Yɔsɛ́phu aótombaga bamunamakɛ
44
1 Mbusa, Yɔsɛ́phu áonsosea nambi nkumba á k'endu nɛkɛ: «Tumisa njombi ndea bakpa nde na ea nnde bátɔkande kumba i. Sikisa phɔtɔ bangɔa ndea nkpa na nkpa k'ebombo á njombi nɛkɛ. 2 Ka njombi ndea mmbɔ juɛbɛ, kobhisɛmbɛ tɔndɔ bangɔa, óbhisa phɔtɔ cǎ á ngɔa nɛmɔ. » Áɔtɔtɔkisa bíndɔ Yɔsɛ́phu dánsosi.3 Mama i ka m'bimba, báǒdeketa bamunamakɛ na Yɔsɛ́phu bágɛ na bamponda nɛbɔ. 4 Bátambi tɔ abhɔa ka toka ka kenombe, Yɔsɛ́phu áongodea nambi nkumba á k'endu nɛkɛ gea: « Kamisaga bea á bakpa ndɔ, ódhungɛ. Óngodea be: ‹ Mɔkɔta nɛmɔ atónogii bonjánja. Ka nyɔngɔ sina bonsikisii bojede? 5 Buubi cǎ nde mɔkɔta áɔnɔɛaga na ɔtɔaga nyɔngɔ nde aobhika! Bogi ajede phɛ̂. › »
6 Nambi nkumba ndea Yɔsɛ́phu áǒdhonda, áǒngodea nyɔngɔ ndɔ bhui. 7 Báonsikisia: «Mɔkɔta, ɔsɔ́tɔngi bondɔ ka bo? Besu babhɛdanigi nɛkɔ bɛ́kɛɔtɔka na begi kema bíndɔ. 8 Uubha doni gea bekojisii ka toka na Kanána bangɔa nde débedhondi k'ebombo á njombi nɛsu bhui. Beubande ngɔa, kabɛ ɔ́lɔ mɔtɛa mɔkɔta nɛkɔ ka bo? 9 Áoba na bádhondi cǎ ndɔ subi á nkumba á ka bɛsu moci, akeni bámoɛ nkpa ndɔ, besu phɔtɔ bɛbande bakɔbɛ nɛkɔ.» 10 Áǒsikisia: « Eya, ábɛ bíndɔ bɔyɔngi. Mmbe bádhondande cǎ mɔtɛakɛ a ámbé abande nkɔbɛ nɛmɔ, bɛnu gǎkɛ bókobɛku na nyɔngɔ.» 11 Nkpa na nkpa áokamisaga kǐsa njombi nɛkɛ ka odo na ukua i. 12 Nambi nkumba ndea Yɔsɛ́phu áocunguda nkumba nɛbɔ bhui, ka kpanga k'inde á phomi na ka sungiaga k'inde á juɛbɛ. Cɔ, báodhonda cǎ ka njombi ndea Bhɛnjamína. 13 Mpɔ báonyuaga bhɔngɔ nɛbɔ n'esoia. Nkpa na nkpa â goto onkumbisa mponda nɛkɛ nkumba, bɔbhu báoja na kenombe.
Yúdha aɔnyɔngɛa Bhɛnjamína
14 Yúdha na bamunamakɛ báokidia k'endu ndea Yɔsɛ́phu mbenɔ nde Yɔsɛ́phu dátu phɔtɔ oa, báogbuka endondo abɔ sua odo mosa akɛ. 15 Yɔsɛ́phu áǒngodea: « Botógi bondɔ ka bo? Bokouubha gea nkpa bea eme, neuubha ɔtɔa á kema bhui? » 16 Yúdha áonsikisia: « Mɔkɔta, békongodeɛ boni? Béke na ka nyɔngɔ. Béenganɛae ye bo? Mokonga aubhisi bojede nɛsu bhase. Beye tɔ bakɔbɛ nɛkɔ na mmbe bátodhondi phɔtɔ cǎ subi á nkumba nɛkɛ. » 17 Yɔsɛ́phu áɔyɔnga gea: «Nna tanda bo, kégeɛku bo. Nkpa nde bátondhondi na cǎ ndɔ, a ámbé aba tɔ nkɔbɛ nɛmɔ. Benu gǎkɛ, jani na bɔjɛjɛ mɔtɛa abhanu. »
18 Cɔ, Yúdha áɔsɛkɛda bhíbhí á Yɔsɛ́phu, áongodea: «Mɔkɔta nɛmɔ, ómokuia ngomi. Neodengemisigi, ómososea nɛ́ɔtɔmiɛ nyɔngɔ moci kɔmɔbɛɛmbɛ, éme mbhɛdanigi nɛkɔ, ka nyɔngɔ nde o bea Phaláɔ. 19 Ka mosa-mosa, dósuusi besu babhɛdanigi nɛkɔ: ‹ Ngbega á abhanu a phɔ́tɔ béi? Na ka bamunamanu? › 20 Béokosikisia gea: ‹ Be phɔ́tɔ na ngbega á abhasu na munamasu ímbɔ juɛbɛ. Abhasu am'bɔkɔti miki ndɔ ka kophomi akɛ na munamakɛ ímbɔ phomi aye n'aku. Miki ndɔ ajigi tɔ sasakɛ ka sɔphɔ á mɔkɛni á amakɛ n'abhakɛ ankɔndi phɛ̂. › 21 Mpɔ, dósogodi gea: ‹ Mbhikani k'ani ně nɛ́mɔ̌nɛ ka yɛ. › 22 Débekosikisii gea: ‹ Moganda ndɔ nnaɔtɔka n'atoki ka mpɛphɛ á abhakɛ. Aoba n'agi bo, abhakɛ akuande. › 23 Cɔ, dósongodi gǎkɛ gea: ‹ Aoba juɛbɛ nɛnu na kábhiki na bɛnu, kébeekeɛku bójuɛ mosa ani. ›
24 Mbenɔ nde débeji mɔtɛa mbhɛdanigi nɛkɔ abhasu, dɛ́bɛntɔmigi nyɔngɔ nɛkɔ bhui. 25 Bii abhasu dáyɔngi gea: ‹ Jani goto bósombɛ k'asu ea ›, 26 débesikisi gea: ‹ Bɛ́kɛtɔkɛku gǎ na Mísii kanga mɔtɔasu ímbe juɛbɛ. Aoba gǎkɛ na ka ge na besu, mɔkɔta, mamei á ka Mísii kásobeekeɛku. Bega tɔ, mmbe mɔtɔasu age na besu. › 27 Mpɔ, abhasu áosóngodea gea: ‹ Buubha gea nkani Lakɛ́li dámoonjei tɔ baniki-bǒko babɛ. 28 Ange dámodeketi, néoubha te nyama akae dángoe doni. Nga, na ka k'esa nde kɛ́mɔnimbɛ mɔnɔ. 29 Aoba na bɔmɔbhɛdɛi goto mmbe na ge ɔgɔtɔkana, nega yetɔ okua na netɔ ka k'ekusa. ›
30 Kɛ̌kɛ nde, abhɛ ansebei miki nde ka enda akɛ phɛ̂. Aoba nenesikianigi mɔtɛa abhɛ kanga sikisia akɛ miki, 31 ámbe abhɛ akuande bii ka mɔɔnɛku miki-mǒko. Â ajede áoba na benkusi abhasu n'anangomi. 32 Gǔ índɔ, débeeki mɔ̌ á miki nde ka yɔnga n'abhɛ gea: ‹ Aoba nenekensikisi mɔtɛakɔ, nekumbande bojede ndɔ mosa akɔ abhɛ, ka enda ani bhui. › 33 Kɛ̌kɛ nde, neodengemisigi, ómobeekea nébɛ bea nkɔbɛ nɛkɔ k'ɔma á moganda nde. N'deketa yɛ ájɛ na bamunamakɛ. 34 Kɛ́tɔkɛku na neji mɔtɛa abhɛ kanga moganda nde. Képhiphiɛku bojede nde angeande abhɛ. »