Yakɔ́bɔ age na Mísii
46
1 Cɔ, Yakɔ́bɔ dáge n'ɛtɔi nɛkɛ bhui. Áokidia ka Bhɛ́li-Sɛ́bha, áophuia *ɔphɛɔ danga-danga ka Mokonga ndea abhakɛ Isáka. 2 Kǐpha, Mokonga áɔyɔngaga na yɛ ka njeki. Mokonga áɔmɔphana: « Yakɔ́bɔ o! Yakɔ́bɔ o! » Yakɔ́bɔ áobeekea: « Eme ámbé. » 3 Mokonga â goto ongodea: «Nende Mokonga, Mokonga mmbe ba abhakɔ. Kɔbɛmbɛ na kɔbɔbɔkɔ á ga na Mísii. Nga, ko unge nekogeande óbɛ n'ɛbɔkɔti ângbo. 4 Eme sasani negande kimoci n'obɛ na Mísii. Eme sasani goto ámbé nekojisande. Mbenɔ nde okuande, Yɔsɛ́phu ámbé adakande isɔ akɔ.» 5 Cɔ, Yakɔ́bɔ dátoki na Bhɛli-Sɛ́bha. Baniki-bǒko nɛkɛ báonkumba abhabɔ na bake nɛbɔ na baniki nɛbɔ ka koko nde moamɛ Phaláɔ dáteki ka kumba akɛ. 6 Dábage phɔtɔ n'etuge, n'ɛtɔi nɛbɔ bhui nde dábatɔi ka nji á Kanána. Mpɔ Yakɔ́bɔ n'ekombo nɛkɛ bhui, báokidia ka nji á Mísii. 7 Banakɛ bǒko na bake, basuko akɛ bǒko na bake, ande gea te yɛ, n'ekombo nɛkɛ bhui báojua ka nji á Mísii.Ekombo ndea Yakɔ́bɔ
8 Ɔ́nani ina á baIsilaɛ́li bunde dábage na Mísii. Ande: Yakɔ́bɔ na baniki-bǒko nɛkɛ na basuko akɛ baniki-bǒko.Ange ndea Yakɔ́bɔ, Lubhɛ́ni. 9 Baniki-bǒko ndea Lubhɛ́ni: Anɔ́ki, Pálu, Ɛsilɔ́ni na Kaámi. 10 Baniki-bǒko ndea Simɛɔ́ni: Yɛmuɛ́li, Yamíni, Ɔádhi, Yakíni, Sɔáli na Saúli muna nseka á ka Kanána. 11 Baniki-bǒko ndea Láoui: Gɛɛsɔ́ni, Koáti na Mɛláli. 12 Baniki-bǒko ndea Yúdha: Ɛ́li, Ɔnáni, Cɛ́la, Pɛlɛ́si na Jɛ́la. Ɛ́li na Ɔnáni dábaku gǎkɛ ka nji á Kanána. Baniki-bǒko ndea Pɛlɛ́si : Ɛsilɔ́ni na Amúli. 13 Baniki-bǒko ndea Isakái : Tɔ́la, Púa, Yasúbhu na Simulɔ́ni. 14 Baniki-bǒko ndea Jɛbhulúni: Sɛlɛ́dhi, Ɛlɔ́ni na Yalɛ́li.
15 Cɔ, ɔ́nani baniki-bǒko bunde Lɛ́a dámonjei Yakɔ́bɔ ka Padháni-Alámu. Ina á aɔabɔ dátu Dhína. Baniki-bǒko na baniki-nke, ka bɔbhu dábatu nkama isaɔ na isaɔ (33). 16 Baniki-bǒko ndea Gádhi: Siphiɔ́ni, Ági, Súni, Ɛsibhɔ́ni, Ɛ́li, Alɔ́dhi na Alɛ́li. 17 Baniki-bǒko ndea Asɛ́li: Imúna, Isióa, Isiúi, Bhɛlía na aɔabɔ Sɛ́la. Bhɛlía dátu na baniki-bǒko babɛ: Ɛbhɛ́li na Maikiɛ́li.
18 Ɔ́bɔnani baniki-bǒko ndea Yakɔ́bɔ na Jíipa mbhɛdanigi nke mmbe Labháni dámophi nseka nɛkɛ Lɛ́a. Bɔbhu dábatu nkama na ngia á njaga (16). 19 Lakɛ́li nkakɛ na Yakɔ́bɔ dámonjei baniki-bǒko babɛ: Yɔsɛ́phu na Bhɛnjamína. 20 Ka nji á Mísii, Yɔsɛ́phu dábɔkɔti na Asɛnati, nsɛka ndea Pɔtiphɛ́la ntobéi-phɛa ndea kenombe Ɔ́ni, baniki-bǒko babɛ: Manásɛ na Ɛphulaímu. 21 Baniki-bǒko ndea Bhɛnjamína: Bhɛ́la, Bhɛkɛ́li, Asibhɛ́li, Gɛ́la, Namáni, Ɛ́i, Lɔ́si, Mupímu, Upímu na Aádhi.
22 Ɔ́bɔnani baniki-bǒko ndea Yakɔ́bɔ na Lakɛ́li ka bɔbhu dábatu nkama na gena (14). 23 Dháni na miki-mǒko nɛkɛ Usímu. 24 Baniki-bǒko ndea Naphutáli: Yasɛ́li, Gúni, Yɛsɛ́li na Silɛ́mu.
25 Ɔ́bɔnani baniki-bǒko ndea Yakɔ́bɔ na Bhilía mbhɛdanigi nke mmbe Labháni damophi nseka nɛkɛ Lakɛ́li. Ka bɔbhu dábatu ngia á njaga íbɛ (7).
26 Batɔa k'ekombo ndea Yakɔ́bɔ, bunde dábage kimoci na yɛ na Mísii, dábatu ka bɔbhu nkama ngia á njaga na ngia á njaga (66), kanga tanga bake á bana Yakɔ́bɔ. 27 Yɔsɛ́phu dɛ́bɔkɔti baniki-bǒko babɛ ka nji á Mísii. Aunge batɔa k'ekombo ndea Yakɔ́bɔ, bɔbhu bunde dábage na nji á Mísii dábatu ka bɔbhu nkama ngia á njaga íbɛ (70).
Ika à Yakɔ́bɔ ka Mísii
28 Yakɔ́bɔ dánteki Yúdha mosa mɔtɛa Yɔsɛ́phu, ka gea ábhikɛ ábɔngisɛgɛ sesea abɔ ka nji á Gɔsɛ́ni. Mbenɔ nde Yakɔ́bɔ n'ekombo nɛkɛ bájue ka Gɔsɛ́ni, 29 Yɔsɛ́phu aɔbɔngisiaga koko nɛkɛ, aoga na Gɔsɛ́ni ka dhondana na Yakɔ́bɔ abhakɛ. Mbenɔ nde amɔni abhakɛ, aonkombea ka kingo, aogama mbenɔ enda. 30 Isilaɛli áongodea Yɔsɛ́phu: « Kɛ̌kɛ nde nekuɛ ye nga, nɛɔni keongi akɔ n'ɔphɔtɔ béi.» 31 Mpɔ, Yɔsɛ́phu áǒngodea bamunamakɛ na batɔa k'ekombo ndea abhakɛ gea: «Negande ɔntɔmia Phaláɔ na ngodea akɛ gea: bamunama, n'ekombo bhui ndea abhɛ bunde dábatu ka nji á Kanána bamobhikii. 32 Nengodeande phɔtɔ gea: Bánde batugi-banyama. Babhiki na bamɔgɔgɔ na bamɛmɛ n'ɛtɔi nɛbɔ bhui. 33 Aoba Phaláɔ n'anɔɔphani na usia anu: ‹ Ekuma nɛnu esa bhui ande eke? › 34 Bónsikisiande gea: ‹ Bɛsu babhɛdanigi nɛkɔ, bende batugi banyama kpanga ka koniki asu na ka k'esande bíndɔ dábatu batatasu. › Kabondɔ unge bɔtɔkande ika ka nji a Gɔsɛ́ni. Nga, batɔa ka Mísii baǒkangea batugi bɔbhu a bamɔgɔgɔ na bamɛmɛ. »