Baɛbhulanía 10

1 Ɛɔphi ndea Mósa a tɔ na imbiɔ á kema ánjánja nde aobhika. Nna gǎkɛ ophangia kodoni á kema kau. Nanga bakpa báphuia ɔphɛɔ ndɔ ka saga bhubhui, nna tanda ɔtɔkan'aími bojede á bakpa nde báobhika mosá á Mokonga. 2 Atúkoba n'aɔtɔka, ámbé bakpa nde báobea moangɔ ndɔ, Mokonga aoíma bojede nɛbɔ mɔngɔ imoci tɔndɔ. Ámbé báká ye kɔɔyɔka batɔa-bojede na bákátu ye ophuia k'etete á ɔphɛɔ. 3 Cɔ, ka ɔphɛɔ ndɔ, bakpa bándiu okanisia bojede nɛbɔ ka saga bhubhui. 4 Nnde ande ka nyɔngɔ nde magia á mǔku á ngɔmbɛ na mǔku á mɛmɛ nn'aɔtɔka n'atokisi bojede.

5 Ka bondɔ unge, mbenɔ á ngia á Yéso ka mokonda dáyɔngi gea: « Dókókondi ɔphɛɔ na sadaka, ô ndiu oconja nyama á kokpa ka phɔani. 6 Ɔphɛɔ na sadaka á íma á bojede káɔbɔngɛi. 7 Déyɔngi be, ‹ Cɔ, eme yɛ, nebhiki ɔtɔtɔkisa kema nde obɛ Mokonga okondi nga, bondɔ unge bádundu ka phɔani subi á buku nɛkɔ. › » 8 Kiísito dáyɔngi phɔ be: « Obɛ dókókondi ɔphɛɔ, sadaka, banyama á toboa gǔ á ɛtɛ-ɔphɛɔ na sadaka á íma á bojede, nndɔ dákáɔbɔngɛi.» Nanga ɔphɛɔ ndɔ bhui, ɛɔphi ndea Mósa tɔ unge asosi. 9 Mpɔ Kiísito â goto otutuisa yɔnga be: «Cɔ, eme yɛ, nebhiki ɔtɔtɔkisa kema nde okondi.» Oa, Mokonga áophuia moangɔ á kala ka bhisa nnde á kɛ̌kɛ. 10 Cɔ, Yéso atɔtɔkisi kema nde Mokonga dákondi. Áobhisa nyama akɛ sasakɛ tɔ mɔngɔ imoci ka phɛa. Ka nyɔngɔ indɔ unge bojede á ka měma asu aimiki.

11 Ande doni gea, ntobei-phɛa bhuakɛ aomamaga esa bhui ka bhɛdanaga ekuma nɛkɛ. A phɔtɔ ophuiaga nkókó á ɔphɛɔ nde nna tanda ɔtɔka íma á bojede. 12 Kiísito dábhisi ndiu nyama akɛ sasakɛ k'ɔphɛɔ mɔngɔ imoci tɔndɔ ka íma á bojede. Mbusa á i, áoika ka njaga á mǔku á Mokonga ka saga na saga. 13 Oa unge aobondea gea te Mokonga áebhisɛ babibia nɛkɛ kusi á ecinji akɛ. 14 Ka sadaka ndɔ tɔndɔ moci, aími bojede k'esa bhui ka bunde ětangi batɔa-bonjánja.

15 Měma á Mokonga phɔtɔ asodigimisii bii ayɔngi phɔ, 16 « Mɔkɔta ayɔngi be: Nnde ande iɔnga nde nɛɔngani na bɔ mbusa á b'esa ndɔ. Nebhisande ɛɔphi nɛmɔ ka měma abɔ na dundua i ka ubhapha abɔ.» 17 Goto: « Kékanisiɛku bojede nɛbɔ na tambɛa nɛbɔ ájede.» 18 Cɔ, kabɛ bojede n'aimiki, sadaka á ima bojede nna ye na kantíti.

Magia á Yéso ande aphe á bhimiisia á Mokonga

19 Cɔ baya! Ka nyɔngɔ á magia á Yéso unge béké na ká ngaka ka ngia k'ɔma á bonjánja phɛ̂. 20 Yɛ asokodei aphe á kɛ̌kɛ á boamia ka nyɛnyɛa bhɔngɔ á gbae á endu á Mokonga. Bhɔngɔ ndɔ ande nyama akɛ sasakɛ. 21 Cɔ, bena ntobei-phɛa angbóngbó mmbe ěmamei batɔa-Mokonga. 22 Ka bondɔ, bémbhiimisiɛni Mokonga na měma á kodoni nnde atumi na beekea, phɔtɔ na nyama nde besokosi u na ibo nde a ánjá. 23 Beambɛni akpɛ nsebeɔ nɛsu nnde bɛɔtɔmiaga mosá á bakpa nga, Mokonga nn'aotinganisa mɔkɔ nɛkɛ. 24 Béenganɛni ka gea te nkpa na nkpa átɔtɔkisɛ ekondi na ekuma ánjá ka dhakɛ. 25 Békedeketɛmbɛ dhondanaga kimoci bíndɔ bakpa buangbo báɛmbani na deketa i. Békpagisanɛgɛni goto phɛ̂ nga, bɔɔni gea esa á ja á Mɔkɔta a ye tɔ bhíbhí.

26 Cɔ, aobá́ na bebeeki sɛkisiaga á bojede mbusa á ubha bhase kodoni, nna ye na phɛa nde abei ka íma á bojede. 27 Kema nde ajigi gǎkɛ a tɔ bondeaga á tena nyɔngɔ akpɛ nnde aobá́ngisa, phɔtɔ na nsa ángbó nde ɛ̌ɛkɛkisagande babibia ndea Mokonga. 28 Bakpa babɛ kabɛ basaɔ aobá́ na bámamei nyɔngɔ á nkpa bhuakɛ mmbe dátingiigi ɛɔphi ndea Mósa, báommoa nkpa ndɔ kanga ngomi. 29 Cɔ, bookanisia bo? Nkpa nde aɔm'bɛnjiaga Muna-Mokonga, kákeni bántambisɛgɛ akpɛ phɛ̂? Nga, yɛ nn'aɔɔna kantíti á magia á iɔnga nde aími bojede nɛkɛ, abhómi phɔtɔ Měma mmbe asoúbhisi bonjánja ékondi ndea Mokonga. 30 Nga, beomuubha mmbe dáyɔngi: « Eme aámbé negisiande, eme aámbé nephendande. » Â goto ɔyɔnga gea: «Mɔkɔta atenande nyɔngɔ ndea bakpa nɛkɛ.» 31 Cɔ, ande ngomi ka nkpa nde Mokonga mɛnɛ á bukpɛkpɛ aotena nyɔngɔ nɛkɛ akpɛ.

32 Kanisiani phɔ kema nde dátɔtɔkɛani ka benu mbenɔ nde dóbotɔi oanga ndea Mokonga. Mbusa á indɔ abhɔa bôotambaga akpɛ phɛ̂, bô gǎkɛ ophiphia u. 33 Bakpa bunɛngbo sɔsɔbɛ anu dábakpangi phɔ bhóma abɔ na tambisaga abɔ mosá á bakpa bunɛngbo sɔsɔbɛ anu bóǒgama bunde dábaotambaga. 34 Nga, dóbǒkui ngomi bunde dábatú ka mɛkakɔ. Bô phɔtɔ obeekea na maseye uta á nkumba nɛnu ka nyɔngɔ nde dóbouúbha gea bona ɛtɔi ánjá phɛ̂ nnde nn'auujukana. 35 Bókódeketɛmbɛ nsebeɔ nɛnu nga, ka nyɔngɔ indɔ unge bɔtɔande ophendɔ ángbó. 36 Cɔ, akeni bóbɛ na moingi mpɔ bɔ́tɔtɔkisɛ kema nde Mokonga akondi ka bondɔ unge botɔande kema nde dánɔɔku. 37 Bádundu subi á buku á Mokonga be: « Ajigi mbenɔ abhɔa phɛ̂ ka gea mmbe aobhika, abhika tɔ, káiphiɛ ku. 38 Nkpa nde ande ntɔa-doni mosá ani, aendande ka nyɔngɔ á beekea. Agǎkɛ oba n'ěcoe, měma ani kábeku na maseye ka yɛ.» 39 Béké bakpa nde beǒcoa ka beekea na gǎ bungaga. Be ndiu bakpa nde bem'beeki Mokonga ka gea te ásoamisɛ ka měma.