Timɔtɛ́ɔ A Ko Ibɛ 4

1 Cɔ, Timɔtɛ́ɔ, nekosǒsi bhase mosá á Mokonga na Kiísito Yéso, mmbé atenaeka nyɔngɔ ndea bakpa nde báku na bunde báoenda, ka sɛnɛka akɛ ka koboamɛ nɛkɛ: 2 phɛa á Nyɔngɔ á Mokonga na bukpɛkpɛ, kabɛ mbenɔ anja, kabɛ mbenɔ ajede. Kea á bojede bhase, imisia, bá na měma á phiphia ka mɔtisaga á měma á bakpa esa bhui nde ɔɔphɛa. 3 Kanyɔnde, mbenɔ abhikande, nnde bakpa báyande bɔphɛi á doni, bâ ndiu mɔphɛ nɛbɔ sasabɔ. Békabande baphangigi básii bunde bétimbande ka phɛa abɔ nyɔngɔ nde bɔ báokonda ɔka i. 4 Bákabeekeɛku ɔka á bɔphɛi á doni ka kecue ábɔ, béphaiande ndiu ka ɔka egani á mbɛa. 5 Obɛ gǎkɛ, óamba ka kema bhui, óphiphiɛ tambaga, bhɛdanaga ekuma á tɔ̌mia á Mbino Anja. Tɔtɔkisa ekuma nɛkɔ anja.

6 Cɔ, k'eme, ne ye bhisi enda ani ka phɛa, ande gea te, kukua ani a ye tɔ bhibhi. 7 Nemǎni emani ánjá, neju ka sungiaga á njoko, neambi beekea nɛmɔ.

8 Kpangá á Kɛ̌kɛnde, bámobhisii kekombó á kodoni, nnde Mɔkɔta mmbé ande nteni nyɔngɔ á doni amopande esa nde abhiande goto. Nna tɔndɔ eme, a ndiu phɔtɔ ka bakpa bhɔbhu íbunde bákondi ɔna akɛ esa nde asɛnɛkande.

Nyɔngɔ danga-danga á sungia a baoba

9 Cɔ, gea á bkpɛkpɛ ka dhonda ani mbangɔ, 10 nga, Dhɛmá amosagi ka yɔngɔ nde, akondi kema á ka mokonda ndee. Yɛ, age na Tɛsalɔníka. Kɛɛ́skɛ age nɛkɛ na Gaatía na Títɔ áoga nɛkɛ na Dhaamatía. 11 Cɔ, Lóka sasakɛ áambé a tɔ n'eme. Mbhika na Malíkɔ nga, amoengande k'ekuma nɛmɔ. 12 Dénteki Tukíkɔ na Ɛphɛ́sɔ. 13 Ka bhika akɔ, óbhika k'ani na bhɔngɔ á k'egogo, nnde dédu ka Tɔɔ́a, mɔtɛ á Kaápɔ. Óbhikambɛ phɔtɔ kani na buku asa phɔ nndɔ á nkeke.

14 Ntombe Alɛsandúɔ dámogii ajede phɛ̂. Mɔkɔta amphendande ka beana n'inde dágǐ. 15 Obɛ phɔtɔ, óengambɛ na yɛ nga, aye bɔphɛi nɛsu phɛ̂.

16 Mbenɔ nde détúɔɔyɔngɛa sasani k'ama mosá-mosá ka ntua á tena á nyɔngɔ, nna tanda na nkpa dákámoengi. Bakpa bɔbhu dábamodu ndiu. Cɔ, Mokonga k'ětangeɛmbɛ bojede nɛbɔ! 17 Mɔkɔta ndiu aámbe dámoengi na áomopa bukpɛkpɛ kagea te, nɛtɔ̌miɛ Mbino Anja nɛkɛ phɛ̂ ka gea bakpa nde bána baYúdha báɔkɛ. Yɛ dámoamisi k'aphɛnɔkɔ á nyama bea mabhianga. 18 Amotokisande ka bojede bhui, á babibia ani. Amoamisande ka bojede bhui, áomoenga ka ngisa ani ka koboamɛ nɛkɛ na kobha. Cɔ, obhebhɔ ábɛ ka yɛ ka saga na saga.

Mɔkɔ

19 Ósesea k'ani Piisíla, Akíla, n'ekombo ndea Ɔnɛsiphɔ́ɔ. 20 Ɛlasítɔ dájigi na Kɔlítɔ. Dénsagi Tɔɔphímɔ na Milɛ́tɔ n'aosamba. 21 Ókakamisa ka bhika mosá á bɛjɔ. Ɛubhúlɔ, Púdhɛ, Línɔ, Klɔdhíɔ, na badhasu bɔbhu, bákosesi. 22 Cɔ, Mɔkɔta ábɛ n'obɛ. Bonjánja ékondi nɛkɛ ábɛ na benu.