Komunaměma, cina á tambea ánjá
13
1 Ikani k'ekondi á komunaměma ngungu anu. 2 Bókóboseɛmbɛ sesea á bakɛni nga, ka gea bo, bakpa buangbo dáběsesi bamalaeka kanga á ubhaa.3 Ókanisiani batɔa ka mekakɔ. Ókuiani ngomi bíndɔ dóbotú phɔtɔ oba kimoti na bɔ ka mekakɔ. Ókuiani phɔtɔ ngomi, bunde báǒtambisaga, bíndɔ dóbotú phɔtɔ otambaga kimoci na bɔ.
4 Ambe bakpa bɔbhu bádokomisɛ eyamani. Bókotukatukɛmbɛ eka nga, Mokonga atenande akpɛ nyɔngɔ á komusɔngɔ na nyɔngɔ á íɛbɛ.
5 Bókobhisɛmbɛ měma anu phɛ̂ ka nyɔngɔ á bangɔa. Beekeani ndiu enda na nkumba nde bo ně nga, Mokonga dági te: «Kékodeketɛeka, kékosagɛekab. »
6 Ka bondɔ unge bɛɔtɔka na bɛyɔngi na nsebeɔ gea,
« Mɔkɔta aámbé ande nengi nɛmɔ
Kébangɛku ka kema.
Cɔ, bankpa bámogeande na kema sinac? »
7 Ókanisiani bakɔta nɛnu á mosá-mosá bunde dábanoúbhisi nyɔngɔ ndea Mokonga. Ianagani ka phɔa á kema nde dábatɔtɔkisi ka enda abɔ. M'beekeani Mokonga bea bɔ. 8 Yéso Kiísito nn'aǒketia, kabɛ n'ande kala, kesande na mɛyɔ. 9 Bɔphɛi danga-danga nnde katoki ka besu kanóbǒteɛmbɛ. Akeni gea bonjánja ékondi ndea Mokonga a unge ákpagisɛgɛ měma asu, kabɛ ndiu nyɔngɔ á kema á koea. Bakpa nde báoamba nyɔngɔ ndɔ báká na kema nde báɔtɔa ka ud.
10 Cɔ, bena ɛtɛ á ɔphɛɔ nɛsu na batobei-phɛa nde bagǎkɛ ɔbhɛdanaga subi á ɛma, bákáesǒsi ea ka phɛa ndɔ. 11 Ka phɔa á banyama á ɔphɛɔ, ntobei-phɛa angbóngbó aobhika na magia abɔ subi á ɔma á bonjánjá ka nyɔngɔ á tokisa á bojede. Kǐnda á nyama ndɔ bâ gǎkɛ otoboa u ka ngba á nji. 12 Ka nyɔngɔ indɔ unge Yéso dákú phɔtɔ ka ngba á kenombe, ka gea te ásokosɛ měma á bakpa na magia akɛ sasakɛ. 13 Cɔ, bégɛ dhondaneni na yɛ ka ngba á nji na beekea gea básɔjɔɔkisɛ bea yɛ 14 nga, ka mokonda nde béké na nji nde aoiphia, be ndiu okaba nji ndɔ aobhika. 15 Cɔ k'aphe ndea Yéso, bémophɛni Mokonga ɔphɛɔ á dokomisa akɛ ka mbenɔ bhubhui, ande gea te nnde aotoka k'aphɛnɔkɔ á bunde báobhebha ina akɛ. 16 Bókóboseɛmbɛ phɔtɔ geana á bonjánja na engana sɔsɔbɛ anu, ka nyɔngɔ nde ɔphɛɔ b'indɔ unge aɔm'bɔngɛa Mokonga.
17 Óbangani bakɔta nɛnu na tɔtɔkisa á nyɔngɔ nde báonongodea. Ka nyɔngɔ nde báɔbhɛdanaga ásii ka phɔa měma anu nga, baoúbha gea te Mokonga ěuusiande ka nyɔngɔ i. Kabondɔ unge, ambe bábhɛdanɛgɛ na maseye kanga á bhɛdanaga na ntabo. Báɔbhɛdanaga na ntabo, nndɔ kánóengɛku ka kema.
18 Bókódoɛmbɛ mɛma ka phɔa asu. Beoúbha doni gea békégi kema ajede ka sɛka asu nga, bekondi bétambɛ ánjá k'aphe bhubhui. 19 Nenososi tɔ benu bó nga, nekondi Mokonga ákodɛ kani aphe nékamisɛgɛ goto gǎ mɔtɛ anu.
Ɛmɛmi
20 Cɔ, Mokonga mɛnɛ á bɔjɛjɛ, dánjujukisi Mɔkɔta nɛsu Yéso Kiísito sɔsɔbɛ á basí. Yéso aámbé ande nambi angbónbgó á bamɔgɔgɔ. Magia akɛ asɔ́tɔisi iɔnga á mɛyɔ. 21 Ambe Mokonga ánophɛ bukpɛkpɛ á tɔtɔkisa kema bhui nnde á ánjá ka gea bóbhɛdanɛgɛ nnde akondi. Átɔtɔkisɛ phɔtɔ subi asu kema nde am'bɔngɛi k'aphe ndea Yéso Kiísito mmbe ana boombia ka saga na saga. Abɛ bo!
Nyɔngɔ á ka sungiaga na nsesɔ
22 Baya, nenodengemisigi ɔkani nyɔngɔ nde á kpagisaga měma anu nga, kenodundui nyɔngɔ endǎ. 23 Ubhani gea bankodi muna-amasu Timɔtɛ́ɔ. Akoba na káiphi ka kidia, ne bhikande na yɛ ka ɔna anu.