105:1-45
105
Nhdin man le Sma Nago Na Waron, nrana siar ntiksi Ou wkedi om. Nrana kein man na wat kajo, na sa warok man ei, nrana ni kadio kat hra wsiok yin ei yoso.2 Nsrar man Nago, nlok kadie ntik si Ou, nrana ni owuok-awak hra wsiok ei. [Mungkin tambah: Nai yteit yrioro fe.]
3 Nkashok kat ntik si man Nago, na kohok Ou hra wkedi om malais kat. Nan nke hra nsaesik Sma Nago Waron Ou, nkashok la!
4 Nwit ndihar Sma Ou wsifuon, Nnok tmol lis kanas Allah, ndihar wain nsikafit kawuak man Ou.
5-6 Woi na Israel hra Ou wlouk helwain nan, Nago wfe na Abraham wtakein nan, Yakub wtakein nan,
nnok tmol lis kawuak ni yibot hra Ou wsiok ei, ni owuok-awak hra wsiok ei.
Nnok tmol Ou whnak kafir man na khan ei.
7 Ou le Sma Nago Na Waron, Allah faf fi Ou.
Ou le wkamti wadien wkerek sadir fe na sa marok yik fobi katak.
8 Ni kaitti todo hra Sma ou wrana wale om Ou wnok tmol lis. Ni hra wto skatoin Ou wsiok kayi, main lis kawuak de dian-dian kat.
9 Sadir om wkaitti wale, kadoin om wkaitti wale, wadien Abraham, wadien Isak.
10 Wan Yakub, wkaitti oli, wadien na sa Israel, sadir om main lis kawuak; Sma le wrana, main lis kawuak:
11 “Fobi Kanaan, bo Tet thnak man nan. Fobi Kanaan, bo nan nkain kawuak, nidien fot ntakein ei.”
12 Sma ou le wranam, wrana man yikan kyamre deri, yikan ei yrok latiot, yese yibe na ti deri, yik fobi Kanaan om.
13 Ofo yein tfara/ batara, yese wat-wat wi, wi na sa man ei, yik fobi na wat-wat yfei.
14 Mahin Sma ou wbot wan ei, wliokeit dait na mre ykait eye ei. Wkait wain wanik na sat wat yfe na safe ei wto:
15 “Na kei le ma Tet tfe na; na kei le hra Tet tlouk helwain wale ei. Na kei le ma Tet tfe nabi hra yrana kein ni yehin Tet tak ei. Mde nan nsiok sgia amot ei.” Mde le ke de Sma ou wkait wain na yifle wat man ei.
16 Sma ou le wfe he katot fle mhok, Ou wsiok katot mak fobi Kanaan, na kajo ydain ni eit.
17 Mahin wteye wale na mre walin, walin kein na sa Israel ei, bo yti yse fobi Mesir, Yusuf le walin. Yusuf hra wamon ei ysafo wabe kawor, ysafo wan na Mesir ei.
18 Yik ana fo wak bui, yik ana fo ykait wteit ei, yidien rantai yotot kat, ykait wdioro wadien besi.
19 Kawuak de hene mhok, kawuak de nai yasamik ni, de Yusuf wrana hatot fe, ni hra wrana krek, ei ybatirik kat. Ni hra wsewet ei yhok, ytatol yidien hra ou wrana wale. Sma Nago Na Waron ou wkakniet tkoin kat mabe, ni Yusuf ou wrana ni ytatol.
20 Oko fo Firaun wwit fien, na safe Mesir ou wna bhait kat Yusuf, whok wahin bui.
21 Mde warin wabe na wafle, wslonti ni Firaun wfei, wslonti na Firaun wfe ei.
22 Yusuf le wbahe na yifle wat-wat, ou le wkakniet ni yin na bahe Firaun wfe ei.
23 Mde Yakub le waka, Yusuf wono Israel waka wse Mesir, le hra fobi Ham wtakein ei. Wadien wet, wate yein, yese yibe na ti yik Mesir.
24 Sma Nago Na Waron ou wsiok ei ysres, ykafe kein wet ei yrok, na sa Israel ysanini kat, wsiok ei ykanas yewer na sa Mesir ei.
25 Mde na Mesir ei ysa wat ro kat, ysin ni ysgia yin na sa Israel ei, yin Sma ou wfe na bahe ei.
26 Mde Allah ou wteye wfe na bahe Musa, wteye Musa wamun Haron, lak ei Ou wlok hewain.
27 Musa wadien Haron ysiok ni owuok-awak, lak ei ysiok nai yteit yrioro fe. Na sa Mesir ei yhot Allah wfe ni owuok yik fobi Ham.
28 Allah wteye mamian, wsiok fobi om mmian ro kat, fe hra na Mesir ei ykabrein kat ni hra wrana ei.
29 Wsiok kla ei yibe hen, kla msgia mde eren yeigi.