Yéso ande ntobei-phɛa angbóngbó á doni
8
1 Cɔ, nyɔngɔ angbó ka nyɔngɔ danga-danga nde bɛyɔngi aungee: Bena ntobei-phɛa angbóngbó mmbe a bíndɔ betoki ka yɔnga i. Yɛ aámbé aiki ye tɔ na kobha ka njaga á mǔku á kankaanga á kɔkɔta á Mokonga mɛnɛ á bukpɛkpɛa. 2 Aɔbhɛdanaga ekuma nɛkɛ subi á ɔma á bonjánjá. Ɔma ndɔ ande Ɛmab á doni nnde Mɔkɔta aámbé acumi, nna bakpa.3 Ntobei-phɛa angbóngbó bhuakɛ, bámbhisi ka phuia sadhaka na ka phuia phɔtɔ ɔphɛɔ. Cɔ, akeni phɔtɔ gea mmbe asu ábɛ na kema nde aphuiande. 4 Dátúoba Kiísito n'aka odo ámbé dákatú tanda ntobei-phɛa nga, ka beana n'ɛɔphi ndea Mósa, ana bakpa nde báophuiaga sadhaka. 5 Bundɔ baobhɛdanaga na báobea mphangiɔ na kaengekɔ á kodoni ndea na kobha. A tɔ bíndɔ Mokonga dánsosi Mósa gea ábhɛdanɛgɛ ka mbenɔ á phɛka á Ɛma. Dángodi be: « Ɔbhɛdanagambɛ tɔ bíndɔ dékophi kaengekɔ i gǔ á mambac.» 6 Kɛ̌kɛ nde gǎkɛ, ekuma ndea Yéso a gǔ inde á batobei-phɛa bunɛngbo nga, yɛ ajukanisi iɔnga nde anyɛ́nyi nndɔ á mosá nnde cina i a ka mɔkɔ ánjá phɛ̂ kɔnyɛ́nya nnde á mosá.
Iɔnga á kala na iɔnga á kɛ̌kɛ
7 Eya, iɔngad á mosá dátú na kisɛki. Ka nyɔngɔ indɔ unge ambe áanganɛ n'inde á ko ibɛ. 8 Mokonga ěphekeigi bakpa nɛkɛ áogea be: «Mɔkɔta ayɔngi be: Ɔnani esa nde aobhika nɛɔnganande na baIsilaɛ́li phɔtɔ na baYúdha n'iɔnga á kɛ̌kɛ. 9 Iɔnga ndɔ kábɛku bíndɔ déɔngani na batatabɔ esa nde dědhungi ka njaga ka tokisa abɔ na Mísii. Mɔkɔta ayɔngi goto gea, ka nyɔngɔ nde dábákátaei iɔnga ndɔ aunge nědeketi gǎkɛ. 10 Cɔ, iɔnga nde nɛɔnganande na baIsilaɛ́li mbusa á esa ndɔ aungee: Nebhisande ɛɔphí nɛmɔ subi á ubhapha abɔ. Nedunduande phɔtɔ u ka měma abɔ. Nebande Mɔkɔta nɛbɔ, na bɔ bábande bakpa nɛmɔ. 11 Nkpa sɔsɔbɛ abɔ kábɛku ye na siki á goisaga dhakɛ, kabɛ muna-amakɛ gea te ambe ómúbhɛ Mɔkɔta nga, bakpa bɔbhu bámúbhande, kpanga ka baniki na sungiaga ka bakpɛga. 12 Neimande bojede nɛbɔ, na kékanisiɛeka ye ka kema nde dábagi ajedee.» 13 Cɔ, bii Mokonga ayɔngi ka nyɔngɔ á iɔnga á kɛ̌kɛ, ande gea te nnde á mosá a ye tɔ á kala. Cɔ kema a ye oba á kala, áɔkpɛga. Ande gea te abhíbhí á kukua.