Yɔsɛ́phu ěngodisani ka bamunamakɛ
45
1 Oa, Yɔsɛ́phu dákatɔki ye sɔmɛa mɔphɛ akɛ mosa á bakpa bɔbhu bunde dábatu bhíbhí akɛ. Â ǒsosea babhɛdanigi nɛkɛ bájuanɛ na nsɛngɛ. Mbenɔ nde bájuani ye na nsɛngɛ, â ongodisana ka bamunamakɛ. 2 Yɔsɛ́phu áotobokea ngamɔ n'ɛsɔ akpɛ, na kabii batɔa ka Mísii báɔmɔka. Mbinɔ ndɔ â phɔtɔ ɔɔkɛkana k'ekombo ndea Phaláɔ.3 Yɔsɛ́phu áǒngodea bamunamakɛ gea: « Eme Yɔsɛ́phu a ámbé. Abhɛ a phɔtɔ béi? » Bamunamakɛ gǎkɛ dábakatɔki sikisia akɛ nyɔngɔ nga, dábatu na kɔbɔbɔkɔ phɛ̂ mosa akɛ. 4 Yɔsɛ́phu áǒngodea bamunamakɛ: « Kadengedenge, sɛkɛdani bhíbhí ani. » Báombhiimisia, áǒngodea: « Eme munamanu Yɔsɛ́phu ámbé. Mmbe dóbonsombisi ka gea bángɛ ně na Mísii. 5 Kɛ̌kɛ nde, bókobɛmbɛ na bɔmbɛ, bókobɛɛmbɛ ka nyɔngɔ á sombisa ani ka nji nde. Ande Mokonga ámbé dámoteki oani, mosa anu ka gea néamisɛ enda á bakpa. 6 Aye saga á ko íbɛ á monganya ka nji. Ajigi goto basaga bɔku nde bakpa bakatɔkɛku gubha na dungua. 7 Mokonga damotɛki koni mosa anu. Dákondi bóendɛ na opha anu baniki ka nji nde. Nga, anoamisi ka boamia angbo. 8 Nna gǎkɛ benu báunge dómomoteki koni a ndiu Mokonga. Yɛ goto ámbé agi nébɛ nphɛi ndea Phaláɔ, mamei endu nɛkɛ na mɔkɔta á ka nji bhui á Mísii. 9 Kɛ̌kɛ nde, kamisagani ga mɔtɛa abhɛ, bóngodeɛ be: ‹ Anakɔ Yɔsɛ́phu ayɔngi be: Mokonga amobhisi mɔkɔta na mamei nji bhui á Mísii. Cɔ, kamisaga bhika mɔtɛamɔ. 10 Obɛ, banakɔ, basuko akɔ, boikande bhíbhí ani ka nji á Gɔsɛ́ni, n'etugɛ na nkumba ndeakɔ bhubhui. 11 Oa, nekophande kema bhui nde ona siki i ka enda akɔ. Nga, monganya aguande goto ka basaga bɔku. Obɛ, ekombo na etugɛ nɛkɔ bókoukɛku ka kema. › »
12 « Mɔtɔ Bɛnjamína, na benu phɔtɔ, bɔ̌ni n'iso anu gea eme Yɔsɛ́phu ámbé neonóngodea. 13 Gani gǎkɛ bóngodeɛ abhɛ boombia nde ne ně ka nji á Mísii. Ntɔmiagani kema bhui nde bɔ̌ni. Mbusa, kamisagani bhika n'abhɛ koni. » 14 Mpɔ, Yɔsɛ́phu áonkombea mɔtɔ akɛ Bhɛnjamína ka kingo, bɔbhu babɛ báotobokea ngamɔ. 15 Â phɔtɔ ǒkombea bamunamakɛ bɔbhu n'aogama. Mbusa índɔ, bamunamakɛ bâ yetɔ ɔyɔngaga nayɛ.
Phaláɔ amɔphani Yakɔ́bɔ na nji á Mísii
16 Mbinɔ ndɔ á kidia á bamunamakɛ na Yɔsɛ́phu ka nji á Mísii, dándandi k'endu ndea Phaláɔ. Nyɔngɔ kau áɔm'bɔngɛa Phaláɔ na bakɔta á babhɛdanigi ndeakɛ bɔbhu. 17 Cɔ, Phaláɔ áongodea Yɔsɛ́phu: « Óngodea bamunamakɔ, báɔngɛɛ nkumba, békumbisɛ banyama nɛbɔ, bájɛ na Kanána. 18 M'boani abhanu n'ekombo nɛnu bhui, bóbhikɛ n'abɔ k'oni. Nenóphande ɔma ɛ́tɔi ka Mísii na bóeande ea ánjánja á ka nji nde. 19 Óngodea goto bamunamakɔ, bábhɛdɛgɛ koko á ka Mísii ka enga abɔ ka kumba bake abɔ, baniki na kakumba phɔtɔ abhabɔ babhikɛ. 20 Bakaianɛgɛmbɛ ajede ka nyɔngɔ ɛ́tɔi nɛbɔ nnde badeketande ko. Nga, baikande k'ɔma ɛ́tɔi phɛ̂ á ka nji á Mísii.»
21 Mpɔ bana Yakɔ́bɔ báogea nnde dáběngodi. Yɔsɛ́phu áǒbophaga koko bíndɔ Phaláɔ dansosi, áǒbopha phɔtɔ mpimbo á k'aphe. 22 Áǒbɔphaga nkpa na nkpa bhɔngɔ á jaí, â gǎkɛ omopha Bhɛnjamína bhɔngɔ á jaí bɔku na gbutu-gbutu á bangɔa mia isaɔ (300). 23 Áontekisia abhakɛ bǔku á bamponda nkama (10) na bákumbigi ea ánjánja á ka Mísii, na bakei á bamponda nkama (10) na bákumbigi nganɔ, mokati, na ea étete danga-danga, ka nyɔngɔ á mpimbo ndea abhakɛ k'aphe. 24 Mbenɔ nde dáɔkɔanaga na bamunamakɛ ka mɛa abɔ, áɔ̌phɛa gea: « Bókosanɛgɛmbɛ k'aphɛ.»
25 Báotoka ka nji á Mísii, báojua na Kanána mɔtɛa abhabɔ Yakɔ́bɔ. 26 Báontɔmiaga gea: « Abhɛ, Yɔsɛ́phu a phɔ́tɔ béi! Yɛ ámbé a mamei nji á Mísii.» Měma abhabɔ kabhomokɛ gǎkɛ. Nga, dákatu obeekea nyɔngɔ ndɔ. 27 Báɔntɔmiaga abhabɔ nyɔngɔ bhui nde Yɔsɛ́phu déngɔdi. Yakɔ́bɔ áɔɔna koko nde Yɔsɛ́phu miki-mǒko nɛkɛ dántɛkisii ka kumba akɛ. Mpɔ, měma akɛ â yetɔ oba na maseye. 28 Áɔyɔnga gea: « A anja! Miki-mǒko nɛmɔ Yɔsɛ́phu a phɔ́tɔ béi. Ambe nɛ́mɔ̌nɛ ka yɛ mosa á kukua ani.»