Nkpangeɔ 48

Yakɔ́bɔ abhisi njaga gǔ á Ɛphulaímu na Manásɛ

1 Mbusa índɔ, báɔntɔmia Yɔsɛ́phu gea: « Abhakɔ aosamba. » Áɔɔbhɛda baniki-bǒko nɛkɛ babɛ, Manásɛ na Ɛphulaímu, mpɔ áoga nabɔ kubéi. 2 Bii bantɔmi Yakɔ́bɔ gea te: miki-mǒko nɛkɔ Yɔsɛ́phu abhiki kɔkɔɔnjia, áogea bukpɛkpɛ bhui, áoika ntengi k'eka nɛkɛ.

3 Yakɔ́bɔ áongodea Yɔsɛ́phu: «Mokonga-Mɛna Bukpɛkpɛ dámɔsɛnɛkɛi na Lúsi ka nji á Kanána, na dámobhisii njaga. 4 Dámongodi: ‹ Nekophande ɛbɔkɔti, obande tata á basuko básǐ. Mbusa akɔ, neóphande basuko akɔ nji nde, áoba nɛbɔ ka saga na saga. 5 Cɔ, kɛ̌kɛ nde, baniki-bǒko nɛkɔ bábɛ bunde dábabɔkɔtɛani na Mísii mosa á kidia ani oani, bábande bunɛmɔ. Ɛphulaímu na Manásɛ bábande baniki nɛmɔ bíndɔ Lubhɛ́ni na Simɛɔ́ni ba kau. 6 Baniki nde bábɔkɔtɛanande gǎkɛ mbusa abɔ, báunge bábande buakɔ. Bátɔande kebu á bɔtukɔ ínɛbɔ ka ina á baphomi abɔ. 7 Nɛyɔngi bo ka nyɔngɔ nde bii déotoka na Padháni, béokidia bhíbhí á Ɛphuláta ka nji á Kanána, amakɔ Lakɛ́li dámokui ka njaga, mpɔ néomuumba ka mpɛphɛ aphe nnde age na Ɛphuláta, ande gea te Bhɛtɛlɛɛ́mu. › » 8 Oa, Yakɔ́bɔ áɔ̌bɔna baniki-bǒko ndea Yɔsɛ́phu, áomúsia gea: « Baani bunde? » 9 Yɔsɛ́phu áonsikisia abhakɛ gea te: « Bunde bánde baniki-bǒko nɛmɔ bunde Mokonga dámopi ka Mísii oani. » Abhakɛ Yakɔ́bɔ áongodea gea: «Neodengemisigi ɔ́sɛkɛdisa bhíbhí ani ka gea nébhisɛ njaga ani gǔ abɔ. »

10 Iso á Yakɔ́bɔ dákatu ye kɔ̌na ánjá ka nyɔngɔ á kɔgbɛga akɛ. Yɔsɛ́phu aɔ̌sɛkɛdisa baniki-bǒko nɛkɛ bhíbhí abhakɛ. Yakɔ́bɔ aǒkombea na umbiaga abɔ. 11 Yakɔ́bɔ áongodea Yɔsɛ́phu: « Ketu ye na mosenda á ɔna keongi akɔ. Cɔ, Mokonga amɔɔnisi phɔtɔ ɛbɔkɔti nɛkɔ. » 12 Mpɔ, Yɔsɛ́phu áǒphuia banakɛ sɔsɔbɛ a muanku á abhakɛ, áogbuka keongi akɛ ka odo. 13 Mbusa, áɔ̌bhɛda bɔbhu babɛ. Áɔm'bhɛda Ɛphulaímu njaga á mǔku akɛ, áoba njaga á nkei á Yakɔ́bɔ. Áom'bhɛda Manásɛ áoba njaga á nkei akɛ, áoba njaga á mǔku á Yakɔ́bɔ. Â goto ɔ̌sɛkɛdisa bhíbhí á tatabɔ. 14 Cɔ, Yakɔ́bɔ â gǎkɛ ɔnyɛnyanisa njaga akɛ. Áobhisa njaga akɛ á mǔku gǔ á mɔ̌ á Ɛphulaímu mmbɔ dátu miki, áobhisa njaga akɛ á nkei gǔ á mɔ̌ á Manásɛ nanga dátu ange. 15 Mpɔ, áombhisia Yɔsɛ́phu njaga, áɔyɔnga be: «Mokonga, mmbe tatɛ Abhalaámu na abhɛ Isáka dábaendi mosa akɛ, Mokonga, mmbe dámoambi mbenɔ bhubhui na ka k'esa nde, 16 Malaeka nde dámoamisi na bojede bhubhui, ábhisɛ njaga gǔ á baganda nde! Ambe ka nyɔngɔ abɔ unge ina ani andandɛ bíndɔ á tatɛ Abhalaámu n'índe á abhɛ Isáka. Bábɛ n'ɛbɔkɔti ásǐ ka nji nde bhui. »

17 Bii Yɔsɛ́phu aɔni gea abhakɛ abhisi njaga akɛ á mǔku gǔ á mɔ̌ á Ɛphulaímu, kema ndɔ áɔm'bɛisa. Áɔbhɛda njaga á abhakɛ á mǔku ka toisa i gǔ á Ɛphulaímu ka bhisa i gǔ a mɔ̌ á Manásɛ. 18 Áongodea abhakɛ gea te: « Abhɛ, nna bo. Mmbe ambe ande ange. Cɔ, bhisa njaga akɔ á mǔku gǔ á mɔ̌ akɛ. » 19 Abhakɛ â gǎkɛ oya, áongodea gea te: « Eya, muku amɔ, neuubha. Ɛbɔkɔti ndea Manásɛ bábikande phɔtɔ. Mɔtɔ akɛ abae ndiu nkpa angbóngbo kɔnyɛnya yɛ, abande n'ɛbɔkɔti ásǐ. »

20 Esa ndɔ, Yakɔ́bɔ aobhisa njaga gǔ á baniki-bǒko ndea Yɔsɛ́phu. Áɔyɔnga be: « Ka ina akɔ, baIsilaɛ́li bábande ǒbhisia bakpa njaga. Bábaeka ɔyɔnga gea te: ‹ Ambe Mokonga átɔtɔkisɛ bonjánja gǔ akɔ, bíndɔ dátɔtɔkisi gǔ á Ɛphulaímu na Manásɛ. › Bondɔ unge Yakɔ́bɔ dám'bhisi Ɛphulaímu mosa á Manásɛ.» 21 Yakɔ́bɔ áotutuisa boabhi gea: «Cɔ, Yɔsɛ́phu nesǒokua. Mokonga abande gǎkɛ kimoci n'obɛ. Akojisande phɔtɔ ka nji nɛnu á bɔkɔtɛana. 22 K'éme, nekophi kebu ángbó kɔnyɛnya bamunamakɔ. Nekophi kenombe á Sɛkɛ́mu nnde déuti k'emani na batɔa ka Amɔ́li. »