Kɔkɔta ndea Yéso anyɛ́nyi nnde á Mósa
3
1 Badhasu batɔa-Mokonga bii a bó, be tɔ na benu ka mɔphani nde Mokonga asɔɔphani. Cɔ ntumiani Yéso n'isɔ nga, yɛ aámbé Mokonga anteki, a phɔtɔ ntobei-phɛa angbóngbó mosá á Mokonga ka beekea nɛsu nde beɔtɔmiaga u. 2 Yéso dábhɛdanigi na kodoni ekuma nde Mokonga dámbhisi ka u, phɔtɔ bíndɔ Mósa dábhɛdanigi sɔsɔbɛ á batɔa k'endu ndea Mokongaa. 3 Mphɛki-endu ana bokutú kɔnyɛ́nya bokutú á endu. Yéso akeni gǎkɛ na boombia phɛ̂ kɔnyɛ́nya nnde á Mósa. 4 Eya, endu bhubhui, nkpa tɔndɔ aámbé aɔphɛ̌ka. Mokonga a gǎkɛ aámbé aphɛki kema bhubhui. 5 Cɔ, Mósa dátu na kodoni bea mbhɛdanigi k'endu ndea Mokonga na ka tɔ̌miaga á kema nde Mokonga dákeni áyɔngɛ. 6 Kiísito aámbé andiu ntɔa-doni bea ánge k'endu ndea abhakɛ. Ande gea te endu ndɔ ande besu, kabɛ na bena inyamɛ na beoamba nsebeɔ nde beǒbhebha ně.Muumbiɔ ndea babeeki ka Mokonga
7 Ka nyɔngɔ nde a tɔ bíndɔ Měma á Mokonga ayɔngi,
« Kesande kabɛ na bɔɔki ɛsɔ á Mokonga,
8 bókókpagisɛmbɛ měma anu bea mbenɔ ndɔ dóbom'bɛisi Mokonga
k'esa á tombaga ka nkanda.»
9 Nga, kó Mokonga ayɔngi,
« Batatanu dábamotombigi ka ubha á kanisia á subi ani,
Ka nyɔngɔ indɔ unge dɛ́bɛi ka phɔa bakpa ndɔ
néogea, ‹ Kanisia á ka měma abɔ aǒbungisaga esa bhui.
Dába yé gǎkɛ bea aphe ndeamɔ. ›
11 Ka bondɔ, dɛɔphí ka bɛi ndeamɔ gea,
‹ Bákángiɛku tanda ka nji nde dɛ́ɛ̌bɔngisii ka umbia ka ub. › »
12 Baya, ɛngɛphani! Ka benu moci kabɛmbɛ na měma ájede á kanga beekea, nnde aonkatanisa na Mokonga ímbe aoenda. 13 Kpagisanagani ndiu ka měma esa bhui, ka mbenɔ nde « Kesande » a phɔ́tɔ bei bea bii buku á Mokonga ayɔngi ka gea ka benu moci bojede kan'dakɛmbɛ měma na dhemaga akɛ. 14 Nga, be tɔ oba kimoci na Kiísito ámbé beambi akpɛ beekea nde débekpangi ně na ka bii begande ojua ka sungiaga.
15 Nga, bádundu subi á buku be,
« Kesande, kabɛ na bɔɔki ɛsɔ á Mokonga
bókókpagisɛmbɛ měma anu bea mbenɔ ndɔ dóbom'bɛisi Mokongac.»
16 Cɔ, baani bunde dábaɔki ɛsɔ á Mokonga mbusa i báɔm'bɛisa? A tɔ bunde Mósa dětokisi bɔbhu na nji á Mísii. 17 Baani bunde Mokonga dɛ́bɛ̌i ka basaga nkama gena (40)? Dɛ́bɛ̌i tɔ bakpa nde dábagi bojede, mǒnda abɔ áogua ka nkanda. 18 Baani bunde Mokonga dáɔphí ka phɔabɔ gea bákángiɛku ka nji nde Mokonga dɛ́ɛ̌bɔngisii ka umbia ka u? Nna phɔ́ tɔ badaki kecuɛ ndɔd? 19 Bɛɔni gea dábákatɔki ngia ka nyɔngɔ nde dábakabeeki.