Bhɛnjamína age na bamunamakɛ na nji á Mísii
43
1 Monganya dátu akpɛ ka nji á Kanána. 2 Mbenɔ nde ekombo ndea Yakɔ́bɔ bagobi ye ea bhui nde dábatoki ně na nji á Mísii, abhabɔ áǒngodea: « Jani na Mísii ka sɔmba k'asu ea abhɔa. » 3 Yúdha áonsikisia: «Mɔkɔta á mamea nji dásongodi bhase gea, ‹ Kenobeekeɛeka mosa ani aobá́ na bókombhiki na mɔtɔ anu. › 4 Cɔ, k'abɛ n'obeeki mɔtɔ asu agɛ na besu, aunge begande okosombea ea. 5 Kabɛ gǎkɛ n'okóbeeki begɛ n'abɔ, békegɛku, ka nyɔngɔnde mɔkɔta ndɔ dásongodi bhase gea, ‹ Kénobeekeɛeka mosa ani, aobá́ na bókombhiki na mɔtɔ anu. › »6 Yakɔ́bɔ áǒngodea: « Ka nyɔngɔ eke botongodi mɔkɔta ndɔ gea bona mɔtɔ anu bangbó? Bomogii ajede. » 7 Báonsikisia : «Mɔkɔta ndɔ dásuusigi ásǐ, mbinɔ asu na nnde á ekombo nɛsu. Áɔyɔnga gea: ‹ Abhanu a phɔ́tɔ bɛi? Bo goto na munamanu bangbó? › Débensikisii tɔ ka muisiɔ ndeakɛ. Débɛkɛtɔki gǎkɛ ubha gea asongodeande: ‹ Mbhikani na mɔtɔ anu. › »
8 Yúdha áongodea : « Abhɛ, n'deketa Bhɛnjamína béngɛ nayɛ. Béke na siki á kukua, ambe bégɛ. Kabɛ na bekondi enda, obɛ, besu, n'ekombo nɛsu bhui. 9 Nyɔngɔ akɛ a ka mɔ̌ ani. Ande eme ámbé omouisiande ka yɔngɔ akɛ. Aoba na kásikianigi mɔtɛakɔ, nekumbande bojede ndɔ mosa akɔ ka enda ani bhui. 10 Kɛ̌kɛ nde, kabɛ nǎna iphia asu oani, betu batɔa ga na ja mɔngɔ íbɛ.»
11 Mpɔ, abhabɔ Yakɔ́bɔ áongodea : « Ka nyɔngɔ nde abo, akeni bóbhisɛ subi á njombi nɛnu ɛtɔi ánjánja á ka nji nɛsu ábɛ nkɛbɛa á gɛndɛa na mɔkɔta ndɔ. Ngɛndɛani na obani abhɔa, boki abhɔa, jíli, manɛmanɛ na mbuka á me nɛngbo íbɛ. 12 Gani na bangɔa ndɔ dábajisi subi á njombi nɛnu. Bhɛdani goto bangɔa nɛngbo á ko íbɛ. Kǎsi dábajisi bangɔa ndɔ á mosa kanga ubha. 13 Cɔ, mbhɛdani yetɔ mɔtɔ anu, bójɛ mɔtɛa mɔkɔta ndɔ. 14 Ambe *Mɔkɔta-Mokonga, ánokuiɛ ngomi mosa á mɔkɔta ndɔ, ka gea ánodeketeɛ munamanu Simɛɔ́ni na Bhɛnjamína bójɛ na bɔ. K'éme, nejigi yetɔ kanga á baniki.»
Yɔsɛ́phu adhondani na bamunamakɛ mɔngɔ á ko íbɛ
15 Bamunamakɛ na Yɔsɛ́phu báobhɛda nkɛbɛa na bangɔa mɔngɔ íbɛ n'índɔ á mosa, báoga kimoci na Bhɛnjamína na nji á Mísii. Mpɔ báokidia mosa á Yɔsɛ́phu. 16 Mbenɔ nde Yɔsɛ́phu dɛ́bɔni na bák'imɔci na Bhɛnjamína, áongodea mamei na nambi nkumba bhui á k'endu nɛkɛ gea: « Óga na bakpa nde mɔtɛamɔ. Ntena nyama moci ɔ́mɔɔmbɛ anja. Nga, beagande n'abɔ k'esa nde sɔmani.» 17 Nkpa ndɔ áɔtɔtɔkisa mɔangɔ ndea Yɔsɛ́phu, áoga na bakpa ndɔ mɔtɛa mɔkɔta nɛkɛ.
18 Mbenɔ nde béngisi mɔtɛa Yɔsɛ́phu, báoba na kɔbɔbɔkɔ. Báonyɔngaga sɔsɔbɛ abɔ gea : « Ande nyɔngɔ á bangɔa nde dábasikisi subi á njombi ea nɛsu ka tamba á mosa. Básodhungande ka kɔkɔbɛ na boa á bamponda nɛsu! » 19 Mosa á ngia, báombhiimisia mamei na nambi nkumba bhui á k'endu ndea Yɔsɛ́phu báongodea: 20 « Kadengedenge mɔkɔta nɛmɔ, débebhiki phɔ oani mosa ka somba ea. 21 Ka ja asu, mbenɔ nde débekidi k'ɔma nde débede, débeukugu njombi nɛsu. Nkpa na mkpa â tɔ odhonda doni gbutuka á bangɔa nɛkɛ k'ebombo á njombi nɛkɛ. Cɔ, aunge bebhiki ně. 22 Bebhiki na bangɔa nɛngbo á somba n'ea. Cɔ, békeuubha nkpa sina mmbe dájisi bangɔa nɛsu subi á njombi.» 23 Áǒsikisia: « Bani na bɔjɛjɛ. Bókobɛmbɛ na kɔbɔbɔkɔ! Ande Mokonga nɛnu, Mokonga ndea abhanu, yɛ a ámbé atóbhisi bangɔa ndɔ subi á njombi nɛnu. Bangɔa nɛnu dámodhondi.» Mpɔ, áonjuanisa ka bɔ Simɛɔ́ni.
24 Mamei na nambi nkumba á k'endu ndea Yɔsɛ́phu áǒngisa bamunamakɛ na Yɔsɛ́phu bɔbhu sub'éndu. Áǒpha ibo á sokosa n'ecinji, na áǒpha bamponda nɛbɔ ea. 25 Bamunamakɛ báɔbɔngisaga nkɛbɛa ndea Yɔsɛ́phu, ka nyɔngɔ nde dábaubhi gea, báeagande na bɔ somani.
26 Mbenɔ nde Yɔsɛ́phu dákidi mɔtɛakɛ, báomopha nkɛbɛa nɛkɛ nnde dábabhiki ně. Mpɔ, báogbuka endondo abɔ sua odo mosa akɛ. 27 Áǒbuisiaga mbino abɔ, â phɔtɔ ǒngodea: «Ngbɛga á abhanu ímbɔ dɔ́bɔmɔtɔ̌mi mbino akɛ, a phɔ́tɔ béi? » 28 Báonsikisia: « Eya, mbhɛdanigi nɛkɔ abhasu a phɔ́tɔ béi, ana bɔjɛjɛ. » Bâ goto ogbuka edondo abɔ sua odo. 29 Bii Yɔsɛ́phu dámɔ̌ni Bhɛnjamína munamakɛ á ka sɔphɔ ímoci, áǒbuisia: « Ande mɔtɔanu ímbe bomongodima nyɔngɔ akɛ? » Áǒngodea: «Mokonga ábhisɛ njaga akɛ gǔ akɔ miki nɛmɔ! »
30 Mbenɔ nde Yɔsɛ́phu dámɔ̌ni Bhɛnjamína, měma áom'bhomoka, áotuma na maseye. Áokamisaga toka k'ɔma ndɔ. Nga, bibiso dám'bhikii k'iso, áoga ogama sub'éndu nɛkɛ. 31 Mbusa á sokosa keongi akɛ, â yetɔ ojuana ka kobǒko. Mpɔ, áɔyɔnga: « Gabhani k'asu ea.» 32 Báom'bhisia Yɔsɛ́phu ea ínɛkɛ yɛ sasakɛ, bamunamakɛ bɔ sasabɔ, na batɔa ka Mísii bunde dáoeaga na bɔ báobhisa nɛbɔ nganga. Nga, ka ásǐ á batɔa ka Mísii, dábakaɔtɔka tambuanaga na baƐbhulanía kimoci. Nga, nndɔ dátu otaɔ ka batɔa ka Mísii. 33 Bamunamakɛ na Yɔsɛ́phu, dábaiki mosa akɛ ka beana na basaga á bɔkɔtɛana, kpanga ka ange na ka jua ka juɛbɛ. Dábaɔɔnjianaga na báoianaga. 34 Baǒcudia ea nde dátu mosa á Yɔsɛ́phu. Nnde á Bhɛnjamína dányɛnyi mɔngɔ bɔku nnde á ba phomi akɛ. Báonoa makana k'imoci na yɛ, makana aɔ̌bhɛda.