Bɛ́kɛbɛnjiɛgɛmbɛ mbino nde Muna-Mokonga abhiki ně
2
1 Bii a bó, akeni bétetemisɛ phɛ̂ nyɔngɔ nde bɛɔki, ka gea békebungɛgɛmbɛ. 2 Ande doni gea nyɔngɔ nde bamalaeka dábatɔ̌mia atɔtɔkɛani, n'angɔni gǎkɛ nkpa bhuakɛ mmbe dátingiigi u na kanga amba i, egoni ndɔ ankeni ně. 3 Cɔ, beukande tena á nyɔngɔ ndeasu akpɛ bo, kabɛ na bɛbɛnjigi nyɔngɔ ángbó á boamia nde? Nga, nyɔngɔ ndɔ Mɔkɔta aámbé dákpangi tɔ̌mia i, mpɔ bunde dábaɔki báodigimisa ka besu. 4 Mokonga â gǎkɛ odigimisa nyɔngɔ nde dábatɔ̌mi, ka tɔtɔkisa á mphangiɔ na ketangaɔ danga-dangab phɔtɔ bii agabhi Měma á Mokonga bíndɔ dákondi.Yéso dábhɛdi nyama á kokpa ka nyɔngɔ asu
5 Nga nna bamalaeka báunge Mokonga děophi kɔkɔta á mokonda ndɔ aobhika nnde bɛɔyɔnga ka phɔa i. 6 Nkpa moci adigimisi ndiu subi á buku á Mokonga be,
« O Mokonga! Bakpac bande kema sina?
Bana bakpad bande baani ka mɔphɛ akɔ tuma ka bɔ?
7 Ka mbenɔ ábhɔa, dóndhidhisi kusi á bamalaeka,
ômopha boombia na bokutú.
8 Ôbhisa kema bhui kusi á ecinji akɛ.e »
Cɔ, bii Mokonga dábhisi kema bhui kusi akɛ, ande gea te nna ye na ka kema nde yɛ kábhisi kusi akɛ. Eya, ka kɛ̌kɛ nde békeɔnimbɛ phɔ ka gea Mokonga abhisi kema bhui kusi á kɔkɔta á bakpa. 9 Cɔ bɛɔni ndiu gea, mmbe dábandhidhisi ka mbenɔ ábhɔa kusi á bamalaeka ande Yéso. Ka nyɔngɔ á tambaga na kukua akɛ, Mokonga amophi kɛ̌kɛ nde boombia na bokutú. Ka bondɔ unge ka nyɔngɔ á bonjánja ékondi ndea Mokonga, Yéso dákú ka phɔa bakpa bɔbhu.
10 Mokonga dáconji kema bhui ka phɔa akɛ nak'aphe nɛkɛ. Dági bo ka bǒtea á baniki básii ka boombia nɛkɛ. Ka tɔtɔkisa nndɔ, dákeni ám'bɔngisɛgɛ Yéso ánjá phɛ̂ k'aphe á tambaga akɛ, ka gea te yɛ aámbé ábhómɛ aphe á boamia á ka měma. 11 Nga, Yéso mmbe aosokosa bojede á ka měma á bakpa na bunde Yéso ěsokosi bojede, bɔbhu bá tɔ na nyama á kokpa. Ka nyɔngɔ indɔ unge Yéso nna okua na soni á ɔphana abɔ bana-ayi. 12 Ka nyɔngɔ indɔ unge dángodi Mokonga,
« Nɛtɔmiande ina akɔ ka bana-ayi,
nekobhebhande ka nkindi abɔf.»
13 Ayɔngi goto,
« Nebhisande měma ani ka Mokonga. »
Ayɔngi goto,
« Eme ambe!Ɔ́mɔɔnani na baniki nde Mokonga dámopig.»
14 Cɔ, bii baniki ndɔ bɔbhu básambí magia na kesuku, yɛ Yéso â phɔtɔ okengeana na bɔ, ka gea te, ka nyɔngɔ á kukua akɛ aunge agɔbi bukpɛkpɛ á nketi mmbe dána kɔkɔta gǔ á kukua. 15 Â phɔtɔ ǒphuia ka kɔkɔbɛ bakpa nde dábana kɔbɔbɔkɔ á kukua ka enda abɔ bhui. 16 Nga, kábhiki tanda ka enga á bamalaeka, abhiki ndiu ka enga ɛbɔkɔti ndea Abhalaámuh. 17 Ka nyɔngɔ indɔ dákeni kengeana na bamunamakɛ ka kema bhubhui, ka gea te ábɛ ntobei-phɛa angbóngbó mosá á Mokonga ka ima bojede ndea bakpai. Ntobei phɛa ndɔ ande ntɔa-ngomi n'akeni mamɛa asu mosá á Mokonga. 18 Ka nyɔngɔ indɔ, bii yɛ sasakɛ dátambigi na ngia ka tombaga, aunge ana bukpɛkpɛ á enga bunde bá subi á tombaga.