84:1-13
84
Na Korah mreu o le ma wsroin kadie ko. Waka whnak wan na wa trie kadie wsol fien na mre yka ytrie sisi kadie yik bol sikafit mabrim. Ytrie yidien lagu Gitit.2 Bol hra Nen nfe om mbot kayi! Wi hra Nen nfe om mam mkashok fem, O Sma Nago Naron, Nen hra Nfle Nkohok Mewer Kat.
3 Tabri kom mnok tmol kawuak man Nen. Tet taisi tain fe Nen nfe bol mklik om. Tabri om mlwa fe tloit sonat tse Nen nfe bol om.
Allah hra Waron Nen, tet tkan kom mkashok kadio kat tgirik man Nen.
4 Klen yiwet fot yde le tet tke, ei ykashok fe yiheit yik deri bol Nen nam.Yese yhri yik Nen nfe bol om ysamne-mna madien ybot deri. Klen oliklen om mkaye madien mfe wet ei yik ana,
mto yitaren sisi yse Nen nfe wi sanfe om, O Sma Nago Naron hra Nfle Nkohok Mewer Kat, tfe klen wsa Nen, tfe Allah Nen.
5 Na hra yese yik bol Nen na ei ysamne ybot; na hra yese yik bol Nen na ei ykashok kawuak ysrar lis man Nen.
6 Na hra yein yse fan main mse Sfa Sion ou, ei ybasan fo ykan mkanas fe kanas om mahin Sma Nago Na Waron Nen, o le ma mfe he ykashok! Na hra yto yein yse Yerusalem, yto ysikafit yik Bol Kohok Mres om, ykashok kat.
7 Yto yein fe lolik ma slo Baka om, wi hra mdain kla fo, bo Nago Nen natsiofo wi om mhon madien kla sitai.
Bo tolo kyen wais kmo mde, kla wlibi-laba wrok.
8 Ee, yein fan kom ofo ykan mlwa dait ha, mkanas om mewer, kaide yhok yik Sfa Sion, yik Allah wbariomon.
9 Noso la ni hra tet tsikafit om, Sma Nago Naron hra Nfle Mewer Kat Nen. Noso tet trana ni, Allah hra kamuolo mam mate kokos Yakub ou wsanfe ni yin wale Nen ei.
10 O Allah, tet trana twa man Nen mabe na wafle raja mam mi ou, hra wdeheti mam wde le dli mok. Twaini Nen natsiofo ou. Kaman Nen le nlouk helwain wale ou wabe klen wsa man mam, tet twaini Nen nsrar wau ou..
11 Amuk mres ko, tet tak Nen nfe bol om mabri, mbot mewer, mde dait amuk warok ko tbakaya kat deri yse wi wat.
Mabot ma tet tkro tak deri Bol Allah tfe Nen na magiet om, mbot mewer kat mahin tet tase sak-sak deri tak bol hra na yyaka yfei.
12 Fe hra Sma Nago Na Waron Ou wdhen wnarak mam wde le tali, Ou wdehe ti mam wde le dli mok. Ou whares wan mam, whnak fle se nai yhdin mam.
Ou wbot wan na hra ysiok ni hra ytatol yidien Ou wabri Ou wam, Ou wkrek dait ni mrei yin ei.
13 Sma Nago Na Naron, Nen hra Nkohok Mewer Kat, na hra yten ykaso yse Nen nak ofo, ykashok mewer kat.