40
1 Mbusa á nyɔngɔ ndɔ, bakɔta babɛ á babhɛdanigi á moamɛ á ka Mísii báogea bojede mosa á mɔkɔta ndeabɔ. Bakɔta ndɔ dábatu: mɔkɔta á babɔngisigi kema á noa na mɔkɔta á baombigi mokati. 2 Moamɛ Phaláɔ, áɔ̌bɛɛa bakɔta nɛkɛ babɛ ndɔ. 3 Áǒbhisa ka mekakɔ subi á endu ndea mɔkɔta á batɔa-emani babɔndigi, k'endu nde Yɔsɛ́phu dátu kau subi á mekakɔ. 4 Báoiphia subi á mekakɔ. Mɔkɔta á batɔa-emani babɔndigi, áombhisa Yɔsɛ́phu ka bhɛdanɛaga abɔ.Yɔsɛ́phu atɔmigi njeki á batɔa mekakɔ babɛ
5 Kǐpha moci, mɔkɔta á babɔngisigi kema á noa na mɔkɔta á baɔmbigi mokati ndea Phaláɔ moamɛ á ka Mísii, báoda nkpa na nkpa na njeki subi á endu á mɛkakɔ. Njeki kau áoba na kantiti danga-danga. 6 Kambimba, Yɔsɛ́phu dábhiki ɔ̌bɔnjia, áɔɔbɔna bɔbhu na babɛigi. 7 Cɔ, Yɔsɛ́phu áǒbuisia bakɔta babɛ ndɔ dátu nabɔ ka mekakɔ subi á endu ndea mɔkɔta nɛkɛ gea: « Ka nyɔngɔ sina k'esande bona keongi a bɛi-bɛi? » 8 Bɔbhu babɛ, báonsikisia Yɔsɛ́phu gea: « Bétoade na njeki, cɔ, beke gǎkɛ na nkpa nde aɔ́sɔtɔmiaga kantiti i. » Mpɔ Yɔsɛ́phu áǒgondea: «Mokonga a ámbé aɔtɔka tɔmiaga kantiti á njeki. Ɔmɔtɔmiagani phɔ kadengedenge. »
9 Mɔkɔta á babɔngisigi kema á noa, áɔntɔmia Yɔsɛ́phu be: « Ka njeki nɛmɔ dɛ́ɔni me á mujabibu mosa ani. 10 Mě á mujabibu ndɔ dátu na ntabhi isaɔ, áɔtɛisa maya. Maya ndɔ áɔgɔmbisa ntomba a mbuka á mujabibu n'amɔti. 11 Ka njaga ani détu na cǎ ndea Phaláɔ. Nɛɔbhɛda ntomba á mbuka á mujabibu nɛɔkpɔta ka juanisa ibo i subi á cǎ ndɔ. Mpɔ neomopha. »
12 Yɔsɛ́phu áongodea: « Kantiti á njeki ndeakɔ a be: Ntabhi isaɔ ande gea te esa isaɔ. 13 Ka b'esa basaɔ, Phaláɔ ataisande goto kɔkɔta ndeakɔ, akosikisande k'ekuma ndeakɔ. Obhisande cǎ ka njaga akɛ bíndɔ dótu ogea mosa. 14 Mbenɔ nde kema bhui atɔtɔkɛanande anja k'obɛ, kadengedenge ómokanisiande. Ógeande bonjanja ka phɔani ka yɔnga nyɔngɔ ani mosa á Phaláɔ na ómophuiɛ k'endu á mekakɔ nde. 15 Ka nyɔngɔ nde dábamɔbɔmbisi k'ɔkpɛ ka nji á baƐbhulanía na oani kegi tanda ka kema ka makea ani ka mekakɔ. »
16 Bii mɔkɔta á baɔmbigi mokati dáɔni gea Yɔsɛ́phu dátɔmigi kantiti á njeki anja, áongodea be: « Eme phɔtɔ, déade na njeki. Ka njeki kau, dékumbigi jɔ á mokati isaɔ ka mɔ̌. 17 Subi á jɔ nde a gǔ dátu na mokati etete danga-danga ndea Phaláɔ. Bambǔ dába gǎkɛ obhika oea subi á jɔ gǔ á mɔ̌ ani. » 18 Yɔsɛ́phu áongodea gea: « Ɔna kantiti á njeki nɛkɔ; jɔ isaɔ ande gea te esa isaɔ. 19 K'esa isaɔ, Phaláɔ ataisande mɔ̌ akɔ ka gea bákokpatɛgɛ gǔ á me na bambǔ babhikande ɔgɔtaga ngobho akɔ. »
20 K'esa á k'oisaɔ dátu esa á jaí á kanisia á bɔkɔtɛana á Phaláɔ. Áǒpha babhɛdanigi nɛkɛ ea ásǐ phɛ̂. Áǒtaisa mɔkɔta á babɔngisigi kema á noa na mɔkɔta á baɔmbigi mokati, áǒbhisa mosa á babhɛdanigi nɛkɛ bɔbhu. 21 Áonsikisa mɔkɔta á babɔngisigi kema á noa ka kɔkɔta nɛkɛ; yɛ â goto omopha Phaláɔ cǎ nɛkɛ. 22 Bâ gǎkɛ onkpataga moamɛ á baɔmbigi mokati. Bondɔ unge dátɔtɔkɛani kantiti á njeki nɛbɔ bíndɔ Yɔsɛ́phu dɛ̌tɔmigi. 23 Mɔkɔta á babɔngisigi kema á noa, dákankanisi ye Yɔsɛ́phu, áom'bosea.