3
Kikwiityooci ꞉Yoowaana Yēēsu areet
(Mataayo 3:1-12; Māārkō 1:1-8; Yoowaana 1:19-28)
1 Kii kēnyiitaap taman āk muut yēē kiipātyooy ꞉Tipēēryō kōōrēētaap Roomeek kumukuul. Ām pēsyōōsyēcaato, kiipātyooy ꞉Pōōntyō Pilaato kōōrēētaap Yuteeya, kupātyooy *꞉Ērōōtē Antipaas kōōrēētaap Kalilaaya, nto mutaakwaam Filipō, kupātyooy ꞉nyoo kōōrōōsyēk āyēēny: nyēpo Itureeya ākoo nyēpo Tirakooniya. Kiipātyooy ꞉Lusaannyas kōōrēētaap Apileen. 2 Nto *pēēliikaap kōrōsēēk* /Cēēkuurē ām areet ake kule tisiik. cēē kii yēēc ām pēsyōōsyēcaato ku *Anaas ākoo *Kayaafa. Kii yooto mpo yēē kiicōōntyini ꞉ŋālyoontēētaap Yēyiintēēt Yoowaana, wēēritaap Sakariiya, kumii surkwēēnto. 3 Kunyoo kiimwaatyaatee ꞉Yoowaana lōkōōywēk komoswookik tukwaay cēpo ānnyēētaap Yoortaan kumwoocinootii piiko kōōnumunēē keey miyootyēēt /ankuceepatisan sakuukaalya ꞉Yēyiintēēt miyootyōōnikwaa. 4 Kuyuu wuloo /kicēēsilyo ām kitaapuutaap *wōōrkooyoontēētaap Yēyiintēēt *Isaaya kule,
“Miitē ꞉ciito ake kukuurunēē surkwēēnto kule,
‘Ayitye keey
ānkāāpārooci Mākoryoontēēt areet.
5 /Ceeŋam tulōōnōōk
āncēēsisin rōrōŋtiinēk.
/Ceecuul aroosyek coo moosootiin
/ānkuciirōōr coo siŋiirēc.
6 Mācēktōōs ꞉piiko tōkōl kuunkēt kule
makuraraac ꞉Yēyiintēēt piikyii.’”† Isaaya 40:3-5
7 Kiimwooci ꞉Yoowaana piiko cēē kimācē /ceepatisan kule, akweek “Ŋoomwookicu, ŋoo ꞉nyēē kiimwoowook kule āmwēyēē mwoonintaap ꞉Yēyiintēēt nyoo mākucōōntyook? 8 Ayiy tukuuk cēē pooruu kule kyaareeny keey, yēē kātāāsōōtii kule, ‘Ntēē cēēpooyē *Apraam.’ Āmwoowook man kule muucē ꞉Yēyiintēēt kwiiy rwoontōōcu kwēēk lēēkōōkaap Apraam.† Pooruu ‘lēēkōōkaap Apraam’ piiko cēē limcinii Yēyiintēēt yuu Apraam. 9 Miitē ꞉āywēēt keet kiriinta. Kunyi, keet ake tōkōl nyoo -mēēyiwuu āmnyoo, /masiceeyap ānku /cēēwiirci ma.”
10 Kuteepee ꞉piiko Yoowaana kule, “Kiy nee ꞉nyēē +maciiy aceek?”
11 Kuwēēkyi ꞉Yoowaana kule, “Yoo poonto ꞉cii sirook āyēēny, kucwici nyoo māpoonto. Nto nyoo poonto āmiik, kuukooci mpo nyoo māpoonto.”
12 Kiikwa mpo *꞉kāāruruukikaap musōrēēt kumācē kule /ceepatisaneec ānkumwooci Yoowaana kule, “Kāānēētiintēēt, nto aceek, mākwēēc kule ciiy nee?”
13 Kuwēēkyi ꞉Yoowaana kule, “-Māātāsyi kiy tarat ām coo /kicēēmwoowook kule āruruuc.” 14 Kukwa ꞉riipiikaap kaalyeet, kuteepee kule, “Nto aceek, -maciiy kule nee?” Kuwēēkyi ꞉Yoowaana kule, “-Maawasan ŋal cēpo mwiinnyan nto kāāsosyi cii tukuukyii. Kuyamaak musyaareemwooŋ.”
15 Kiimi ꞉cii ake tōkōl kukānyē kule kupun ꞉Kāārārookiintēēt ām lēēkitō. Kiitēēpēē keey kule, “Ara nyuun *Kāārārookiintēēt ku Yoowaana?” 16 Kumwoow ꞉Yoowaana kule, “Āpātisānēēnook ꞉anii pēēko paatee, nteenee mākucō ꞉ciito ake nyēē poonto kāāmuukēywēēk kuupēl ceekwaanii, -māāyēmē mpo kōt ātyookyi pōrōōk cēpo kwēyōōkyii. Makupatisaneenaak Muuyēēt nyēē Tiliil ākoo maata. 17 Makusees nkaanuuk, kōōruruuc ānkuukooci cookē, nto mōōrōryēēk kupeelee maata nyēē māpōkuu.” 18 Kiitasta keey ꞉Yoowaana kwoomcinii piiko lōkōōywēk cēē tāpoonēc ānkukāloontyi kutayee keey ŋōōkis.
19 Kiipuryooŋto ꞉Yoowaana pātyooyiintēēt Ērōōtē Antipaas āmnyēē kiinumunēē mutaakwaam koorkēēnyii nyēē /kicēēkuurēē Erootyaas. Kiipuryooŋto mpo yēēc kupo ŋaleek alak cēē caaŋ cēē miyootēc. 20 Yooto, kutāsyi ꞉Ērōōtē miyootyēēt ake āmnyēē kiikarta Yoowaana māpuusi.
/Kiceepatisanee Yēēsu pēēko āk Muuyēēt nyēē Tiliil
(Mataayo 3:13-17; Māārkō 1:9-11)
21 Yoo kiitāpātisāniisyootii ꞉Yoowaana, kucō mpeenee ꞉Yēēsu /ankuceepatisan. Nto mii ꞉Yēēsu kusooyē Yēyiintēēt, kuyaatakay ꞉wuliin po tarat 22 ānkurōkyi ꞉Muuyēēt nyēē Tiliil nyēē yuu swaaraar. Kukuur ꞉Yēyiintēēt ām kipkōōnkō kule, “Nyii ku Wēēriinyuu nyēē ācāmē, ānkāāŋērēkunēē.”
Siintaaryeet wulēē kiiluukunēē ꞉Yēēsu
23 Yoo kiicēcē ꞉Yēēsu yiisyēēnyii, kiipoonto kēnyiisyēk cēē kiikēētyēē sosom. Kiikuurē nee ꞉piiko kule araap Yōōsēēfu nteenee kiipo ꞉kaameet kōōtaap Ēēli. 24 Ēēli nyoo kii araap Mataat, Mataat nyoo kii araap Lēēfi, wēēritaap Mēlēki, nto Mēlēki kii wēēritaap Yanaay, Yanaay nyoo kii wēēritaap Yōōsēēfu. 25 Yōōsēēfu wēēritaap Mataasiya ku nyēē wēēritaap Āmōōs, nto Āmōōs kii wēēritaap Nawuum nyoo kii wēēritaap Ēsli, Ēsli ku nyēē kii wēēritaap Nakaay. 26 Nakaay ku nyēē kii wēēritaap Masaati nyoo kii wēēritaap Mataasiya nyēē kii wēēritaap Sēmēyiin nyoo kiipo Yōōsēk nyoo kiipo Yoota 27 nyoo araap Yoowaana kiipo Reesa, kii wēēritaap Serupapeel, ku nyēē kiipo Syeeltyeel nyoo kiipo Nēēri. 28 Kiipo ꞉Nēēri Mēlēki, nyoo kii wēēritaap Aati, kiipo ꞉Aati Koosam nyoo kiipo Elmataam nyoo kii wēēritaap Eer 29 nyoo kiipo Yooswa, kii wēēritaap Eryeesa, nyoo kiipo Yōōriim, nyoo wēēritaap Maatat. Kiipo ꞉Maatat Lēēfi, 30 nyoo kiipo Simnyōōn nyoo kiipo Yuuta, Yuuta wēēritaap Yōōsēēfu nyoo kiipo Yoonam araap Elyaakim. 31 Elyaakim nyoo kiipo Meleeya nyoo kiipo Meena, Meena nyoo kiipo Mataasa. Kiipo Mataasa ꞉Naasan, nyoo kiipo Tāwuti. 32 Tāwuti nyoo kiipo Yēēsē wēēritaap Ōpēēt, nyoo kiipo Poowaas. Poowaas kii wēēritaap Sālmōōn, nyoo kiipo Nāāsyōōn, 33 wēēritaap Aminataap, nyoo kiipo Atamin wēēritaap Arnii,‡ Mwoowuu ꞉siluutookaap *Kirikiik alake kule, ‘wēēritaap Aminataap nyoo kiipo Raam.’ nyoo kiipo Ēsrōōn, Ēsrōōn kiipo Pērēēs, nyoo kiipo Yuuta. 34 Kiipo ꞉Yuuta Yāākōpō nyoo kii wēēritaap Isaka. Kiipo Isaka Apraam wēēritaap Teera. Kiipo Teera Nakoor, 35 nyoo kiipo Sēēruk, Sēēruk wēēritaap Rēēwu nyoo kiipo Pēlēk nyoo kii wēēritaap Epeer nyoo kiipo Syeela. 36 Kiipo ꞉Syeela Kaynaan nyoo kii wēēritaap Arfaksaat, nyoo kiipo Syēēm nyoo kii wēēritaap Nuuwa. Nto ꞉Nuuwa kii wēēritaap Lameek 37 nyoo kii araap Metuseera. Kiipo ꞉Metuseera Enuka nyoo kiipo Cāārēēt wēēritaap Maalaleel nyoo kiipo Keenan. 38 Kiipo ꞉Keenan Ēnōs wēēritaap Sēēs. Kiipo ꞉Sēēs Atam nyoo kii wēēritaap Yēyiintēēt.