Yakɔ́bɔ ěteki baniki-bǒko nɛkɛ na Mísii
42
1 Yakɔ́bɔ dáɔki gea, ea ana nji á Mísii. Mpɔ áǒngodea baniki-bǒko nɛkɛ: « Ka nyɔngɔ sina nde boikii ko ka ɔnjianaga? 2 Nɛɔki gea ea ana nji á Mísii. Gani ko ka somba i, ka gea béendɛ, békekuɛmbɛ. » 3 Cɔ bamunamakɛ na Yɔsɛ́phu nkama (10), báoga osomba ea na nji á Mísii. 4 Yakɔ́bɔ dákanteki gǎkɛ Bhɛnjamína, mɔtɔakɛ na Yɔsɛ́phu á ka sɔphɔ ímoci agɛ n'abɔ. Nga, dátuotea ka gea Bhɛnjamína kagɔtɔkanɛmbɛ. 5 Baniki-bǒko ndea Yakɔ́bɔ, dábakidi na nji á Mísii kambenɔ ímoci na bakpa buangbó ka somba ea. Nga, monganya dándandi ka nji á Kanána bhui.Dhondana á ka mosa-mosa ndea Yɔsɛ́phu na bamunamakɛ
6 Yɔsɛ́phu dátu mɔkɔta á mamea nji á Mísii. Yɛ ámbé dátu na moangɔ á sombisia bakpa bɔbhu á ka nji ea. Ka kidia á bamunamakɛ, báogbuka endondo abɔ sua odo mosa akɛ. 7 Bii Yɔsɛ́phu dɛ́bɔni bamunamakɛ, děbubhi. Yɛ, dékeengodisi gǎkɛ na bɔ gea ande munamabɔ. Â ndiu ɔnyɔnga na bɔ ka kokae gea : « Botoki koni? » Báonsikisia : « Betoki na Kanána, bebhiki osomba ea. »
8 Yɔsɛ́phu déubhi bamunamakɛ. Bɔ, dábakamǔbhi gǎkɛ. 9 Cɔ, Yɔsɛ́phu dákanisi njeki nde dáde ně ka phɔa ábɔa. Áǒngodea: «Bonde babibia á bɔgɔmɛaga. Bobhiki oani ka ubha ɔma ájɛngɛ-jɛngɛ á nji nɛsu.» 10 Báonsikisia: «Nna bo, mɔkɔta. Bebhiki tɔ ka somba ea. 11 Besu bɔbhu bende baniki-bǒko ndea nkpa moci. Bende batɔa doni. Béke nɛsu babibia á bɔgɔmɛaga. » 12 Yɔsɛ́phu áǒsikisia: « Ande mbɛa! Bobhiki tɔ ka ubha ɔma ájɛngɛ-jɛngɛ á nji nɛsu. »
13 Báonsikisia: «Nna bo. Bende baniki-bǒko nkama na íbɛ (12) ndea nkpa moci á ka nji á Kanána. Juɛbɛ nɛsu ajigi k'esa nde ka mpɛphɛ á abhasu. Moci ámbé nna mɔnɔ ye béi.» 14 Yɔsɛ́phu áǒsikisia: «Netónongodi, bonde babibia á bɔgɔmɛaga. 15 Neubhande gea bɔɔyɔnga doni. Cɔ, nɛɔphi tɔ ka ina á Phaláɔ, bókotokɛku ka nji nde, aobá́ mɔtɔ anu n'akakidi oani. 16 Ntekani ka benu moci ka kaba mɔtɔ anu. Benu buangbó bojigande gǎkɛ ka mɛkakɔ. Kabondɔ unge nɛtɔkande ubha gea botómongodi doni. Kabɛ nǎna bo, aobá́ na bɔyɔngi mbɛa, nɛɔphi tɔ ka ina á Phaláɔ, bɔtɔ ba bibia á bɔgɔmɛaga. » 17 Áǒmakea bamunamakɛ k'endu á mɛkakɔ k'esa isaɔ.
18 K'esa á ko isaɔ, Yɔsɛ́phu áǒngodea be: « Eme, neom'banga Mokonga. Cɔ, kabɛ na bokondi enda, bógeande nyɔngɔ nde néonóngodea. 19 Kabɛ na bonde batɔa-doni, beekeani ka benu moci ájigɛ ka mekakɔ oani. Benu buangbó, ɔgɛndɛani ekombo nɛnu n'ea ka nyɔngɔ á nja. 20 Mpɔ, bómbhikɛ kani na mɔtɔ anu ímbɔ juɛbɛ, aunge neubhande gea bɔtɔ́yɔngi doni, na bókókuɛku ye. » Bamunamakɛ báobeekea nyɔngɔ ndea Yɔsɛ́phu. 21 Mpɔ bâ gǎkɛ ɔyɔngaga sɔsɔbɛ abɔ be: « Dábegi bojede ka phɔa munamasu Yɔsɛ́phu. Nga, dásodengemisigi ka tambaga akɛ, dábɛkɛmɔ̌ki gǎkɛ. Ka nyɔngɔ índɔ unge bojede nde asodhondi. » 22 Lubhɛ́ni áɔyɔnga: « Dékenongodi gea bókogeɛmbɛ bojede ka phɔa miki ndɔ. Benu gǎkɛ dɔ́bɔkɔmɔɔki. Kɛ̌kɛ nde beyéotambaga ka nyɔngɔ á magia akɛ.» 23 Cɔ, bamunamakɛ dábakatuubha gea Yɔsɛ́phu aodigimisa nyɔngɔ nde báɔyɔnga. Nga, nkpa moci dátu sɔsɔbɛ abɔ ka tɔmiaga á boabhi nɛbɔ. 24 Yɔsɛ́phu áǒdangamisa n'abɔ, áoikia ngamɔ. Mpɔ áosikianaga bhíbhí abɔ, áɔyɔngaga n'abɔ. Mbusa, áondhungisa Simɛɔ́ni k'iso abɔ, áombhisa ka mekakɔ.
Bamunamakɛ na Yɔsɛ́phu básikianigi na Kanána
25 Mbusa índɔ, Yɔsɛ́phu áǒsosea babhɛdanigi nɛkɛ gea: « Tumisani njombi nɛbɔ n'ea ásǐ na nsikisiani nkpa na nkpa bangɔa nɛkɛ subi á njombi nɛkɛ. Na óbophani mpimbo á k'aphe. Nndɔ ungɔ babhɛdanigi dábatɔtɔkisi k'abɔ.» 26 Bamunamakɛ na Yɔsɛ́phu báǒkumbisaga bamponda nɛbɔ njombi ea mpɔ báoga.
27 Mbenɔ nde bákidi ɔma á da, k'abɔ moci áuukua njombi nɛkɛ ka gea ámophɛ mponda ɔphɔ á ea. Áoima ka dhonda bangɔa nɛkɛ k'ebombo á njombi. 28 Áǒngodea bamunamakɛ : « Aii! Bámojisii goto bangɔa nɛmɔ, aunge a k'ebombo á njombi nɛmɔ! » Báotangaaga phɛ̂, báoikia kpɔkpɔmaga na báoyɔngaga sɔsɔbɛ abɔ: « Eke nde Mokonga asógi ně bende? »
29 Mbenɔ nde dábakidi mɔtɛa abhabɔ Yakɔ́bɔ na Kanána, báɔntɔmiaga nyɔngɔ bhui nde atóodhondi. 30 Báongodea be: «Mɔkɔta mmbe amamei nji atɔ́sɔyɔngɛi na kokae phɛ̂. Atɔ́sɔɔni bea babibia á bɔgɔmɛaga nji nɛkɛ. 31 Betóngodi gea: ‹ Bende bakpa á doni, béke babibia á bɔgɔmɛaga nji nɛkɔ. 32 Débetu baniki-bǒko nkama na íbɛ (12), abhasu atɔ moci. Ka besu moci nna ye béi na moci gǎkɛ mmbɔ juɛbɛ ajigi na abhasu na nji á Kanána. › 33 Cɔ, Mɔkɔta mmbe amamei nji áosongodea: ‹ Neubhande gea bonde batɔa doni ámbe bɔmɔdɔi ka bamunamanu moci. Bhɛdani ea, bɔ́gɛndɛɛ na batɔa k'ekombo nɛnu ka nyɔngɔ á monganya. 34 Mpɔ, bómobhikiɛ na juɛbɛ nɛnu. Oandɔ ungɔ neubhande gea bóko babibia á bɔgɔmɛaga á nji, bo ndiu batoa doni. Nenójisiande munamanu na nenódeketande bógeɛ ekuma á sombeanaga ka nji nde. › »
35 Mbenɔ nde bácungudigi njombi nɛbɔ, báotangaaga bii nkpa na nkpa adhondi bangɔa subi á njombi nɛkɛ. Bɔ, na abhabɔ, báoba bɔbhu na kɔbɔbɔkɔ. 36 Yakɔ́bɔ áǒngodea: « Boye na bɔmɔkpɔi baniki nɛmɔ babɛ. Yɔsɛ́phu nna ye béi na Simɛɔ́ni nna ye béi. Bokondi goto bóm'boɛ kani Bhɛnjamína! Nyɔngɔ ndɔ bhui atɔ ka phɔ ani.» 37 Lubhɛ́ni áongodea abhakɛ: « Aoba nenekékojisii Bhɛnjamína, ǒmoande baniki-bǒko nɛmɔ babɛ. Ómopa yɛ, nekojisiande.» 38 Yakɔ́bɔ áonsikisia: « Bɛ̌ndɔ, miki-mǒko nɛmɔ kágɛku na benu. Nga, phomi akɛ aye n'aku, ajigi tɔ sasakɛ ka sɔphɔ amakɛ. Kabɛ n'age ɔgɔtɔkana ka tamba nɛnu, nega yetɔ okua na netɔ ka k'ekusa.»