Umba áYakɔ́bɔ
50
1 Yɔsɛ́phu áogua gǔ á mǒnda ndea abhakɛ n'aogama, ibo á ngamɔ áophosa keongi akɛ, áonkombea. 2 Mbusa, áǒsosea basaku nɛkɛ gea básiɛ mǒnda abhakɛ na manga gea te kaphoɛ. Basaku báosia mǒnda á Yakɔ́bɔ na manga. 3 Sia á manga ndɔ dábhɛdi b'esa nkama gena (40) bíndɔ dábaangi ka asíi ndea baMísii. Batɔa ka Mísii báongamea ka b'esa nkama ngia á njaga íbɛ (70).4 Bii mbenɔ á k'ekusa á Yakɔ́bɔ dási ye, Yɔsɛ́phu áǒngodea babhɛdanigi á k'endu ndea Phaláɔ, moamɛ á ka Mísii, gea: «Nenódengemisigi! Aoba n'obomokui ngomi, ngodeani phɔ kani moamɛ nyɔngɔ nde: 5 Abhɛ dámɔɔphisi áɔyɔnga be: ‹ Nesǒokua. Ómoumbaeka ka bhota nde détongi na Kanána. › Cɔ, nenódengemisigi, ómososea kɛ̌kɛ nde négɛmuumbɛ. Mbusa índɔ, nejande.» 6 Phaláɔ áonsosea Yɔsɛ́phu ágamuumbɛ abhakɛ bíndɔ dámɔphisi. 7 Yɔsɛ́phu áoga na Mísii ka umba abhakɛ. Dáge kimoci na babhɛdanigi bɔbhu á k'endu ndea Phaláɔ, na bakɔta á k'endu ndeakɛ, na bakɔta bɔbhu á ka nji á Mísii. 8 Dáge phɔtɔ na batɔa k'ekombo nɛkɛ bɔbhu, bamunamakɛ, na batɔa k'ekombo ndea abhakɛ. Dábědu tɔndɔ ka kenombe á Gɔsɛ́ni baniki nɛbɔ na etuge nɛbɔ. 9 Dáge phɔtɔ na koko na batɔa emani. Mɔɔmba abɔ dábiki phɛ̂.
10 Kidia abɔ ye ka ntanga á Atádhi kubhi á Yɔɔdháni, báobhisa kekusa angbo oa. Yɔsɛ́phu áobhisa kekusa ábhakɛ k'esa ngia á njaga íbɛ (7). 11 Bii baniki á nji, batɔa ka Kanána dábaɔni mɔangɔ á kekusa ndɔ ka ntanga á Atádhi kubhi á Yɔɔdháni, báɔyɔnga gea: « Eya! Ande kekusa angbo ka batɔa ka Mísii.» Kabondɔ unge dábasǔ ina á ɔma ndɔ Abhɛ́li-Mísilaímua.
12 Cɔ, baniki-bǒko ndea Yakɔ́bɔ bâtɔ ɔtɔtɔkisa ka abhabɔ bíndɔ désosi. 13 Banakɛ báokumba mǒnda akɛ, báoga ně na Kanána. Báoga uumba ka kubhu okanga ka ciko ndea Makipɛ́la bhíbhí á Mamúlɛ. Abhalaámu dásombi ciko ndɔ mɔtɛa Ɛphulɔ́ni moÍti, ka gea te ábɛ ɔma á umbaga á batɔa k'ekombo nɛkɛ. 14 Mbusa á umba mǒnda á Yakɔ́bɔ, Yɔsɛ́phu áosikianaga na Mísii, na bamunamakɛ na bakpa bɔbhu bunde dáge n'abɔ k'aphɛ á umba abhakɛ.
Yɔsɛ́phu nna na měma á gisia bojede ka bamunamakɛ
15 Bamunamakɛ na Yɔsɛ́phu báɔyɔngaga sɔsɔbɛ abɔ gea: « Bii abhasu aku ye, Yɔsɛ́phu kabande m'bibia asu na gisia bojede bhui nde debengi ně? » 16 Bâ gǎkɛ ontekisia Yɔsɛ́phu mbino nde: « Abhakɔ dásososi mosa á kukua akɛ gea: 17 ‹ Ngodeani kani Yɔsɛ́phu gea: " Neodengemisigi, ima bojede bhui nde bamunamakɔ dabaogii." › Ima bojede nɛsu, besu íbundɔ bɛɔmbhɛdaneaga Mokonga ndea abhakɔ.» Yɔsɛ́phu áotobokea ngamɔ mbenɔ nde dábaɔntɔmia mbino ndɔ. 18 Cɔ, bamunamakɛ báobhika sasabɔ mosa akɛ, báogbuka muanku abɔ, báongodea gea: « Bende babhɛnanigi nɛkɔ.»
19 Yɔsɛ́phu áǒngodea: « Bókobɛmbɛ na kɔkɔbɔkɔ, ke mpɛnɛ á Mokonga. 20 Bojede nde dóbokondi geani ně, Mokonga dákondi kětia i ka bonjánjá, ka gea te bakpa básǐ babɛ na boamia bíndɔ bɔɔna kesande. 21 Cɔ, bókobɛmbɛ na kɔbɔbɔkɔ, nenóphande kɛ̌kɛ nde kema bhubhui nde bona siki i na nnde ekombo nɛnu ana siki i.» Kayɔnga akɛ bo, měma á bamunamakɛ áɔphɔnga.
22 Yɔsɛ́phu na batɔa k'ekombo ndea abhakɛ báoika na Mísii. Dáendi basaga mia moci na nkama (110). 23 Yɔsɛ́phu dɛ́lbɔni batoyokɔ ndea Ɛphulaímu. Makíli muna Manásɛ dɛ́bɔkɔti phɔtɔ baniki k'ecinji akɛ.
24 Ɛsa moci, Yɔsɛ́phu aɔ̌tɔmia bamunamakɛ gea: «Nesǒkua. Eya, Mokonga anóenga nde. Anótokisande ka nji á Mísii aonoga ně ka nji nde dámɔku Abhalaámu, Isáka na Yakɔ́bɔ.» 25 Cɔ, Yɔsɛ́phu áɔ̌ɔphisa banaIsilaɛ́li be: «Mbenɔ nde Mokonga anoengande, bókumbaeka tɔ mǒnda ani.» 26 Mbusa, Yɔsɛ́phu áokua n'ana basaga mia moci na nkama (110). Báosia mǒnda akɛ na manga gea te kaphoɛ. Báobhisa subi á sanduku na Mísii.