Moangɔ á ɔphɛɔ á iɔnga á kala
9
1 Cɔ, iɔnga á mosá dátú phɔtɔ na moangɔ danga-danga á bhebha á Mokonga na ɔma á bonjánja nnde a ka mokonda. 2 Ka bondɔ unge dábacumi endu nde dábaphɛki na Ɛma. Ɔma á ka mosá-mosá á endu ndɔ dábaɔɔphana ɔma á bonjánja. Subi á ɔma ndɔ unge dábabhisi ɔbhɛa, mɛja na mokati á ɔphɛɔ ka Mokonga. 3 Ɔma á ko ibɛ dábaɔɔphana ɔma á bonjánja phɛ̂. Bhɔngɔ á gbae unge dákatisani ɔma ndɔ a ibɛ. 4 Subi á ɔma á ko ibɛ ndɔ unge dátú na miki á mɛja nnde bákombei na ɔlɔ ka toboa ngaɛ á ɔphɛɔ. Dátú phɔtɔ na sandukua á iɔnga nnde dábakombei na ɔlɔ ɔma bhubhui. Subi á sanduku ndɔ dátú na mbeka nde bábɔngisigi na ɔlɔ n'ana Mána subi ib. Dátú phɔtɔ na motumbɔ ndea Alɔ́ni nnde dáphui maya. Dátú na b'ɛtɛ nde Mokonga dádundu ɛɔphi ndeakɛ ka u. 5 Gǔ á sanduku, dátú na iii á baKɛlúbhi ka phangia gea Mokonga mɛnɛ á boombia a oa. BaKɛlúbhi bundɔ imbiɔ á kepupe abɔ dáogbukumia m'bɔmbiɔ á ɔma nde dábaoduka magia ka ima bojede á bakpa. Cɔ, kɛ̌kɛ nde békétɔmiɛku nyɔngɔ kau bhǐbhíbhíc.6 Mbeno nde kema ndɔ bhui dádhondanigi ye, batobei-phɛa ndea Mokonga báongiaga esa bhui k'ɔma á ka mosá-mosá ka bhɛdanaga ekuma nɛbɔ. 7 Cɔ, ntobei-phɛa angbóngbó tɔ aámbé andiu aongia subi á ɔma á ko ibɛ mɔngɔ imoci ka saga moci. Yɛ, nn'aobhika mosá á Mokonga kanga á magia á nyama k'ɔphɛɔ á ka phɔakɛ sasakɛ, phɔtɔ ka phɔa á bojede nde bakpa bági kanga ubha id. 8 Bondɔ unge Měma á Mokonga aphangi gea: Aphe á ngia k'ɔma á bonjánja phɛ̂ káukukanimbɛ mbenɔ nde moangɔ á mosá aphɔ́tɔ bei. 9 Nndɔ ande bea mɛní ka matu nnde. Ande gea te: Sadaka na ɔphɛɔ á banyama nn'aɔtɔka n'atɔtɔkisi bonjánja subi á měma á nkpa nde aobea moangɔ ndɔ. 10 Nndɔ bhui atɔndɔ ka nyɔngɔ á kema á koea, kema á onoa na moangɔ danga-danga á sokosa á bojede á nkpa. Kantíti indɔ dásungiigi ka mbenɔ nde Mokonga dábɔngisigi moangɔ á kɛ̌kɛ.
Kiísito abhisi enda akɛ bea nyama á phɛa
11 Cɔ, Kiísito aámbé akidi ka gea ábɛ ntobei-phɛa angbóngbó á kema ánjá nde aobhika. Angi subi á ɛma ángbó nde ande á bonjánja phɛ̂ kɔnyɛ́nya ndɔ á mosá. Ɛma ndɔ, nna bakpa baunge bábɔngisigi na njaga abɔ. Ande gea te nna kema á ka mokonda nnde bácɔnji. 12 Nna gǎkɛ ka nyɔngɔ á magia á bǔku á mɛmɛ na magia á bamponjo á bǔku á ngɔmbɛ, dábhisi ndiu magia akɛ sasakɛ ka phɛa, mpɔ â tɔ ongia mɔngɔ imoci tɔndɔ k'ɔma á bonjánja phɛ̂, áosókodaga ka bojede nɛsu doni, béoba na boamia á mɛyɔ. 13 Bindɔ asii asosi, báokpanjiaga magia á mɛmɛ na magia á ngɔmbɛ na ebhǔ á mponjo á ngɔmbɛ nkei mmbe bántobu gǔ á bakpa nde bági bojede.e Mpɔ bojede á ka nyama abɔ áotoka. 14 Cɔ, kabɛ nndɔ bhui n'ande doni, ande gea te magia á Kiísito ana bukpɛkpɛ phɛ̂ kɔnyɛ́nya nndɔ bhui. Nga, ka Měma á mɛyɔ, Kiísito dábhisi enda akɛ sasakɛ ka Mokonga bea nyama á phɛa nde nna na kidɔti. Magia akɛ aunge aosokosa ubhapha asu ka toka k'aphe nde aosobotea ka kukua, ka gea bémbhɛdaneɛgɛ Mokonga mmbe aoenda.
Magia á Kiísito aunge aengekisi iɔnga á kɛ̌kɛ
15 Ka nyɔngɔ indɔ unge Kiísito ande mɔɔnganisi á iɔnga á kɛ̌kɛ. Dákú ka tokisa á bakpa ka bojede nde dábaogea u ka mbenɔ á iɔnga á kala. Ka bondɔ, bunde Mokonga ɛ̌ɔphani báɔtɔka na batɔi nkumba nde dɛ̌ɔku nnde káujukanɛeka.
16 Nga, ɔma nde baobá́ á gabhisana á nkumba a bei, aánja boengekisɛ gea nkpa nde adundu baobá́ ndɔ aye n'akuf. 17 Eya, baobá́ á gabhisana á nkumba a tɔ na kantíti ámbé mɛnɛ i aku. Agǎkɛ oba na kakumbɛ, baobá́ ndɔ kábimbɛ na kantíti. 18 Ka bondɔ unge nanga iɔnga á kala dákákpangimbɛ kanga á duukana á magia. 19 Eya! Mósa dátɔ̌mi mosá á bakpa bɔbhu moangɔ danga-danga bíndɔ ɛɔphi asosi, mpɔ áɔbhɛda magia á mponjɔ á ngɔmbɛ na magia á mǔku á mɛmɛ, â phɔtɔ ɔbhɛda ibo. Áɔbhɛda gbutu-gbutu á me nde báɔɔphana isɔpɔ, áoboaga na ngoi ánjɛg, áocadisaga u ka buku nde dádundu ɛɔphi subi i. Â phɔtɔ ǒcadisiaga bakpa. 20 Oa, n'aɔyɔnga be: «Nnde ande magia nde aengekisi iɔnga nde Mokonga dábhisi sɔsɔbɛ akɛ na benu ka gea te bóambɛ u.h» 21 Dági phɔtɔ bó gǔ á ɛma na gǔ á nkumba bhui nde dáɔbhɛdanaga ně k'ekuma á Mokonga. 22 Cɔ, ande bea bíndɔ ɛɔphi asosi gea bojede bhubhui a tɔ otoka ka duukana á magia. Aoba magia na káduukanimbɛ, ande gea bojede kaimikimbɛi.
Kiísito ande ɔphɛɔ ka íma á bojede
23 Cɔ, kabɛ moangɔ ndɔ unge aotokisa bojede á kema nde atɔndɔ iii indɔ á na kobha, akeni gǎkɛ kodoni á kema á na kobha ábɛ na phɛa nde a ánjá phɛ̂ kɔnyɛ́nya indɔ. 24 Cɔ, Kiísito dákángi ɔma á bonjánja nde bakpa báphɛki na njaga abɔ. Nndɔ a tɔ iii á ɔma á bonjánja ndea doni. Angi ndiu doni na kobha, ɔma nde yɛ, kɛ̌kɛ nde a ye mami mosá á Mokonga ka phɔasu. 25 Nga, ntobei-phɛa angbóngbó ndea baYúdha aoga k'ɔma á bonjánja phɛ̂ mɔngɔ imoci ka saga bhui. Aongia na magia á nyama. Cɔ, Kiísito kangi gǎkɛ na kobha ka gea ábhisɛ enda akɛ k'ɔphɛɔ mɔngɔ ásii 26 nga, atuoba n'abó, ámbé dátambigi mongɔ ásii kpanga á cɔnja á mokonda. Cɔ, kɛ̌kɛ nde ka mbenɔ á sungiaga, Kiísito aɔnɛkani tɔ mɔngɔ imoci ka gea áimɛ bojede ka bii yɛ sasakɛ aku bea nyama á phɛa. 27 Bii nkpa bhuakɛ a tɔ okua mongɔ imoci, mbusa á kukua Mokonga áotena nyɔngɔ nɛkɛ, 28 a tɔ bíndɔ Kiísito dábhisi tɔ nyama akɛ mɔngɔ imoci ka íma á bojede á bakpa básiij. Asɛnɛkaeka goto mɔngɔ á ko ibɛ. Sɛnɛka ndɔ, kábɛku ye ka íma á bojede, abande ndiu ka amisa á bunde báom'bondeaga.