1 Yooto /kawociinyiitēē Yēēsu Muuyēēt nyēē Tiliil, kuŋeetee komostaap ānnyēētaap Yoortaan ānkukwōr ꞉Muuyēēt nyēē Tiliil ākoy suurkwēēnto. 2 Kōōpuur wulooto pēsyōōsyēk artam *kukirē āmiisyēēt. Yēē kāwokupōk ꞉pēsyōōsyēcaa artam, kwaam ꞉rupeet miisin. Yooto tākumii ꞉Yēēsu wulooto po suurkwēēnto, kucōōntyi ꞉Seetaani cakutyam.

3 Kiimwooci kule, “Yēē yikuu ꞉nyii man wēēritaap Yēyiintēēt, weec rwaantaani kwēēk āmnyoo.”

4 Kuwēēkyi ꞉Yēēsu kule, “Ntēē mwoowuu ꞉Siluutook kule, ‘Māsopēē ꞉cii āmit paatee.’† Ntarastiit 8:3”

5 Kukwōr ꞉Seetaani Yēēsu ākoy lakameet ake ānkuupoorci mōōŋōōsyēk tōkōl ām kōōrēēt. 6-7 Kumwooci Yēēsu kule, “Yoo ^kēēkutumwoo, +māākōōniiŋ kāāmuukēywēēk patye mōōŋōōsyēcu tōkōl, āmnyēē āpoontē ꞉anii kāāmuukēywēēk ākooci cii ake tōkōl nyoo kaacam.”

8 Kuwēēkyi ꞉Yēēsu kule, “Mwoowuu ꞉Siluutookaap Yēyiintēēt kule, ‘Mācēktōōs kutunkyi Yēyiintēēt ankeeyway nee nkit.’† Ntarastiit 6:13”

9 Nto mii yooto, kukwōr ꞉Seetaani Yēēsu ākoy Yēērusālēēm ānkuukooci kuuyooŋēē walyiitaap tōōtēētaap *Kōōtaap Yēyiintēēt. Yooto kumwooci ꞉Seetaani Yēēsu kule, “Yēē yikuu ꞉nyii manta wēēritaap Yēyiintēēt, raantee pōk yuutēyu. 10 Mwoowuu ꞉Siluutookaap Yēyiintēēt kule, ‘Mākuuyook ꞉Yēyiintēēt *malayikaanikyii kwokuriipiŋ. 11 Makutaaciŋ ꞉malayikaanik ānkuurēētootiiŋ sumeenaciiŋ ꞉rwaa.’† Tuumwoonik 91:11-12” 12 Kuwēēkyi ꞉Yēēsu kule, “Mwoowuu ꞉Siluutookaap Yēyiintēēt kule, ‘-Meesyeem Yēyiintēēŋuuŋ.’† Ntarastiit 6:16” 13 Yooto kaakuuwaany ꞉Seetaani tyamateet, kupukaakta Yēēsu ānkuwuci keey ākoy kunyōōr pārooyinto ake.

14 Nto mii yooto kukatita keey ꞉Yēēsu Kalilaaya kupoonto kāāmuukēywēēkaap Muuyēēt nyēē Tiliil. Kiikwiiy tukuuk cēē caaŋ kōt cēē /ciikitēē ākoy kuunkēt ꞉piiko ām sāāŋwēk tōkōl. 15 Kiinēētiisyootii ām kooriikaap saayeet kōt kuukaasta ꞉cii ake tōkōl nyoo kiilimtooy.

16 Kiiwō ꞉Yēēsu Nāāsārēēt wulēē kiinērunēē. Nto mii pēsyēētaap *Sapaatu, kōōwut *kōōtaap saayeet kuyuu kwaak. Nto mii kō, kuŋeet kule asuman ŋālyoontēētaap Yēyiintēēt. 17 Yooto /ciiyokooci kitaapuut nyēē kiisilē *꞉wōōrkooyoontēētaap Yēyiintēēt *Isaaya. Kuŋaany ankusuman yēē mwoowuu kule, 18 “Āpoontē ꞉anii Muuyēēt nyēē Tiliil. Kiiŋaapa ankukwaya āmwooci pānoonik lōkōōywēk cēē tāpoonēc. Kiiyookwoo ꞉Yēyiintēēt caatyaaktee coo rātootiin ām miyootyēēt ankaayiy coo kōryootiin kukasta. Mākupāw keey coo /kiiciitiiny. 19 Kāāpunto ꞉pēsyōōsyēk cēē mākuyēēlyēēci ꞉Yēyiintēēt piiko coo kēēyēntyi neeto.”† Isaaya 61:1-2

20 Yooto kāwokuuwaany Yēēsu kusuman siluutyoonoo, kukētyi kitaapuunaa ciito nyēē kiiyoonkyinii saayeet ānkuupuur ŋuny. Kukēērēēr ꞉piiko tōkōl Yēēsu. 21 Yooto, kumwooci ꞉Yēēsu picaato kule, “Kaakwiiyakay pēsyooni ꞉kiito nyēē mwoowuu ꞉siluutoocu.” 22 Kiikitee ꞉picaa ŋaleek cēē tāpoonēc cēē kiimwoow ꞉Yēēsu. Nteenee kucac ꞉piiko alak ām yooto kuteepee keey kule, “Yee! Mā wēēritaap Yōōsēēfu nee ꞉nyi?” 23 Kuwēēkyi ꞉Yēēsu kule, “Ānkēt kule āmuuci ꞉akweek āmwoowoo ŋālyoontoonoo kiimwoow ꞉pooyoo nyēpo kēny kule, ‘Nyooyē keey kiny ꞉ceepsaakityaa.’ Nto āmwoowuu akweek kule ntēē -māāyiyē ꞉anii ŋal cēpo kaakitat ām saaŋnyuu kuyuu coo kyāāyiyēē Kaapernaam. 24 !Kāāmwoowook, -/mācēēcāmēē wōōrkooyoo saaŋnyii.”

25 Kumwooci ꞉Yēēsu ceek kule, “Asoot yoo kiiwēētii ꞉roopta kēnyiisyēk sōmōk āk ārook lo. Kunam ꞉rupeet kōōrēēt tōkōl. Kimiitē ꞉musukik cēē caaŋ Isrāyēēl. 26 Kiimii ꞉koorko nyēē kii musuk nyēpo mōōŋēētaap Sareefaas ām kōōrēētaap Sitōōn nyēē kii mā po yēēmēētaap Yutaayeek. Ntēē /sāciiyookto wōōrkooyoontēēt *Eriiya kuwō wulēē mii ꞉ceepyoosyaanaa ānku kimiitē ꞉cuut alak cēē caaŋ cēē kiipo Yutaayeek āmēēpērē /kiciiyookto Eriiya kuwēēci ceek? 27 Akas, paa, mpo yoo kiisoopē ꞉wōōrkooyoontēētaap Yēyiintēēt Eliisya Naaman nyoo kikinam *mutyeenkeenik ānku kiipo kōōrēētaap Siirya. Ntēē kiimii ꞉piiko cēē caaŋ cēē kii Yutaayeek cēē kiipoonto mutyeenkeenik āmēēpērē /kiciisoop.”

28 Yooto kunyēēr ꞉piiko tōkōl koroomun cēē kimiitē *kōōtaap saayeet yēē kāwokulim ŋaleek cēē kiimwoowu ꞉Yēēsu. 29 Kuŋēētyo ꞉ceek ānkutōōtōōci Yēēsu kumācē kule wocēēwunuktēē rēēnkēēryēēt ake nyēē kiilēēkitēē yooto. 30 Nteenee kiicuutēē ꞉Yēēsu yooto ānkuwuci keey.

31 Kuwō ꞉Yēēsu ākoy mōōŋēētaap Kaapernaam nyēpo Kalilaaya kwoomtoocinii piiko ŋālyoontēētaap Yēyiintēēt ām *kōōtaap saayeet yēē kii pēsyēētaap *Sapaatu. 32 Kiikitee ꞉piiko kāānēētiisyēēnyii āmnyēē kiiŋāloolē kupoonto kāāmuukēywēēk.

33 Kimiitē kōyaato ꞉ciito ake nyēē kiiyiimē *꞉muuyēēt nyēē miyaat. 34 Kumwoow ꞉muuyoonoo miyaat kule, “Yēē! ^Kēēcōō ceewaaŋteec? Ntēē ānkētiiŋ ꞉anii kule yikuu ꞉nyii curtaat ānkēēcōōnēē wulēē mii ꞉Yēyiintēēt.”

35 Kuupuryooŋto ꞉Yēēsu muuyoonoo kule, “Siis ankeeŋeetee wulēē mii ꞉ciici.” Yooto kuwiirci ꞉muuyoonoo miyaat ciicaato ŋuny ām taatyaap piiko tōkōl ankuŋeet nyēē munaakunyeeree ciicaato.

36 Kuukitee keey ꞉piiko koroomun ankuteepee keey kule, “Swaama nee nyēē yiyiisyēē ꞉ciici kōt kulimcinii mpo ꞉muuyōōnik cēē miyootēc?” 37 Kiitustēē ꞉ŋaleekaap Yēēsu sāāŋwēk tōkōl.

38 Yooto, kuŋeetee ꞉Yēēsu *kōōtaap saayeet ānkuwō ākoy kupo Sumōōni. Kiinyōōr ceepyoosyeetaap piikooy po Sumōōni kuumnyoonē yēēsēēt. Kusaasyaay ꞉piiko Yēēsu kule, “Ntēē +mēēsoop ceepyoosyaani.” 39 Kuwō ꞉Yēēsu wokuuyooŋēē yēē kiimii ꞉ceepyoosyeet ānkulukto pōōrto. Yooto, kusop ꞉ceepyoosyaanaato, kuŋeet ānkupāyiis.

40 Yooto kāwokurarakta ꞉asiista pēsyoonooto, /cēēkwōrci Yēēsu piiko cēē caaŋ cēē kiimnyoontōōs pōōrwoonik cēē -makarkeey. Kukameer ꞉Yēēsu picaa tōkōl yēwunnyēkyii kusopco. 41 Kuŋēētyēē ꞉muuyōōnik cēē miyootēc piiko cēē caaŋ kumii kupōlē kule, “Yikuu ꞉nyii Wēēritaap Yēyiintēēt!” Kupo yēē kiinkēt ꞉muuyōōnicaa kule *Kāārārookiintēēt ꞉Yēēsu, kulukto ꞉neeto kusiisyo.

42 Nto kāwokuyeec kōōrēēt, kuwuci keey ꞉Yēēsu wulēē mālēēkitēē ꞉cii. Nteenee kuceeŋaat ꞉piiko ām wulooto tōkōl. Nto wokunyōōr, kusaasyaay ꞉piiko kule tāciipuurtēē keey neeto ām Kaapernaam. 43 Nteenee kumwooci ꞉Yēēsu ceek kule, “Mācēktōōs āwō mōōŋōōsyēk alak waayaamtaate lōkōōywēkaap Yēyiintēēt cēē tāpoonēc.” 44 Kutasta keey ꞉Yēēsu taay kwoomci piiko ŋālyoontēētaap Yēyiintēēt ām kooriikaap saayeet ām kōōrēētaap Yutaayeek.