22
1 « Cɔ, badhani na babhɛ, ɔkani phɔ boabhi nɛmɔ ka phɔani. » 2 Bii báɔki n'aɔyɔnga na bɔ ka kiƐbhulanía, báodhakana phio! Mpɔ, Pɔ́lɔ áɔyɔnga gea, 3 « Eme, nende moYúdha, nɛbɔkɔtɛani ka Táasɔ, kenombe moci á Kilikía. Nɛmɔti gǎkɛ ka kenombe nde Yɛusalɛ́ma. Ka njaga á Gamaliɛ́li aunge negoigi amba á ɛɔphi ndea batatasu bhiibhibhi, néoba ntɔa-moingi ka Mokonga bea benu bɔbhu k'esa nde. 4 Déǒtambisaga bundɔ dábáobea aphe ndea Yéso na bii dábaokua. Déǒdhunga bǒko, phɔtɔ na bake, néǒboaga na makea á bɔ ka mekakɔ. 5 Ntobei-phɛa angbóngbó na bagbɛga bɔbhu á ka ntua báɔnɛi phɔtɔ mamea gea, nɛɔyɔnga doni. Nga, bɔ baunge dábamopi baobá́ ndea badhasu baYúdha bundɔ á ka Dhamasíki gea, nédhungɛ babeeki ndɔ, nébhikɛ na bɔ ka Yɛusalɛ́ma k'aphe á binda abɔ. »Pɔ́lɔ aɔtɔmiaga aphe nde dám'beeki ně Yéso
6 « Na ne phɔ́tɔ k'aphe, néobhiimisia Dhamasíki. Ka kantende, mɔngɔ moci, oanga angbó dátoki na kobha, jegia i áomotimba. 7 Néogua ka odo, nɛ́ɔɔka ɛsɔ n'aomogea te, ‹ Saúlɔ, Saúlɔ! Nyɔngɔ sina nde oomotambisaga kau? › 8 Néomúsia te, ‹ Mɔkɔta, onde ani? ›
Áomosikisia te, ‹ Nende Yéso ba Najalɛ́ti mmbɔ oontambisaga. › 9 Cɔ, bakpa nde détú na bɔ dábáɔni oanga ndɔ, bákaɔkɛ ndiu ɛsɔ á nkpa nde dáɔyɔnga n'eme. 10 Mpɔ néoúsia gea te, ‹ Mɔkɔta, négeɛ bo? › Mɔkɔta áomosikisia te: « Má, ógɛ na Dhamasíki. Kó unge bákongodeagande kema bhui nde akeni ógeɛ u. » 11 Cɔ, bii déketúkɔɔnapha ka nyɔngɔ á bhɛnya á oanga ndɔ, badhani báomodhunga ka njaga, báomoga ně na Dhamasíki.
12 « Cɔ, nkpa moci dátú kó, ina akɛ Ananía. Yɛ, dátú m'bangi-Mokonga na dátuoamba ɛɔphi ndea Mósa phɛ̂. BaYúdha bɔbhu bunde dábaiki ka Dhamasíki dábaombhebha phɛ̂. 13 Áomobhikia, áoika ka mpɛphɛ ani, áomongodea te, ‹ Moko Saúlɔ, ɔnapha goto. › Kɛ̌kɛ ndɔ tɔ, nɛ̌ goto ɔɔnapha na ɔna akɛ. 14 Yɛ áomongodea te, ‹ Mokonga ndea batatasu dákɔsɔmbu gea, óúbhɛ kema nde akondi na ɔna á Ntɔa-doni, na ɔ́ɔkɛ ɛsɔ akɛ sasakɛ. 15 Nga, obande mamei nɛkɛ mosá á bakpa bɔbhu, ka tɔ̌mia á kema nde ɔɔni, n'inde ɔɔki. 16 Cɔ kɛ̌kɛ nde, kema sina nde oobondea? Má, báobatisɛ, ɔ́mɛmɛ Mokonga ka gea te áimɛ bojede nɛkɔ. › »
Pɔ́lɔ aɔtɔmɛaga bii Mokonga dánteki ka bakpa nde báná baYúdha
17 « Esa moci mbusa á ja ani na Yɛusalɛ́ma, dɛ́ɔmɛma Mokonga subi á endu á Mokonga. Oa, nɛ́ɔɔna mphaniɔ. 18 Ka mphaniɔ ndɔ, nɛ́ɔmɔ̌na Mɔkɔta, áomongodea be, ‹ Cɔ, Kamisaga! Toka ka Yɛusalɛ́ma kɛ̌kɛ nde nga, batɔa ka nji nde bákábeekeɛku nyɔngɔ nɛkɔ nnde ɔyɔngande oani ka phɔa ani. › 19 Nê gǎkɛ ɔyɔnga te, ‹ Mɔkɔta, báoúbha gea, déogaga k'endu á bɔphɛi ndea baYúdha moci-moci, ka makisa á babeeki nɛkɔ ka mekakɔ na bindisa á bɔ. 20 Mbenɔ nde dábamoe Sɛtɛphánɔ mmbe dátú mamei nɛkɔ, eme détú bei. Débeeki kukua akɛ, néoamba bhɔngɔ ndea bundɔ dábaommoa. › 21 Mpɔ Mɔkɔta áomogea, ‹ Gǎ tɔ nga, eme, nekotekande danga ka bakpa nde báná baYúdha. ›»
Pɔ́lɔ aɔyɔngaga na mɔkɔta á batɔa-emani á baLɔma
22 Bakpa báɔɔka nyɔngɔ nde Pɔ́lɔ dáɔyɔnga na kabii dáge ɔyɔnga nyɔngɔ á batɔa k'ekuna nɛngbo, mpɔ báokoga n'ɛsɔ akpɛ gea: «Nimani mogaa ndɔ, kákeni áendɛ ka mokonda ndee. » 23 Báokoga akpɛ phɛ̂, báomakaga bhɔngɔ nɛbɔ, báotitiaga mpusu á odo ka mpɛna. 24 Mɔkɔta á batɔa-emani áososea gea, bángisɛ Pɔ́lɔ subi á bogaɔ á batɔa-emani, bám'bindɛ, ka gea Pɔ́lɔ áubhisɛ bhase cina á kema nde bakpa báonkogea kau. 25 Cɔ, bii dábaom'boaga na ngoi, Pɔ́lɔ â gǎkɛ ongodea mɔkɔta á batɔa-emani mmbɔ dátú oa gea: « Aoba nkpa n'ande moLɔ́ma, ona kɔkɔta á binda akɛ na bákátenimbɛ nyɔngɔ nɛkɛ? » 26 Bii mɔkɔta á batɔa-emani ndɔ aɔki ye bo, áoga ɔntɔmia mɔkɔta nɛkɛ, áongea te: «Nkpa nde ande moLɔ́ma! Cɔ, ogea ógeɛ bo? » 27 Mɔkɔta áɔnsɛkɛdɛa Pɔ́lɔ, áomúsia te: « Ómongodea phɔ́, onde moLɔ́ma? » Aonsikisia: « Eya! » 28 Mɔkɔta áongea te: « Eme déphendi bangɔa ásii phɛ̂ gea, nébɛ moLɔ́ma. » Pɔ́lɔ áonsikisia te: « Eme nende nɛmɔ moLɔ́ma á bɔkɔtɛana. » 29 Kɛ̌kɛ ndɔ, bunde dábatú ogea bám'bindɛ Pɔ́lɔ báǒjujia. Mɔkɔta â phɔtɔ obanga nga, dásosi bám'boegɛ Pɔ́lɔ n'ande moLɔ́ma.
Pɔ́lɔ a mosá á ntua ángbó ndea baYúdha
30 Mama i, mɔkɔta á batɔa-emani ndea Lɔ́ma dákondi digimisa á nyɔngɔ sina nde baYúdha bántɔngɛi Pɔ́lɔ. Ka bondɔ, áonkodisisa Pɔ́lɔ ngoi, áǒsosea batobei-phɛa bangbóngbó na bateni-nyɔngɔ bɔbhu ndea baYúdha gea, bádhondanɛ. Mpɔ, áombhika na Pɔ́lɔ, áombhisa mosá abɔ.