Muumbiɔ nde Mokonga dáɔku
4
1 Mokonga dásɔɔku besu gea asophande aphe á ngia ka muumbiɔ nɛkɛ. Cɔ bɛɛnjiɛni bonjánja kabɛmbɛ na ka bɛsu moci mmbe aukande aphe angia ka u 2 nga, dɛbɛɔki tɔ nyɔngɔ ánjá bea bundɔ dábatú ka nkanda. Bɔ dábaɔki u, kěengɛ tanda ka kema moci, ka nyɔngɔ nde dábákábeekeani na bunde dábaɔki nyɔngɔ ndɔ. 3 Besu ibunde bebeeki baunge beongia ka muumbiɔ ndɔ bíndɔ Mokonga dáyɔngi te,« Ka bondɔ, dɛɔphí ka bei ndeamɔ gea,
‹ Bákángiɛku tanda ka nji nde dɛ́ɛ̌bɔngisii ka umbia ka u!a › »
Nndɔ nna gea te muumbiɔ nn'a ye bei. Nga, Mokonga dágɔbi tɔ ekuma nɛkɛ ka mbenɔ á conja á mokonda. 4 Cɔ, buku á Mokonga ayɔngi ɔma imoci ka nyɔngɔ á esa á ko ngia njaga ibɛ (7) be: « Mpɔ Mokonga áoúmbia k'esa á ko ngia njaga ibɛ (7), áosaga ekuma ndeakɛ bhuib.» 5 Ayɔngi goto tɔ k'ɔma ndɔ be: « Béɔnɛni phɔ́ ambe bángiande ka muumbiɔ ndeamɔ! » 6 Bii bakpa nde dábaɔki nyɔngɔ ánjá ka mosá-mosá dábakángí ka nyɔngɔ á kanga beekea nɛbɔ. Cɔ ka bondɔ, bakpa bunɛngbo bá ye tɔ n'aphe á ngia ka muumbiɔ ndɔ. 7 Ka bondɔ unge Mokonga abhisi goto esa moci. Esa ka yɛ báɔmɔphana « Kesande. » Bindɔ Mokonga dán'yɔngisi Daúdhi mbusa á basaga básii nyɔngɔ nde dádundu gea,
« Kesande kabɛ na bɔɔkí ɛsɔ á Mokonga,
bókókpagisɛmbɛ měma anuc. »
8 Cɔ, kabɛ Yosúa na déěngisi bakpa ndɔ ka muumbiɔd, ámbé mbusa á yɛ, Mokonga dákáyɔngi ye esa nɛngbo. 9 Ande gea te, muumbiɔ bíndɔ á sabatɔ ajigi tɔ ka bakpa ndea Mokonga. 10 Nga, nkpa a ye ongia ka muumbiɔ ndeakɛ, aúmbi k'ekuma ndeakɛ bíndɔ Mokonga dáúmbi phɔtɔk'ekuma indeakɛ. 11 Ka nyɔngɔ indɔ unge, ambe bégeɛ bukpɛkpɛ asu bhui ka ngia ka muumbiɔ ndɔ. Ka besu moci kaguɛmbɛ bea bunde á mosá nga, dábatú na měma akpɛ.
12 Úbhani gea, nyɔngɔ á Mokonga ana bukpɛkpɛ, a phɔtɔ ɔtɔka tɔtɔkisa kema ásii. Aophea phɛ̂ bea ngɔa nde aophea nci gbɔ́gbɔ. Aongia na tɔngana subi á měma asu phɛ̂, áogaojua ka ɔngɔkanaga na mɛngɛ, áobhisa u bhase. Aotena nyɔngɔ á mɔphɛ na kanisia nde a ka měma á nkpa. 13 Nna na ka kema nde Mokonga dáconji nnde ɛ̌sɔmɛani k'isɔ akɛ. Kema bhubhui a tɔ ndumbu mosá akɛ. Aoúbha u. Yɛ goto tɔ aámbé bɛtɔmiande nyɔngɔ ndeasu bhubhui mosá akɛ.
Yéso ande ntobei-phɛa angbóngbó phɛ̂ ka phɔasu
14 Cɔ, bii bena ntobei-phɛa angbóngbó phɛ̂ mmbe dátɔngani na kobha n'ande Yéso Muna-Mokonga, bétetemisɛni beekea nde bɛɔtɔmiaga mosá á bakpa 15 nga, ntobei-phɛa angbóngbó mmbe bena yɛ, yɛ aɔtɔka n'asokui ngomi ka tambaga na bɔɛlu nɛsu á ka měma. Cɔ, yɛ dángí ka tombaga ka kema bhui bea besu, kanga yɛ gea ndiu bojede. 16 Bii a bó, bébhikeni mosá á kankaanga á bonjánja á Mokonga kanga ngaka nga, kó unge bɛtɔande ngomi na bonjánja á ekondi, nnde asoengande ka mbenɔ nde bena siki i.