōōrkooyikaap kēny.”

9 Kumwoow ꞉Ērōōtē kule, “Ntēē kyāāpērē kyaacwante mētitaap Yoowaana. Yee! Ŋoo ꞉ake yēēc nyi mii kukwiiyē ŋaleecu tōkōl?” Yooto, kumac kule ānkēt ciicaato.

10 Yooto kāwokuweec keey *꞉kiiyookiik, kumwooci Yēēsu ŋaleek cēē kiiwokwiiy.

Kuŋeet ꞉Yēēsu ākoo kāānoomikyii kumac kule cipe yēē kiimālēēkitēē ꞉cii ake tōkōl. Kiipeetee rapeet kutēkyi keey mōōŋēētaap Peetsaayita.

11 Yooto kāwokuunkēt ꞉piiko kule kāāwō ꞉Yēēsu, kurup nee kuusaap tukurumtaap tampayaayeet. Yooto kāpunto ꞉Yēēsu tukurumto, kuuneet picaato kiy nyēē nāmē keey āk Pātyooyiisyēētaap Yēyiintēēt ānkuusoop coo kiimnyoontōōs.

12 Kumii ꞉kōōrēēt wokwiimēnē, kupēēci ꞉kāānoomik Yēēsu ānkumwooci kule, “Ntēē +mēēmwooci picu kupa wokuceeŋaat kiy nyēē kaam āk wulēē mākuruuy ām sāāŋwēk cu lēēkitēē yiitēyu, āmnyēē, māmii kiy nyēē muucē kwaam ām suurkwēēnto nyi.” 13 Kuwēēkyi ꞉Yēēsu kāānoomicaa kule, “Ākooci ꞉akweek kiito nyēē kaam.” Kumwoow ꞉kāānoomik kule, “Miitē mwoowuu nee? Ntēē cēēpoontē mukaatiinak muut āk purpuruunēk āyēēny paatee. Māyēmē ꞉coo /ceepayee picu. Kyoolēē nee āmit cēē sakuyam piic cēē tēē cu?” 14 Kii caaŋ ꞉picaato miisin nyēē kiikēētyēē kisyēērōōk muut. Kumwooci ꞉Yēēsu kāānoomikyii kule, “Atat kōōpuurootēē konom.” 15 Kutat ꞉kāānoomik piiko kōōpuuroot kuyuu nyooto. 16 Kunam ꞉Yēēsu mukaatiinecaa āk purpuruunēcaa, kukas tarat ānkupirci Yēyiintēēt kōōnkōy. Nto yityo, kupatac mukaatiinak ākoo purpuruunēk ānkuukooci kāānoomik kucwicinoot picaa. 17 Kyoomiis ꞉piiko kōt kupiyooŋiis. /Kiciiruruuc āmiik cēē kiiŋēt kōt kuunyiit kērēpōōsyēk taman āk āyēēny.

18 Kimiitē ꞉yēē kiisaay ꞉Yēēsu nkit kupoonto keey ākoo kāānoomikyii. Nto mii yoo, kuteepee kāānoomikyii kule, “Mwoowuu ꞉piiko kule anii ku ŋoo?” 19 Kuwēēkyi ꞉kāānoomik kule, “Mwoowuu ꞉piiko alake kule nyii ku Pātisāniintēēt Yoowaana nto ka *Eriiya. Nto alak kumwoowu kule nyii akeenke ām *wōōrkooyik coo kikiipōk nyēē kiituutunēē meet.”

20 Kuteepee ꞉Yēēsu kāānoomik kule, “Nto akweek āmwoowuu kule anii ku ŋoo?” Kuweek ꞉Pēētērō kule, “Nyii ku *Kāārārookiintēēt nyēē kiikuuyookwēēc ꞉Yēyiintēēt.” 21 Yēē kāwokumwoow ꞉Pēētērō kuyuu nyooto, kuunkāloontyi ꞉Yēēsu ceek kule, “Mēēntē ceemwaatyaate ŋaleecu.” 22 Kumwooci yēēc kule, “Ākoy kupuntēē *꞉Wēēritaap Cii nyāliluutook cēē caaŋ. Makutay ꞉pooyik, mpo *pēēliikaap kōrōsēēk cēē yēēc ākoo poonwookiikaap *ntarastiit. Nto yēēc +/maceepakac nto miitē pēsyēētaap sōmōk kōōtuutunēē meet.”

23 Kutasta keey ꞉Yēēsu taay kumwooci kāānoomicaa āk piiko cēē kimiitē yooto kule, “Cii ake tōkōl nyoo mācē kurup ŋaleekyuu, misyinii kutay kiy nyēē mācē ꞉mooyēēnyii āmānyōkōriitu meet* Yēē /kaceeweec ām yiitēyu ŋālyoo kupo ŋālyoo kumwoowu kule ‘ankunam murtoowoontēēnyii’. Ām pēsyōōsyēk cooto, kii yoo kanamaat ꞉ciito murtoowoontēēt kuupooru kule miitē /wocēēpākācē. akookay. Yoo kacam kwiiy kuyuu nyooto, kurupa. 24 Nyoo kāyēētyi keey sāpoontaap kōōrooni, mākuupoot sāpoonnyii nyēpo akookay. Nto nyoo kēēkootyo sāpoonnyii ām kōōrooni kupo anii, mākunyōōr *sāpoonto nyēpo akookay. 25 Tāpoonnyo nee nyēē nyōōruu ꞉cii yēē kēētukuulyi keey tukuuk tōkōl ām kōōrēēt ānkuupoot sāpoonnyii nyēpo akookay?”

26 Kiimwooci yēēc ꞉Yēēsu piiko kule, “Cii ake tōkōl nyoo kataya āk ŋaleekyuu, +maatay mpo ꞉anii, *Wēēritaap Cii, pēsyoonoo ācōōnii ām lēkwēēyēēnyuu āk nyēpo Paapa ākoo nyēpo malayikaanikyii. 27 !Kāāmwoowook, mii ꞉piiko alake yu cēē māpōku kumunaakas Pātyooyiisyēētaap Yēyiintēēt.”

28 Nto yooto kāpōk ꞉pēsyōōsyēk cēē riicē sisiit kucakee yēē kiiŋalaalee ꞉Yēēsu ŋaleecaa, kukuur kāānoomikyii sōmōk: Pēētērō, Yoowaana ākoo Yāākōpō. Kupeeta keey kāānoomicaa ākoy tulwēēt ake tarat wokusaay. 29 Kumii ꞉Yēēsu kusooyē, kuwalakay ꞉tōōnto kuulakaceec miisin. Kuwālēkiis ꞉mpo sirook cēē kiiloocē, kuulēkēcēēciis ankuleelakiitu kule piiw!

30-31 Kutook Muusa ākoo *Eriiya ām lēkwēēyēētaap Yēyiintēēt ankuŋalaal ꞉tōkōl āk Yēēsu. Kiiŋāloolēē wēētēēnyii nyēē kimiitē wokwiityiintōōs ām Yēērusālēēm.

32 Yēē kiiŋāloolē ꞉Yēēsu ākoo mpo Muusa, kiikiinamta ꞉rwoonto Pēētērō āk kāānoomik cuut āyēēny. Nto wokusōw, kukas Yēēsu kukaakuulaampuuc ꞉lēkwēēyēēt kupoonto keey Muusa ākoo Eriiya. 33 Yooto kaataryaac ꞉Muusa ākoo Eriiya kumācē kule cipe, kumwooci ꞉Pēētērō Yēēsu kule, “Mākoryoontēēt, tāpoon cēēmiitē yu. Kany ceetec kisariinak sōmōk, nyeeŋuuŋ, nyēpo Muusa ākoo nyēpo Eriiya.” Kiimēēnkēt ꞉Pēētērō kiy nyēē kiimii kumwoowu.

34 Kutākumii ꞉Pēētērō kuŋāloolē, kuuyēēn ceek ꞉poolyeet. Kiimuuyo ꞉ceek miisin. 35 Yooto, kucōōnēē ꞉kōōtēēt poolyaanaa nyēē mwoowuu kule, “Leekweenyuu ꞉nyi nyēē ācāmē.† Mwoowuu ꞉siluutookaap Kirikiik alake kule ‘nyēē kyaakway’. Kunyoo, ālimci kiy ake tōkōl nyēē mwoowuu.”

36 Yooto kāwokupōk ꞉ŋaleecaa, kii Yēēsu nkit āk kāānoomicaa cēē kimiitē yooto. Kiisiista ꞉kāānoomicaa ŋaleecaa kiikwiiyēktōōs nyēē munāāmwooci cii ake tōkōl ākoy pēsyēēt ake.

37 Yoo kāyēēkunēē, kukāārōkunēē ꞉Yēēsu ākoo kāānoomicaa kii sōmōk lakam, kutōrōōk ꞉piiko cēē caaŋ.

38 Kukuurso ꞉ciito ake ām kwēēnuutaap picaato kule, “Kāānēētiintēēt, mii yu ꞉wēērinyuu anku leekweenyuu nyooto paatee. 39 Tēryēkyini *꞉muuyēēt nyēē miyaat kwaak. Yoo kātēryēkyi, ncōōyē, sōrsēētē ānkukāpusē pukaanteet. Ryooktootii nyēē miyaat āmāwuntooy areet akeenke. 40 !Kwāātēēci kāānoomikuuk kuupēpēētooci muuyoonoo miyaat, nteenee muneemuuc.”

41 Yooto, kumwoow ꞉Yēēsu kule, “Moosootiin ꞉piiko alake kule nee. Ntēē -mēēkoosēēnoo keey! +Māāpuurtook ānkāāmutyoocook ākoy āyu?” Yooto, kumwooci kwaaniitaap wēēriit nyooto kule, “Mutu paa wēēraaŋuuŋ.”

42 Kumii /ciimutu wēēriit, kutēryēkyi ꞉muuyoonoo miyaat ānkuusōrsēēt. Kuupēpēēto ꞉Yēēsu muuyoonoo miyaat kuŋeetee wēēraa. Yooto, kusop ꞉wēēraa pakeenke, nto kaamiit kukētyi Yēēsu kwaan.

43 Kuukitee ꞉piiko tōkōl coo kimiitē yooto, ku kakas wulēē kiiyuunto ꞉kāāmuukēywēēkaap Yēyiintēēt.

Kumii ꞉piiko tākuukitēē tukuuk cēē kiikwiiy ꞉Yēēsu, kumwooci ꞉Yēēsu kāānoomikyii kule, 44 “Āmācē āyēpci yiit ꞉akweek ŋaleek cēē āmiitē wāāmwoowook ānkāānāmē mēt. Mii /wociiyokootyooy *Wēēritaap Cii kuwō yēwunnyēkaap piikaap kōōrooni.” 45 Munēēnkēt ꞉kāānoomik kiy nyēē kimiitē kumwoowu ꞉Yēēsu. Kiiyeelaat, nteenee kiinyōkōriitu yēē makuteepee Yēēsu.

46 Kucac ꞉kāānoomik kumooyo wōōyinto. 47 Nteenee kuunkēt ꞉Yēēsu kiyēē kimiitē kumooytōōs ꞉ceek. Yooto, kuunookunēē leekweet ake kucō komosnyii yēē kimiitē ꞉nee ānkumwooci kāānoomikyii kule, 48 “Cii ake tōkōl nyoo keetorooc leekwa āmnyēē nyeenyuu ꞉leekwaanaa, keetorooca anii. Nto yoo kaatorooca, ku kaatorooc Yēyiintēēt nyoo kiiyookwoo. Kuu nyooto, nyoo sutē keey ŋuny ām akweek, ku nyooto ꞉nyēē wōō.”

49 Kiimwooci ꞉Yoowaana Yēēsu kule, “Mākoryoontēēt, kimiitē ꞉ciito ake nyēē kiiceekas kuupēpēētooy *muuyōōnik cēē miyootēc kukwiiyiisyēē kaannyeeŋuuŋ. Yooto, ceeyeetee ciicaa makwiiy kuyuu nyooto, āmnyēē kiimā akeenke ām kāānoomikuuk.” 50 Kuwēēkyi ꞉Yēēsu kule, “-Maayeetee, āmnyēē cii nyoo mātāyook ku nyiimwooŋ.”

51 Yoo kikiiriikyi Yēēsu ꞉pēsyōōsyēkyii cēē +/mācēēkwōrē kuwō kipkōōnkō, kuwō ākoo kāānoomikyii nyēē kaarat moo kutākyini keey Yēērusālēēm.

52 Yēē kiimii ꞉kōōrēēt kwiimēnē, kikiiriic ꞉Yēēsu ākoo kāānoomicaa saaŋta ake ām kōōrēētaap *Samaariya. Kuuyookto piiko alak kupa ākoy saaŋaa wokukāsyi pārooyinto wulēē kāruuy. 53 Nto kāwokupunto ꞉picaa wulooto, kutay ꞉piikaap saaŋta nyooto meetorooc, āmnyēē kimiitē kuwēētii *Kōōtaap Yēyiintēēt ām Yēērusālēēm.

54 Yu kāwokumwoow ꞉picaa /kāciiyooktooy kule kātāyiis ꞉piikaap saaŋaa, kumwooci ꞉Yāākōpō ākoo Yoowaana Yēēsu kule, “Mākoryoontēēt, +maciiyee nee picaa, ēē? Ara mācēēmwooci Yēyiintēēt kutōōrci yiileet kuuyoomiis, ēē, nto nee?” 55 Kuweec keey ꞉Yēēsu ānkuupuryooŋto kāānoomik cooto āyēēny. 56 Nto mii yoo, kutākyi keey saaŋta ake.

57 Nto mii pēsyēēt ake, kumii kēēlyaap too kupēētii, kumwooci ꞉ciito ake Yēēsu kule, “Ānoomiiŋ ꞉anii nkal ^kēēwō ānu!” 58 Kuwēēkyi ꞉Yēēsu ciicaa kule, “Poonto mōkōytiinēk wulēē minyē ānkupoonto mpo ꞉tōrtōk wulēē minyē, nteenee māpoonto *꞉Wēēritaap Cii wulēē muunyē.”

59 Kukuur ꞉Yēēsu ciito ake cokwēēk kāānoomiintēēnyii, nteenee kumwooci ꞉ciicaa Yēēsu kule, “Mākoryoontēēt, kany kōt amuy paapanyuu, nto ānoomiiŋ.” 60 Kuwēēkyi ꞉Yēēsu ciicaa kule, “Kany kumuy keey ꞉muuswēk, nteenee cōō ꞉nyii ceeyaamtaate lōkōōywēkaap Pātyooyiisyēētaap Yēyiintēēt.”

61 Kumwooci ꞉mpo ciito ake yēēc Yēēsu kule, “Āwēy, Mākoryoontēēt, āmiitē ꞉anii ācōōnii, nteenee kany kiny wāāpirci piiko cameetaap keey ām kaa.” 62 Kuwēēkyi ꞉Yēēsu nyoo kule, “Cii nyoo tēpēnē mukōōnkē ānkukusē lēt, kumānyoolyinii Pātyooyiisyēētaap Yēyiintēēt.”