Baɛbhulanía 6

1 Cɔ, bii a bó, bédeketɛni goisaga mɔ̌ á nyɔngɔ nde dábekpangi goisaga i ka nyɔngɔ á Kiísito. Bétutuisɛni ye tɔ goisaga ka etete á bakpa nde bámɔti. Békécumɛku ye goto goisaga á mɔ̌ á nyɔngɔ ndee: Á kětia tambea ájede na beekea á Mokonga, 2 bɔphɛi ka nyɔngɔ á obatisɔ, ka nyɔngɔ á bhisa á njaga, ka nyɔngɔ á jujuka ka kukua bakpa nde dábáku na nyɔngɔ á tena nyɔngɔ á sungiaga. 3 Nndɔ ungɔ begeande aobá́ Mokonga n'asósosi.

4 Nga, bakpa nde bádeketi tambea nɛbɔ á kɛ̌kɛ goto ka tambea nɛbɔ á kala na bátú ye subi á oanga ndea Mokonga, na bádii ye ka kebu á na kobha na tɔa á Měma á Mokonga, 5 bâ phɔtɔ odiia nyɔngɔ ánjá ndea Mokonga na ɔɔka bukpɛkpɛ á matu nde abhikande, 6 bakpa ndɔ bákátɔkɛku ye goto bákětiɛ tambea abɔ mɔngɔ á ko ibɛ nga, bánkɔkɛigi goto Muna-Mokonga gǔ á me á nkpatɔ na ophá á bakpa bunɛngbo aphɛ á bhóma akɛ.

7 Cɔ, mbenɔ nde odo aondisa ibo á mbua nde aɔɔ́kaga gǔ i na tɛisa á mbo danga-danga ka enga á bakpa nde bágubhi, Mokonga abhisi njaga akɛ gǔ á odo ndɔ. 8 A gǎkɛ oba odo ndɔ n'aɔtɛisa mbo ájede n'inde á ngenge-ngenge, odo ndɔ nna na kantíti, Mokonga a bhíbhí á sɛmɛaga i. Sungiaga á i a tɔ toboa i.

9 Cɔ baya, nanga béyɔnga bó, beengekisi ka měma asu gea aphe á boamia a ka měma nndɔ bo ka u ande aphe ánjá. 10 Mokonga nna na měma akpɛ. Káboseɛku ekuma nɛnu na ekondi nɛnu ka phɔakɛ nga, dóbobhɛdanigi na bii bɔ phɔtɔ ɔɔbhɛdaneaga babeeki bunɛngbo. 11 Cɔ, mɔphɛ asu ande gea te nkpa bhuakɛ sɔsɔbɛ anu átetemisɛ ekuma na ka sungiaga, ka gea te nsebeɔ nɛnu atɔtɔkɛanɛ. 12 Bii a bó, bókobɛmbɛ bakusi. Beani ndiu nyɔngɔ á bakpa nde bátetemisi beekea nga, bundɔ baunge bátɔande botiko á mɔkɔ nde Mokonga dáɔku.

Mokonga nn'aokětia mɔkɔ nɛkɛ

13 Cɔ, mbenɔ nde Mokonga dábhisi mɔkɔ ka Abhalaámu, dáɔphí tɔ ka ina akɛ sasakɛ nga, Mokonga dákátú na nkpa angbóngbó kɔnyɛ́nya yɛ ka ɔphá k'ina akɛ. 14 Mokonga áɔyɔnga be, « Eya, ka bhisa njaga, nekobhisiande njaga. K'ɛbɔkɔti, nebikisande ɛbɔkɔti nɛkɔ. » 15 Bii Abhalaámu dábhisi měma akɛ ka mɔkɔ ndɔ kanga ɛla, mɔkɔ nde Mokonga dáɔku ka phɔakɛ áɔtɔtɔkɛana ka yɛ. 16 Mbenɔ nde bakpa báɔɔpha, báɔɔpha k'ina á nkpa nde a angbóngbó. Ɔphá aunge a gǎkɛ ojusa ɔngana bhui ka sungiaga i. 17 Mokonga dáyami ɔphá gǔ á mɔkɔ ka ubhisa bakpa nde bátɔande botiko á mɔkɔ gea, Mokonga ka kětiɛeka tanda moangɔ nde abhisi ka phɔa nkpa. 18 Cɔ, Mokonga aɔɔkɔa na ɔphá, ande gea te nyɔngɔ ibɛ ndɔ a tɔ doni, kátinganɛku. Nga, Mokonga kátɔkɛkú n'asodhemi. Ka nyɔngɔ indɔ unge bena bukpɛkpɛ á ka měma. Cɔ, besu ibunde betí bedhungi ye tɔ nsebeɔ nde a mosá asu. 19 Nsebeɔ ndɔ ande nkigisiɔ á měma asu. U, ěsimbii phɛ̂, áongia subi á endu ndea Mokonga, áɔtɔngana ngɔmbɛ nde adaki kǐo á ɔma á Mokonga . 20 Oa ndɔ unge Yéso dángí mosá asu ka phɔa asu nga, a ye ntobei-phɛa angbóngbó á kanga sungiaga bea nkókó indɔ á Mɛɛkisɛdhɛ́ki.