Na Wafle Wa Ron le Wsiok wadien Wnok Tet
139
Daud wlok ni hdin le mkom, ofo yhnak man na hra wslonti nai menyanyi.Na Wafle Wa Ron , Nen nnok tet.
Nen nahenek kadio kat wale tet tabri ke.
2 Tet tleli ofo Nen nnok wale,
tet tahin tkro ofo Nen nnok,
Nen nnok afot wale
ni hra tet tnok mak tabri kom.
3 Tet thok uwade tsiok ni
kayi de amuk fo tase,
Nen nnok kat wale ni hra tet tsiok ei.
4 Tadel om mrana sonat ni ofo,
Nen nnok afat wale, Nen nnok kadio wale.
5 Nen nskawaloti tet, nkohli tet.
Mahin tkmuon, mahin tsbiele, Nen nkohli tet.
Nen nlak wale nnam man tet.
6 Ee, tet tteit yrioro
fe ni kadio hra Nen nnok man tet ei!
Ni hra Nen nnok ei
ylis yewer kat hra tet tnok ei.
Tet ttol dait Nen.
7 Mto tet taisi tahinti kat Nen afe?
Mdain, tain fan man sio Nago Nen nhot dait?
Nago Allah Nen Nawua om mak wale wi kadio kat.
8 De hra tet tarin tse yik ago,
Nen nak wale okou.
De hra tet tain tse wi eigi,
Nen nak fot wale okou.
9 De hra tet toli fo thri tain tse tali mhok
afe thri tse tali mti
tse siwan wafle wtato ana,
10 ofo Nen nlolowain tet tak ana,
Nen nnam mslonti tet tak ko, tji dait.
11 Mde hra tet twaini man mamian om mlak diaman wata tet, mhoborti mkohli tet, mahin –
twaini fot mahak mlelek mabe amuk se Nago Nen nhot dait tet.
12 Mahin, wi mamian om maisti man dait Nago Nen nsifuon ei.
Man Nen fo amuk ou mhak mabe tali,
man Nen fo mamian om mabe mahak;
Nen nhot deri tet.
13 Ee Nai fe na Nago, Nen le nsiok wale tet,
Nen le ntalo tet tkan, tabri, tsablit,
tak latiot teme mkmat.
14 Tet tsikarioro fe tto,
"Ahe, Nen nsiok tet tbot-bot kat,
tet tabe ni owuok le mke."
Thot ni kadio hra Nen nsiok ei
fo tet tkashok fei.
Tto Nen nsiok ni ybot-bot kadio.
15 Tkdois kei, tkan kom
Nen nhot wale tlak diaman latiot
tak teme mabri, tak teme mkmat,
Nen nhot wale tet, Nen le hra nsiok tet.
16 Teme msois latiot tet, tak sonat teme mkmat,
Nago Nen nnok nhot afat wale
tet tkan omuok kom.
Tase latiot amuk mre fo, Nen nsroin wale amuk warok kat hra bo tet tase tak fobi ko.
Amuk tet ta warok ei, Nen nsroin wale yik katik fari maron.
17 Ni hra Nago Allah Nen nnok yin tet tke,
ni hra nen nsin yin tet ei, tkahiowain kat fe.
Tet taher mahin, yrok ysamsa kat.
18 Mde hra tet taher ni hra Nen nnok ei,
yrok yewer yehin kinti msmuot.
Tet tase, tsidik mahin,
tet tnok Nen nadien sisi sonat tet.
19 Nai fe na tfe Nago,
se na hra ysablit msgia, Nen nska watai!
Se na hra yala sawuan hen na tkoin ei,
Nen nlouk kat watai yehinti kat tet!
20 Na hra yaha kat Nen, yrana wain Nen,
ysiok sgia Nen nkedim.
21 Nai fe na Na Wafle Wa Ron Nen, tet taha kat na hra yaha Nen, hra yhat Nen,
tkamuon kat na hra ysidik yto yhar kat Nen.
22 Tet tkamuon kat ei, tkaso mtrere karmiak kat,
mabe na hra yto ykhan yidien Nago Nen.
23 Aa Nago, nahenek wata tet tabrim!
nefitwain delek tet tsablit,
ni hra tet tnok ei:
24 bo ni mre msgia afe?
Ofo Nen nadien twa tet
tak fan hra mse Nen nak
se tadien Nen kawuak.