Sikafit mahin Daud mabe le ni hra yisgia hra yhok ytatol yin ou
6:1-11
6
Ami ko wahin Daud. Wabe nai ysrar sisi yidien fot ybait ni yde gitar. Bo na watrie ami ko, ou le ma wsol fien nai ylok ytrie sisi ami ko yik bol sikafit, yibe yrwe sisi.2 Sma Nago Naron Nen, nmro fe la tet,
Ntrere fo nhar kat amot tet tala;
nhirit amot tet tala.
Nsiok masirik kom mluwa kat.
3-4 Nmro fe tet tkei, Sma Nago Naron Nen.
Tfe kanas om mkaluwa wale,
tet tkdois ei yotot kat wale, tabri om msgia-sgia kat wale.
De amuk wakama Nen naka neren oli tet? O Sma, nweyen tet tkei!”
5 Naka oli Sma Nago Naron, Nen nbakoko fe la tet, neren kaka tet tahin ni hra yisgia kei.
fe hra Nen nfe bot om, nfe nhares om.
6 Na sie ma waigi wale ofo bo wnok oli man Nen, whdin man Nen?
Bo tet tak wi ma egi fo, bo mde sie ma tet tsrar man Nen, tsrar man le Nago Nen?
7 Tet thlet yi ykoko, tkaluwa sros kat kayi.
Tet tase, tau lis kawuak de tali, tsiglia yeis kawuak de, wi hra tase om mkaye kat, mhon madien siglia.
8 Na yiyaka yka yhliemet dait tet ha, yka ykhan lis yidien deri tet, kawuak de tet tsiglia ei ysiok kawuak tsifuon ei ymian.
9-10 Nan nke hra nsiok ni yisgia ei, nehinti kat wata tet. Wa tet tsikafit om, tsiglia om, main wale mse Nago wak, bo Nago wbakoko wmro fe wale tet.
Mahin Sma Nago le woso!
Ou le woso tet tau tan Ou ei,
11 Na khan kadio hra ysiok tet ei,
bo yteit yrioro yeliek kat, fe hra Nago wfle wewer.
Bo yhok yehinti kat tet tkei, fe hra Nago wkanas wewer ei, Ou wolot fe ei yhes!