Beekea á Mokonga
11
1 Beekea á Mokonga ande digimisa kema nde be ye tɔ na besebei. Ande phɔtɔ ubha á doni gea kema nde békéɔɔna atɔtɔkɛanande. 2 Ka mbenɔ á mosá, Mokonga dáebeeki batɔa-kala ka nyɔngɔ á beekea nɛbɔ.3 Ka nyɔngɔ á beekea aunge beubhi gea te Mokonga dáconji mokonda k'ɛsɔ akɛ nga, kema nde bɛɔɔna dátɔtɔkɛani k'índe nna ɔɔnɛkanaa.
4 Ka nyɔngɔ á beekea, Abɛ́li dáphui phɛa ánjá phɛ̂ ka Mokonga kɔnyɛ́nya nnde á Kaína. Ka nyɔngɔ á beekea ndɔ unge Mokonga ayɔngi gea Abɛ́li ande ntɔa-doni nga, Mokonga dábeeki sadaka nɛkɛ. Nanga bii Abɛ́li aku ye, beekea nɛkɛ aphɔ́tɔ n'aɔsɔ́phɛab.
5 Ka nyɔngɔ á beekea ndea Ɛnɔ́ka, Mokonga dántoisi na kobha na kákú. Dákáɔnɛkani ye nga, Mokonga aámbé dántoisi. Buku á Mokonga ayɔngi gea, mosá á gǎ akɛ na yɛ, Ɛnɔ́ka dáogea kema nde dáɔm'bɔngɛa Mokongac. 6 Cɔ, kanga á beekea nna na nkpa nde aɔtɔka n'ěkondisigi na Mokonga. Nkpa nde aombhiimisia akeni ábeekeɛ gea te, Mokonga a bei. A phɔtɔ ǒphenda bundɔ báonkaba.
7 Ka nyɔngɔ á beekea ndea Nɔ́a, Mokonga dántɔ̌migi nyɔngɔ á kema nde dákáɔnimbɛ, áobeekea nyɔngɔ nde Mokonga ayɔngi kanga á ngaka, áɔsɛka koko ángbó ka amisa akɛ n'ekombo nɛkɛ bhui. Ka bondɔ unge dáteni nyɔngɔ á batɔa ka mokonda akpɛ. Ka nyɔngɔ á beekea, Mokonga áontanga ntɔa-donid.
8 Ka nyɔngɔ á beekea, Abhalaámu dábeeki mɔphani ndea Mokonga gea te, átokɛ ka nji nɛkɛ ágɛ ka nji nde Mokonga dámɔku gea atɔ́ɛ u ka botikɔ. Abhalaámu áotóa kanga ubha ɔma nde aoga. 9 Ka nyɔngɔ á beekea, dáge koika ka nji á mɔkɔ ndɔ bea mɔkɛni. Dáiki ka ɛma k'imoci na Isáka na Yakɔ́bɔ bunde dábatɔi tɔ mɔkɔ ndɔ moci ndea Mokongae 10 nga, Abhalaámu dáobondeaga nji nde Mokonga dáangi na dácumif ngeɔ i akpɛ mbenɔ á mophɛkɔ i.
11 Ka nyɔngɔ á beekea, Sála phɔtɔ ka kophomi akɛ dátɔi bukpɛkpɛ á kumba á eme nanga bii dátú ngomba. Dátú bondɔ ka nyɔngɔ nde dánsebei Mokonga, mmbe dámɔku gea te, abande ama k'ɛbɔkɔtig. 12 Ka bondɔ unge ka nyɔngɔ á nkpa moci, mmbe dáphomi ye tɔ phɛ̂, áoba n'ɛbɔkɔti n'abiki bea basɛɛngɔa na bea mbume á ka mpɛphɛ á obenge nnde nkpa nn'aɔtɔka tanga ih.
13 Subi á beekea nɛbɔ, báokua bɔbhu kanga tɔa á kema nde Mokonga dɛ̌ɔku. Cɔ bɔ, dábaɔni gǎkɛ n'a phɔ́tɔ danga, báosesea u. Mpɔ báǒdigimisa gea, dábatú bakɛni, nji nɛsu nna ka mokondai.» 14 Cɔ, bakpa báɔyɔnga bó, ámbé báphangisi bhase gea báokaba nji nde báendande ka u bea nji nɛbɔ á bɔkɔtɛana. 15 Atúoba na bákanisi nji nɛbɔ á kala, ámbé dábatú na mbenɔ ája abɔ kó. 16 Eya, dábakondi ndiu nji ánjá phɛ̂, ande gea, nji á n'ego. Ka bondɔ unge Mokonga nn'aokua na soni á ɔphana akɛ Mokonga nɛbɔ. A bó ka nyɔngɔ nde Mokonga dábɔngisigi ka bɔ nji.
17 Cɔ, ka nyɔngɔ á beekea, Abhalaámu dámphui Isáka ka phɛa mbenɔ nde Mokonga dántombigi ka digimisa á beekea nɛkɛ. Nanga bii dántɔi ngɔmu ndɔ ka mɔkɔ 18 Mokonga áongea: « Ka beana na Isáka aunge obande na basuko básiij.» 19 Nga, Abhalaámu dáoúbha te Mokonga ana bukpɛkpɛ á jujukisa á nkpa n'aku. Ka bondɔ unge Mokonga dánsikisii anakɛ. Nndɔ ande bea mphangiɔ á jujuka ka kukua.
20 Ka nyɔngɔ á beekea, Isáka dábhisi njaga gǔ á Yakɔ́bɔ na Ɛsáu nnde atɔ̌mi nyɔngɔ nɛbɔ nde abhikaeka.
21 Ka nyɔngɔ á beekea, Yakɔ́bɔ mbenɔ nde dátú bhíbhí á kukua, áobhisa njaga gǔ á bana-Yɔsɛ́phu gbɔgbɔ abɔ, áombhebha Mokonga n'ětumii ka sese á motumbɔ nɛkɛk.
22 Ka nyɔngɔ á beekea, Yɔsɛ́phu bii dátú bhíbhí á kukua déngodi baIsilaɛ́li nyɔngɔ á toka abɔ na Mísii. Áɔ̌ɔkusa nyɔngɔ á toisa á nkua akɛ, mbenɔ á toka abɔl.
23 Ka nyɔngɔ á beekea, babɔkɔti á Mósa báɔnsɔmɛa ka basonge basaɔ, mbusa á bɔkɔtɛana akɛ nga, dábamɔ̌ni mbɛnjɛ na anjánjá. Dábakábangi gǎkɛ ɛɔphi ndea moamɛ.
24 Ka nyɔngɔ á beekea, Mósa, mbenɔ nde dátú nkpa angbóngbó, dákákondi bámɔphanɛ gea ande muna-nseka nde ba moamɛ Phaláɔ. 25 Dákondi ndiu gea, átambɛgɛ kimoci na bakpa ndea Mokonga. Áoya ba na maseye ka mbenɔ á bhɔa ka bojede. 26 Dáubhi gea, tondea akɛ bíndɔ dábantondii Kiísito, ana bokambiá ángbó phɛ̂ kɔnyɛ́nya ɛtɔi bhubhui nde dátú ka Mísii nga, dáobhisa mɔphɛ akɛ k'ophendɔ nde Mokonga amphendande.
27 Ka nyɔngɔ á beekea, Mósa dátoki na Mísii kanga á banga esuia ndea moamɛ. Áosuia u bea nkpa nde aɔmɔɔna Mokonga mmbe bákaɔmɔɔna n'iso. 28 Ka nyɔngɔ á beekea, Mósa dági Pasákam á ka mosá-mosá, áǒsosea baIsilaɛ́li gea básiɛ́ magia ka iganga á endu nɛbɔ gea malaeka á kukua kěmɛmbɛ ba ange ndea baIsilaɛ́li.
29 Ka nyɔngɔ á beekea, baIsilaɛ́li dábajabhi Obenge á Ótana, n'aphú. Bii baMísii dábakengi gea bó, Obenge áǒmia, báotinda bɔbhu kɔ́!n.
30 Ka nyɔngɔ á beekea, baIsilaɛ́li dábatimbi Yɛíkɔ ka besa ngia njaga (6). K'esa á ko ngia njaga ibɛ (7), bogaɔ á ɛtɛ nnde dátimbi u áɔngbɔɔkana. 31 Ka nyɔngɔ á beekea, Laábha nke á iɛbɛ dákáku kimoci na babibia ndea Mokonga nga, déěsesi ánjá basɔni-emani.o
32 Cɔ, nɛ́yɔngɛ ye goto bo? Ké ye na mbenɔ á tɔ̌miaga nyɔngɔ moci-moci ndea Gidiɔ́ni, Baláka, Samusɔ́ni, Yɛphúta, Dhaúdhi phɔtɔ Samuɛ́lɛ na baɔtu-nyɔngɔ p. 33 Ka nyɔngɔ á beekea unge dábatɔki nji ndea baamɛ. Dábaɔbhɛdanaga ka kɔkɔta nɛbɔ na kodoni na tɔa á kema nde Mokonga dáɔku. Bakpa buangbo dábadaki aphe-nɔkɔ á basimbaq. 34 Bakpa buangbo dábákásidi mbenɔ nde dáběmaki ka nsa á káer. Bakpa buangbo dábaooki ka minyɔ á ngɔa. Bunde dábaɛli nyama abɔ áokpagaga. Bakpa buangbo dábatú bauka ka mbenɔ á emani ka beaga ekombo ndea bakɛni. 35 Dátú phɔtɔ na ka bake nde dáběbɔni goto bundɔ dábasí na bájujúki ka kukuas. Bakpa buangbo gǎkɛ bii dábétúmigi báokua, báoya gea bákěkodembɛ. Dábakondi tɔ kukua, ka nyɔngɔ nde dábakondi ndiu jujúka ka kukua, báoba na enda ánjá phɛ̂ á mɛyɔ. 36 Buangbo goto dáběnɛphɛi na binda abɔ. Dáběboege na ngoi á ngɔa báǒmakea ka mekakɔ. 37 Báǒbɛta buangbo n'ɛtɛ báokua. Dábětenigi buangbo na ngɔa gbutuka ibɛ. Dáběme buangbo na pindi. Buangbo dábaɔkɔba na báɔli mpokɔ á bamɔgɔgɔ na nnde á bamɛmɛ. Dábaendi ka kiuka, tambaga na gea á bojede ka phɔabɔt. 38 Eya, mokonda dákákenani na bakpa bea bundɔ. Dábaǒndandabiaga ka nkanda na mamba. Báoda ka kubhu á ɛtɛ na kubhu á odo.