Baobá́ ka baƐbhulanía
Mokonga dáyɔngi k'aphe ndea miki ndeakɛ.
1
1 Ka mbenɔ á kala, Mokonga dáyɔngi na batatasu mɔngɔ ásii na k'etete danga-danga, k'aphe á baɔtu-yɔngɔ. 2 Cɔ, ka b'esa nde á sungiaga, dáyɔngi gǎkɛ na besu k'aphe ndea miki-mǒko ndeakɛ. Miki ndɔ aámbé yɛ dámbhisi mɛnɛ á botiko á kema bhubhui, na k'aphe á miki ndɔ unge Mokonga dáconji mokonda bhuia. 3 Bonjánja á boombia á Mokonga áophenuaga n'atoki ka yɛ. Miki ndɔ ankengi tɔ Mokonga ka kema bhubhui. Yɛ, asuki mokonda na bukpɛkpɛ á nyɔngɔ ndeakɛ. Mbusa á yɛ sokosa bojede á ka měma á bakpa, â ye tɔ koika na kobha ka njaga á mǔku á Mokongab Mɛnɛ á bukpɛkpɛ.Kɔkɔta á Muna-Mokonga anyɛ́nyi nnde á bamalaeka
4 Cɔ, kɔkɔta ndea miki ndɔ anyɛ́nyi nnde á bamalaeka, bíndɔ Mokonga dámophi ina á boombia kɔnyɛ́nya ina nde bamalaeka bá ně. 5 Nga, nna na ka bamalaeka nde Mokonga angodimbɛ mɔnɔ gea,
« Obɛ onde miki-mǒko ndeamɔ.
Kesande eme nende abhakɔc.»
Goto kángodimbɛ mɔnɔ tanda ka bamalaeka,
« Nebande ka yɛ abhakɛ
na abande k'eme miki-mǒkod.»
6 Bii Mokonga dámbhikisi miki nɛkɛ ánge ka mokonda, â ndiu ɔyɔnga gea,
« Bamalaeka ndea Mokonga bɔbhu bágbukɛ muanku mosá akɛ.»
7 Ka phɔa bamalaeka, Mokonga ayɔngi be,
« Něbhisi bamalaeka ndeamɔ bea maphopho,
néǒbhisa babhɛdanigi nɛmɔ bea ɛɛmbɛ á nsa.e»
8 Ka phɔa miki ndeakɛ Mokonga áɔyɔnga ndiu gea,
« O Mokonga! Kankaanga á koboamɛ ndeakɔ abande ka saga na saga.
Ɔbhɛdanagande na motumbɔ á koboamɛ ndeakɔ ka kodoni.
9 Nga, okondi bonjánja, ôkangea bojede.
Ka nyɔngɔ indɔ unge Mokonga, Mokonga ndeakɔ aɔsɔmbu,
áokosia gamba á jaí ka mɔ̌.
Dákodokomisi ndiu ka sɔmbɔa akɔ ka nkindi á badhakɔf.»
10 Mokonga dáyɔngi phɔtɔ,
« Ka nkpangeɔ, Mɔkɔta obɛ aámbé dóconji odo,
ego ande ekuma á ka njaga akɔ.
11 Mokonda na kobha kábɛku ye.
Bhubhui anyɔɔkanagande bea ngɔmbɛ.
Cɔ ɔbɛ, oikande mɛyɔ.
12 Oikitagande u bea ngɔmbɛ,
â phɔtɔ koangana.
Ɔbɛ kooketiɛku, basaga nɛkɔ bákásungiɛgɛekag.»
13 Mokonga kángodimbɛ mɔnɔ tanda ka bamalaeka ndeakɛ,
« Ika ka njaga ani á mǔku,
na kabii něbhisande babibia ndeakɔ
kusi á ecinji akɔ.h »
14 Cɔ, bamalaeka bande baani? Bɔbhu bá tɔ ɔmbhɛdaneaga Mokonga. Yɛ aǒteka ka enga bakpa nde bátɔande boamia á ka měma.