Nkpangeɔ 41

Njeki ndea Phaláɔ

1 Mbusa á basaga babɛ, Phaláɔ, moamɛ á ka Mísii, áoda na njeki. Dátu k'ɔbɛ̌ á ɔba Níi. 2 Áɔɔna bakei á bangɔmbɛ ngia á njaga íbɛ (7) bánjánja ánɔnaga báojuana subi á ɔba Níi. Báoikia eaga ɔphɔ-ɔphɔ á k'ɔbɛɛ. 3 Mpɔ, bangɔmbɛ buangbó ngia á njaga íbɛ (7) bajede-jede na á k'ɔ̌ndaga báojuana subi á ɔba mbusa á bundɔ bánjánja. Báobhika omamaga ka nkpangba abɔ k'ɔbɛ̌ á ɔba. 4 Bangɔmbɛ bajede-jede á k'ɔ̌ndaga, báôea bangɔmbɛ ngia á njaga íbɛ (7) bánjánja áɔnɔnaga. Mpɔ Phaláɔ áojujuka.

5 Mɔamɛ â goto osikianaga ka tɔ̌ áoda na njeki á ko íbɛ: Áɔɔna ephuti ngia á njaga íbɛ (7) á mbuka á nganɔ ángbongbo n'atɛi ka ngbanga moci. 6 Mpɔ mbusa índɔ, ephuti nengbo ngia á njaga íbɛ á mbuka á nganɔ á k'ɔ̌ndaga n'asídigi na maepheanɔ á ka nkanda â phɔtɔ ɔtɛa. 7 Cɔ, ephuti á k'ɔ̌ndaga áomia ephuti ngia á njaga íbɛ (7) á nganɔ ndea ngbongbo na mbuka n'atumigi. Mbenɔ ndɔ tɔ Phaláɔ áojujuka áuubha ka gea atu ka njeki.

8 Kam'bimba i, Phaláɔ dáagatani phɛ̂; áɔ̌bɔphana bankume na baubhaphi bɔbhu á ka Mísii. Áɔ̌tɔmiaga njeki nɛkɛ bhui ka bakpa dákatɔki gǎkɛ ngodea akɛ kantiti i. 9 Mpɔ, mɔkɔta á babɔngisigi kema á noa áongodea Phaláɔ gea: «Mɔamɛ nɛmɔ, nekanisi k'esa nde bojede nɛmɔ. 10 Esa ímoci, obɛ dɔ́sɔbɛ̌i besu babhɛdanigi nɛkɔ: eme na mɔkɔta á baɔmbigi mokati. Dósobhisi subi á endu á mekakɔ k'endu ndea mɔkɔta á batɔa-emani babondigi. 11 Kǐpha ímoci besu bɔbhu babɛ débede na njeki. Njeki kau áoba na kantiti danga-danga. 12 Débetu k'endu á mekakɔ na moganda moci nkɔbɛ muƐbhulanía mbhɛdanigi ndea mɔkɔta á batɔa-emani babɔndigi. Débengodi njeki nɛsu. Yɛ dásɔtɔmigi nkpa na nkpa kantiti á njeki nɛkɛ. 13 Nyɔngɔ ndɔ dátɔtɔkɛani tɔndɔ bíndɔ dásɔtɔmigi. Eme, moamɛ dámosikisi ka kɔkota nɛmɔ bâ gǎkɛ onkpataga mɔkɔta á baɔmbigi mokati. »

Yɔsɛ́phu aɔtɔmiaga kantiti á njeki ndea Phaláɔ

14 Cɔ, Phaláɔ áososea ɔphana Yɔsɛ́phu. Báokamisaga juanisa akɛ k'endu á mɛkakɔ, báonkangadua sekamɔ n'ɛndɛu na báom'bongoa bhɔngɔ. Mpɔ báombhika nayɛ mosa á Phaláɔ. 15 Phaláɔ áongodea Yɔsɛ́phu gea: «Netode na njeki nkpa dákaubhi gǎkɛ tɔmiaga kantiti i. Nɛtɔ́ɔki gea obɛ ɔna bukpɛkpɛ á tɔmiaga kantiti á njeki bhui nde báokongodea. » 16 Yɔsɛ́phu áonsikisia Phaláɔ gea: «Nna tanda eme. Ande Mokonga ámbé akophande kantiti doni á njeki.»

17 Mpɔ Phaláɔ áongɔdea Yɔsɛ́phu gea: « Subi á njeki nɛmɔ netómamege k'ɔbɛ̌ á ɔba Níi. 18 Nɛtɔɔni bangɔmbɛ ngia á njaga íbɛ bánjánja na bánɔnigi báojuana subi á ɔba Níi, báoeaga ɔphɔ-ɔphɔ á k'ɔbɛɛ. 19 Bakei á bangɔmbɛ buangbó ngia á njaga íbɛ bajede-jede na á k'ɔ̌ndaga báojuana mbusa abɔ subi á ɔba Níi Nkoko a bojede á bakei á bangɔmbɛ kau kɛɔnimbɛ mɔnɔ kau ka nji bhui á ka Mísii. 20 Cɔ, bakei ábangɔmbɛ bajede-jede na á k'ɔ̌ndaga báǒea bundɔ ánjánja na á kɔnɔnaga ngia á njaga íbɛ ámosa. 21 Nanga bakei á bangombɛ bajede-jede ea bundɔ banɔnigi, nkpa dákatɔki gǎkɛ ubhai ka nyɔngɔ nde bɔ̌ndu nɛbɔ dányɛnyi nndɔ á mosa. Mbenɔ ndɔ néojujuka.

22 Nê goto oda na njeki nɛngbo. Subi á njeki ndɔ, nɛ́ɔɔna ephuti ngia á njaga íbɛ (7) ánjánja n'atumigi na mbuka á nganɔ n'atɛi ka ngbanga moci. 23 Mbusa, nê goto ɔɔna ephuti ngia á njaga íbɛ á k'ɔ̌ndaga na sidigi na maepheanɔ á ka nkanda n'atɛi mbusa i. 24 Cɔ, ephuti á k'ɔ̌ndaga áomia ephuti ngia á njaga íbɛ (7) nnde ánjánja. Déngodi bankume, kabɔ moci dákatɔki gǎkɛ tɔmiaga ani kantiti i.»

25 Mpɔ Yɔsɛ́phu áongodea Phaláɔ gea: «Njeki nɛkɔ íbɛ, a tɔ na kantiti ímoci. Mokonga akophangi kema nde ageande. 26 Bakei á bangɔmbɛ bánjánja ngia á njaga íbɛ (7) ande gea basaga ngia á njaga íbɛ. Na ephuti ánjánja ngia á njaga íbɛ ande gea basaga ngia á njaga íbɛ (7), ande gea te njeki ndɔ atɔ ímoci. 27 Bakei á bangɔmbɛ buangbó ngia á njaga íbɛ bajede-jede na á k'ɔ̌ndaga, na ephuti á mbuka á nganɔ á k'ɔ̌ndaga na sidigi na maepheanɔ á ka nkanda, ande gǎkɛ basaga ngia á njaga íbɛ ámonganya. 28 Atɔ bíndɔ nɛtɔ́kɔtɔmi moamɛ nɛmɔ. Mokonga akophangi kema nde ageande. 29 Basaga ngia á njaga íbɛ nde aobhika abande basaga á dungu ásii ka nji á Mísii bhui. 30 Mbusa índɔ, basaga ngia á njaga íbɛ á monganya abeande. Bakpa báboseande dungu ásǐ bhui á mosa ka nji á Mísii. Monganya ajisande nji ka buyɛnɛ. 31 Monganya kau abande akae phɛ̂. Kabondɔ unge bakpa baboseande gea dungu ásǐ dátu ka nji. 32 Kabɛ njeki ndea Phaláɔ dásikiigi mɔngɔ íbɛ, ande gea te Mokonga aye n'aangi tɔtɔkisa i kanga iphia.

33 Kabondɔ, moamɛ nɛmɔ, nkaba nkpa áubhapha na mɔ̌ngɛ, ómophɛ kɔkɔta á amba nkumba bhui á ka Mísii. 34 Cɔ, moamɛ ɛ́sɔmbɔɛ bamamei ka phuisa phaeka á ko bɔku á dungu á ka nji mbenɔ á basaga ngia á njaga íbɛ á dungu ásǐ. 35 Badhondanisɛgɛ ea bhui á basaga ngia á njaga íbɛ (7) nde aobhika. Kusi á kɔkɔta nɛkɔ, baphɛkisɛ ítɔ á bhisa mpimbo ea bhui ka kenombe danga-danga. 36 Kabondɔ unge Mísii abande na mpimbo ea ásǐ á amba nji ka basaga ngia á njaga íbɛ (7) á monganya.»

Yɔsɛ́phu amamei nji á Mísii

37 Nyɔngɔ ndea Yɔsɛ́phu dám'bɔngɛi Phaláɔ na babhɛdanigi nɛkɛ bɔbhu. 38 Phaláɔ áǒbuisia babhɛdanigi nɛkɛ: «Cɔ, bɛmɔɔnande nkpa n'atumi na měma á Mokonga bea mmbe? » 39 Mpɔ moamɛ áongodea Yɔsɛ́phu gea: « Ka nyɔngɔ nde Mokonga a ámbé akoubhisi nndɔ bhui, nna na nkpa nde abande phɔtɔ na ubhapha na kɔbɔngɛ bea obɛ. 40 Ande obɛ a ámbé obande mɔkɔta á mamea nji nɛmɔ, bakpa nɛmɔ bɔbhu bábande kusi á kɔkɔta nɛkɔ. Nebande gǎkɛ gǔ akɔ, nga nende moamɛ. 41 Ɔna phɔ, nekophi kɛ̌kɛ nde kɔkɔta gǔ á nji á Mísii bhui. »

42 Phaláɔ áophuia mbanga á kɔkɔta ka miki á njaga akɛ, áobhisa ka miki á njaga Yɔsɛ́phu. Báɔmolisa bhɔngɔ anja na mukuphu á ɔlɔ ka kingo. 43 Moamɛ áonkambisa gǔ á koko nɛkɛ ndea ko íbɛ na babondigi na báokogaga mosa akɛ: « Otiani! Yɔsɛ́phu ányɛnyɛ. » Bondɔ unge moamɛ Phaláɔ dámophi kɔkɔta ka njia á Mísii bhui.

44 Phaláɔ â goto ongodea Yɔsɛ́phu gea: « Eme, nende moamɛ, ka nkpa kámesiɛka miki á njaga akɛ n'ecinji ka nji á Mísii bhui n'o kóbeeki.» 45 Phaláɔ áonsua Yɔsɛ́phu ina á batɔa ka Mísii: Japhɛnáti-Panɛ́a. Áomopha Asɛnáti nseka ndea Pɔtiphɛ́la, ntobei-phɛa á kenombe Ɔ́ni, gea te ábɛ nkakɛ. Mpɔ, Yɔsɛ́phu áoga ɔtɔmba nji bhui á Mísii. 46 Yɔsɛ́phu dátu na basaga nkama isaɔ (30), mbenɔ nde dákpangi bhɛdaneaga Phaláɔ. Yɔsɛ́phu áondeketa moamɛ, áoga ɔɔnjia nji bhui á Mísii.

47 Ka basaga ngia á njaga íbɛ (7), ɛtɔi á ciko dáphui dungu ásǐ phɛ̂. 48 Yɔsɛ́phu dádhondanisigi ea bhui á ka nji á Mísii ka basaga ngia á njaga íbɛ (7) á dungu asíi. Áobhisa mpimbo subi á ítɔ ka kenombe danga-danga ea nde dátuotoka ka nji abhɔbhɔa bhíbhí á kenombe ndɔ. 49 Yɔsɛ́phu áobimbikisa mpimbo ea ásǐ phɛ̂ bea mbume á k'obenge. Ea kau dábakaɔtɔka tanga i ka nyɔngɔ nde dábiki phɛ̂.

50 Mosa á kpanga basaga á monganya, Asɛnáti nka Yɔsɛ́phu nseka ndea Pɔtiphɛ́la ntobei-phɛa á kenombe Ɔ́ni, áomonjea munyakɛ baniki-bǒko babɛ. 51 Yɔsɛ́phu áɔmɔphana miki nɛkɛ ange Manásɛ na áɔyɔnga gea: «Mokonga amopi baniki kagea neboseɛ tambaga nɛmɔ bhui na katanaga n'ekombo nɛmɔ. » 52 Áɔmɔphana anakɛ ímbe juɛbɛ Ɛphulaímu. Mpɔ, áɔyɔnga: «Mokonga amopi baniki ka nji á tambaga nɛmɔ.»

53 Basaga ngia á njaga íbɛ (7) á dungu ásǐ dási ka nji á Mísii. 54 Cɔ, basaga ngia á njaga íbɛ (7) á monganya áokpanga, bíndɔ Yɔsɛ́phu dáyɔngi. Nji nɛngbo bhui dátu na monganya, nji á Mísii bhui aunge dátu gǎkɛ na mpimbo á ea. 55 Mbenɔ nde batɔa ka Mísii bákpangi phɔtɔ ba na nja, báɔmɛma Phaláɔ ea. Mɔamɛ áǒsikisia batɔa ka Mísii bɔbhu gea: « Gani bɔ́mɔ̌nɛ Yɔsɛ́phu na tɔtɔkisani nyɔngɔ nde anóngodeande. » 56 Monganya dándandi ka nji bhui á Mísii. Mpɔ, Yɔsɛ́phu áuukua ítɔ á mpimbo ea, áǒsombisia batɔa ka Mísii. Monganya â goto obhika akpɛ phɛ̂ ka nji á Mísii. 57 Gǔ índɔ, bakpa á ka mokonda dábatu tɔ obhika na Mísii ka somba nganɔ mɔtɛa Yɔsɛ́phu, ka nyɔngɔ nde monganya dátu akpɛ phɛ̂.