Yakɔ́bɔ abhisi njaga akɛ gǔ á baniki-bǒko nɛkɛ
49
1 Yakɔ́bɔ áɔ̌bɔphana baniki-bǒko nɛkɛ, áǒngodea:« Dhondanagani, neogea nénongodeɛ
kema nde anódhondaeka ka mbenɔ nde aobhika.
2 Dhondanagani, ɔ́kani bana Yakɔ́bɔ,
mɔ̌kani Isilaɛ́li abhanu.
3 Obɛ Lubhɛ́ni, onde ange nɛmɔ,
mbo á mosa-mosa á bukpɛkpɛ á koganda nɛmɔ.
Ɔ̌nyɛnyi badhakɔ ka kokpa na bukpɛkpɛ.
4 O bea ibo á tuma.
Kɔnyɛnyɛku ye badhakɔ.
Nga, dǒkambi k'eka ndea abhakɔ,
ôdhondana na ka bake nɛmɔ kau, eme abhakɔ.
5 Simɛɔ́ni na Láoui, bande batɔa k'omunaměma.
Ɔkana ndeabɔ ande bea ngɔa á tambisaga na bakpa phɛ̂.
6 Kéodhadokeana n'abɔ ka nyɔngɔ ajede nɛbɔ,
kéodhondana n'abɔ ka madhondanɔ nɛbɔ.
Nga, k'esuia nɛbɔ, dáběmoe bakpa,
ka yomba nɛbɔ, dábatenigi nsisa-nsisa á bǔku á bangɔmbɛ.
7 Nɛsɛmɛigi esuia nɛbɔ. Nga, ǎkae phɛ̂.
Bɛi nɛbɔ nna na ngomi.
Něgabhagande ka nji ndea Yakɔ́bɔ,
na něphanjande k'ekombo ndea Isilaɛ́li.
8 Cɔ, ɔbɛ Yúdha, bamunamakɔ bákobhebhande.
Nga, ǒpimbiande ba bibia ndeakɔ.
Bamunamakɔ bágbukande mɔ̌ abɔ mosa akɔ.
9 Miki-mǒko nɛmɔ Yúdha,
o bea mponjɔ á simba mmbe dángoe nyama nɛkɛ,
áosikianaga k'ɔma á boiki nɛkɛ.
Simba ímbe nkei, kabɛ nande mǔkui n'ade,
animbe aɔtɔka n'anjujukisi?
10 Motumbɔ á koboamɛ kátokɛku k'ekombo ndea Yúdha.
Gbutu á kɔkɔta aba tɔ ka njaga akɛ,
na ka bii abhikaeka mmbé batɔa ka mokonda
bábeekeande ika kusi á kɔkɔta nɛkɛ.
11 Áɔm'bɔɛa mponda nɛkɛ ka me á mojabibo
na miki á mponda nɛkɛ ka me anja á mojabibo.
Aosokosa bhɔngɔ nɛkɛ na makana ánjɛ,
na bhɔngɔ nengbɔ na mandima á ntomba á mojabibo.
12 Iso akɛ a anjɛ̌ na makana anjɛ̌
na minyɔ akɛ a abhu na ibo ɛbɛ.
13 Jɛbhulúni aikande k'ɔbɛɛ óbenge ka ikɔ
ɔma nde koko agbongbo aodhunduiaga.
Muɔ á nji nɛkɛ ajuande ka kenombe á Sidhɔ́ni.
14 Isákai a bea mponda akpɛkpɛ.
Aoada subi á bogaɔ n'antimbi.
15 Dáɔni gea ɔma dátu anja ka umbia
na nji aɔm'bɔngɛa,
áogbuka ngɔngɔ akɛ ka kumbaga nkumba.
 yetɔ oba ka bhɛdanaga ekuma akpɛkpɛ á kɔkɔbɛ.
16 Dháni abande ntɛni-nyɔngɔ ékombo nɛkɛ
bea moci á k'ekuna á Isilaɛ́li.
17 Dháni a bea njɔka k'aphe, bea mbhɔma.
Aɔngɔta phaasi k'ɛphɔkɔ,
na nkpa nde phaasi atónkumbi áogua magagae.
18 O! *Mɔkɔta-Mokonga, nesebei gea omoamisande.
19 Mbenɔ nde bakukuba báodhondana ka phoa Gádhi
yɛ gǎkɛ áomana n'abɔ, áǒbeaga.
20 Nji ndea Asɛ́li aphuiande dungu ásǐ phɛ̂,
odo nɛkɛ aphuiande ea nde akeni na moamɛ.
21 Nɛphutáli a bea nyama
mmbe akengeani na kupha k'osaa
aɔbɔkɔta baniki bánjánja.
22 Yɔsɛ́phu ande miki á me
nnde aɔtɛnga nnde atɛi ka nkpangba á ntoɔ á ibɔ.
Ntabhe akɛ a éndǎ kɔnyɛnya mogubɔ.
23 Bausi-nsɔa dábandandi akpɛ,
báomusiaga nsɔa, báontambisaga phɛ̂.
24 Dátetemisi gǎkɛ mange nɛkɛ akpɛ,
njaga akɛ â ye tɔ oba áphoo,
ka nyɔngɔ á bukpɛkpɛ ndea Mokonga-Mɛna Bukpɛkpɛ mmbe ba Yakɔ́bɔ,
Nambi na Moimba ndea Isilaɛ́li.
25 Mokonga ndea abhakɔ akoengande,
Mokonga-Mɛna Bukpɛkpɛ akobhisiande njaga.
Ka bhisiakɔ njaga ndɔ, aunge ɔtɔande mbua ka toka na kobha,
ibo nde aophuphuta kusi á odo,
obɛ na banyama nɛkɔ bobande bamakɛbɔkɔti.
26 Bhisia njaga nde abhakɔ akobhisii,
anyɛnyi bonjánja á mamba nde amɔɔ tɔ béi,
anyɛnyi ɛtɔi á baniki á mamba á kaa.
Ambe bhisia á njaga á abhakɛ ábɛ gǔ á mɔ̌ á Yɔsɛ́phu
mmbe dábamphaphi sɔsɔbɛ a bamunamakɛ.
27 Bhɛnjamína ande mbɔa á k'osaa.
Kam'bimba aoea nyama nde agoe,
ɔgɔgɔ áogabha jue i.»
28 Bundɔ baunge bánde ekuna nkama na íbɛ (12) ndea Isilaɛ́li. Ande nyɔngɔ nde abhabɔ déngodi mbenɔ á bhisia abɔ njaga. Bhisia njaga ndɔ, dátu n'etete danga-danga ka nkpa na nkpa.
Kukua á Yakɔ́bɔ
29 Mpɔ, Yakɔ́bɔ áǒsosea be: «Mbenɔ nde nekuande, ómoumbani subi á bhota ndea batatɛ. Ande kubhu okanga nde á ka ciko ndea Ɛphulɔ́ni moÍti. 30 Okanga ndɔ a ka Makipɛ́la bhíbhí na Mamúlɛ, ka nji á Kanána. Ciko ndɔ Abhalaámu dásombi mɔtɛa Ɛphulɔ́ni moÍti, ka gea ábɛ ɔma áumbaga batɔa k'ekombo nɛkɛ. 31 Ko unge dábamumbi Abhalaámu na nkakɛ Sála, báomumba Isáka na nkakɛ Lɛbhɛ́ka, démumbi phɔtɔ Lɛ́a 32 Ciko na kubhu okanga nde asubi i, dábasombi mɔtɛa baÍti.» 33 Mbenɔ nde Yakɔ́bɔ agobi sosea baniki-bǒko nɛkɛ, áǒnanoa k'eka, áodusukana. Mpɔ, áǒdhonda batatakɛ.