5
1 Ntobei-phɛa angbóngbó bhuakɛ Mokonga aámbé dánsɔmbu sɔsɔbɛ á bakpa, áombhisa ka bhɛdanaga ekuma nɛkɛ ka phɔa bɔ. Ande gea te ntobei-phɛa ndɔ aámbé aophuia sadaka na toboa phɛa danga-danga ka nyɔngɔ á bojede. 2 Bii yɛ sasakɛ ana bɔɛlu á ka měma, aunge aɔtɔka n'ěkui ngomi bunde báogea bojede kanga á úbha i na ka nyɔngɔ nde bábungigi. 3 Kabondɔ unge akeni ábhɛdanɛgɛ ekuma ndɔ ka phɔa bojede á bakpa bunɛngbo phɔtɔ ka phɔa inɛkɛa. 4 Nna na nkpa nde aɔtɔka n'abhɛdi bokutú ndɔ ka yɛ sasakɛ. Mokonga tɔndɔ aámbé aɔmɔphana nkpa, bíndɔ dámɔphani Alɔ́ni.5 A phɔtɔ bó ka Kiísito. Nna yɛ sasakɛ aámbé débhisii bokutú á ntobei-phɛa angbóngbó. Yɛ, dátɔi ndiu u ka mmbe dáyɔngi ka phɔakɛ gea,
« Obɛ onde miki-mǒko ndeamɔ.
Kesande eme nende abhakɔb.»
6 A phɔtɔ bíndɔ bádundu k'ɔma nɛngbo gea,
« Obɛ onde ntobei-phɛa ka saga na saga bea
nkókó indɔ á Mɛɛkisɛdhɛ́kic.»
7 Mbenɔ nde Yéso dátú ka mokonda, dáon'dengemisaga Mokonga k'ɛmɛmi n'ɛsɔ akpɛ n'aogama nga, Mokonga aámbé dáɔtɔka amisa akɛ ka kukuad. Ka nyɔngɔ á édhidhisa akɛ unge Mokonga dáɔki ɛmɛmi ndɔ. 8 Nanga bii dátú Muna-Mokonga, dágoigi édhidhisa ka tambaga bhui. 9 Kanyɔngɔ nde dákáuki ye ka kema, â ye tɔ oba cina á boamia á mɛyɔ ka bakpa bɔbhu bunde báɔmɔɔka yɛ. 10 Nga, Mokonga dánkumi gea ande ntobei-phɛa angbóngbó bea nkókó indɔ á Mɛɛkisɛdhɛ́ki.
Tetemisani beekea
11 Cɔ, bena nyɔngɔ ásii á yɔnga i. A gǎkɛ akpɛ ka úbhisa anu bhase nga, bo bá dǒ ka digimisa á kema. 12 Kanyɔngɔ nde bo ye nyɛ́nyisi mbenɔ ásii phɛ̂, atokeni bóbɛ baphangigi. Nanga ába bó, bo phɔtɔ na siki á goisaga anu nyɔngɔ abhɔbhɔbhɔa á bɔphɛi ndea Mokonga. Bo phɔ́ goto tɔ na siki á unga, nna ndiu opha anu eea akpɛ 13 nga, nkpa nde aounga a phɔ́tɔ miki. Nna na ubhapha ásii á nyɔngɔ á kodonie. 14 Eea akpɛ andiu tɔ ka bakpa nde bamɔti nga, baɛmbani ye na katisana á kema ánjá na kema ájede.