Mokonga ande Abhasu
12
1 Cɔ, besu phɔtɔ, usɛsɛ á bamameia ndɔ asotimbi ka ɛnjia asu ka njoko á mbangɔ. Ka bondɔ bémakɛni danga nnde aosódokomisa na bojede nde békéoiphia na tá kau. Bébɛni na moingi ka mbagɔ kau. 2 Béntumiɛni tɔ Yéso n'iso. Yɛ aámbé ande mbhomi-aphe na ntɔtɔkisi á beekea nɛsu. Cɔ, ka nyɔngɔ á maseye nde Mokonga dámbhisii, aunge dábeeki kukua ka me á nkpatɔ kanga á bhisa mɔphɛ akɛ ka soni. Kɛ̌kɛnde, aiki ka njaga á mǔku á kankaanga á kɔkɔtab ndea Mokonga.3 Eya, nkanisiani Yéso. Nanga bii batɔa-bojede dábankangei phɛ̂, dáphiphii. Geani tɔ bó ka gea te, měma anu kaɛlɛmbɛ na deketa á nsebeɔ.
4 Nga, emani nde bojede aonomanisa, ka benu moci káphiphiimbɛ u, na ka bii ageokua kau. 5 Ande gea te, bobosei bɔphɛi nde Mokonga dánɔphɛi bea banakɛ?
« Miki nɛmɔ, kɔbɛnjiɛgɛmbɛ phekeaga ndea Mɔkɔta,
kophúiɛmbɛ nsebeɔ ka yɛ mbenɔ nde aokopheneaga
6 nga, Mɔkɔta aɔnsɛ́ka mmbe ankondi,
aom'binda miki bhuakɛ mmbe am'beekic.»
7 Cɔ, phiphiani tambaga nde Mokonga aonotambisaga. Aonogea bó nga, bonde banakɛ. Cɔ, miki sina mmbe abhakɛ kánsɛ́kimbɛ mɔnɔ? 8 Eya, kabɛ Mokonga na káɔnɔ́sɛ́ka bea abha-miki bhuakɛ mmbe aonsɛ́ka anakɛ, ande gea bókó baniki nde Mokonga ěbɔkɔti, bondiu baniki áǒbhika ně.
9 Goto bena babhasu íbunde básɔbɔkɔti, bunde báosogoisaga, bɛ́ɔ̌bɔka. Cɔ, akeni bɛmɔ̌kɛ phɛ̂ Abhasu á ka měma ka gea te bébɛ na enda á mɛyɔ. 10 Babhasu báɔsɔ́sɛ́ka ka besa babhɔa bíndɔ ɛ̌bɔngɛi. Kisɛ́ki ndea Mokonga andiu gǎkɛ ka bokambia nɛsu kagea te bébɛ batɔa-bonjánja bea yɛ.
11 Mbenɔ nde báɔsɔsɛ́ka áoba ka besu cina á bɛi, kabɛ cina á maseye. Mbusa i gǎkɛ, bundɔ báegoisigi k'indɔ báoba na bɔjɛjɛ na kodoni ka enda abɔ.
Suiani enda nde am'bɔngɛi Mokonga
12 Kabondɔ unge, kákámisani njaga anu nnde aɛli na nanoani muanku anu nnde aɔsɔkasɔka. 13 Bhisani ecinji anu k'aphe n'ěcumi dhɛd! Ka gea te batɔa-kidɔti bákaguɛmbɛ, ecinji abɔ á amɛ ndiu.
14 Kabani enda ka bɔjɛjɛ na bakpa bɔbhu. Bókabɛ phɔtɔ sokosa á bojede á ka měma anu. Kanga á bo, nna na nkpa nde amɔ̌nande Mɔkɔta. 15 Ɛngɛphani gea, ka benu kaeukisɛmbɛ bonjánja ékondi ndea Mokonga. Ka benu kabɛmbɛ phɔtɔ bea miigi ájia nde aɔtɛa, áoyombokisa na ndandisa á bojia ndɔ ka bakpa básiie. 16 Ka benu kabɛmbɛ ntɔa-iɛbɛ na bɛnjiaga á kema á bonjánja ndea Mokonga bea Ɛsáu, mmbe dásombisi bokutu á bɔkɔtɛana akɛ mosá ka nyɔngɔ á ɔphɛphɛ moci á eea. 17 Cɔ, booúbha gea te, mbusa i, dákondi tɔá á botikɔ ka abhakɛ bhisia akɛ njaga, abhakɛ áoya. Dákatú ye n'aphe á anganisa á moangɔ ndɔ nanga bii dáokaba u n'aogama.
18 Benu bókóbhiimisi kema nde bɔɔtɔka dhunga i na njaga bíndɔ mbenɔ nde baIsilaɛ́li dábakidi ka mamba Sinái. Mamba ndɔ dáǒtoboaga na nsa, kaiphiɔ ángbó áogbukumia, maphopho áouma gǔ i phɛ̂, 19 baIsilaɛ́li dábaɔki nduu á mbengu n'eongo á yɔnga. Báon'dengemisaga gea, Mokonga kěngodeɛ ye ka nyɔngɔ bíndɔf. 20 Mokonga déngodi phɔtɔ baIsilaɛ́li te: «Nkpa bhuakɛ nanga ába nyama mmbe adɛtɛande mamba nde, bám'bɛtande n'ɛtɛ áokua. » Mbenɔ nde dábaɔki bo, nna na nkpa nde dáphiphii yeg. 21 Eya, bii dábaɔni kema á bangisa ndɔ, Mósa áɔyɔnga te: « Oo! Neobanga phɛ̂, nyama ani aɔɛkana. »
22 Cɔ benu, bobhiimisi ndiu mamba nde báɔɔphana Sayúni, nji ndea Mokonga mmbe aoenda. Ina á nji ndɔ ande Yɛusalɛ́ma nnde á na kobha. Bamalaeka básii phɛ̂ báogua jaí kó. 23 Bobhiimisi phɔtɔ ɔma nde baánge ndea Mokonga bádhondanigi ka maseye, bunde ina abɔ bádundu na kobha. Bombhiimisi Mokonga mmbe aotenaga nyɔngɔ á bakpa bɔbhu. Bǒbhiimisi phɔtɔ měma á batɔa-doni bunde dábasi, báojujuka, báojua ka sungiaga á aphe nɛbɔ mosá á Mokonga. 24 Bombhiimisi Yéso, mmbe ande mɔɔnganisi á konsamba á kɛ̌kɛ. Yɛ aámbé asokosi měma asu na magia akɛ nga, duukana á magia ndɔ aosóphangia kema ánjá kɔnyɛ́nya magia á Abɛ́lih.
25 Ɛngɛphani ka gea, bókoyɛmbɛ ɔka á nyɔngɔ á nkpa nde aɔyɔnga na benu nga, bakpa nde dában'yé Mósa mbenɔ nde dáɔ̌phɛa ka mokondai, dábákátɔki tea á esuia ndea Mokonga. Besu phɔtɔ bɛ́kɛ́ɔtɔka na beti, aobá́ na ben'yé Mokonga mbenɔ nde aɔsɔ́phɛa n'ana kobha.
26 Ka mbenɔ á kala, dádengisi mokonda n'ɛsɔ akɛ akpɛ. Cɔ, kɛ̌kɛ nde gǎkɛ, aɔku gea te: «Nna tɔndɔ mokonda unge nedengisande goto. Ne dengisande phɔtɔ kobhaj. » 27 Bii agi: «Ne dengisande goto », ande gea te, Mokonga adengisande kema nde dáconji, kema ndɔ kábɛku ye. Kema nde nn'aɔtɔka n'adengi aunge ajigande. 28 Cɔ, bénsikisiɛ Mokonga bosegi, ka nyɔngɔ nde, asóphi koboamɛ akpɛ, nnde nn'aɔtɔka n'adengi. Ka bondɔ, bémbhɛdaneɛgɛ bíndɔ am'bɔngɛi, bɛ́mɔ̌kɛ, bém'bangɛ. 29 Eya, Mokonga nɛsu ande nsa nde aóyongobeagak.