Nkpangeɔ 39

Yɔsɛ́phu mɔtɛa Pɔtiphái, ntɔa ka Mísii

1 Cɔ, baIsumaíli, bunde dábandhidhisi Yɔsɛ́phu na Mísii, dábansombisi mɔtɛa ntɔa ka nji ndɔ moci ina akɛ Pɔtiphái. Mmbe dátu mbhɛdanigi angbóngbo, mɔkɔta á batɔa emani babondigi ndea Phaláɔ, moamɛ á ka Mísii. 2 *Mɔkɔta-Mokonga dátu kimoci na Yɔsɛ́phu. Ka nyɔngɔ índɔ unge dáɔtɔka kema bhui nde dáogea. Dáiki sub'endu ndea mokoo akɛ, ntɔa ka Mísii. 3 Mokoo akɛ dáɔni gea Mɔkɔta-Mokonga dátu kimoci na yɛ. Dáɔtɔka kema bhui nde dáɔbhɛdanaga ka bukpɛkpɛ ndea Mɔkɔta-Mokonga. 4 Pɔtiphái áonsebea Yɔsɛ́phu phɛ̂. Áombhisa k'ekuma nɛkɛ á sasakɛ. Áombhisa mamei na nambi-nkumba bhui á k'endu nɛkɛ. 5 Mbenɔ ndɔ dámbhisi mamei na nambi-nkumba bhui á k'endu nɛkɛ, Mɔkɔta-Mokonga áobhisa njaga akɛ gǔ á nkumba á k'endu ndea ntɔa ka Mísii, ka nyɔngɔ á Yɔsɛ́phu. Bhisia á njaga ndɔ áoba gǔ á nkumba á k'endu na subi á ciko bhui. 6 Kabondɔ unge, Pɔtiphái dámophi Yɔsɛ́phu kɔkɔta á nkumba nɛkɛ bhui. Dákatu ye ɔbhɛdanaga ka kema nǎna tɔ nyɔngɔ á ea nɛkɛ sasakɛ. Yɔsɛ́phu dátu ngɔji á miki á nganja.

7 Mbusa índɔ, nka Pɔtiphái áonkonda Yɔsɛ́phu, áongodea gea: « Omodaga ně cɛɛ! » 8 Yɔsɛ́phu áonsikisia: « Bɛɛndɔ, Mɔkɔta nɛmɔ amosebei. Amopi kɔkɔta á kema bhui. Nna ye ɔbhɛdanaga ka kema á k'endu nɛkɛ. 9 Subi éndu nde, nna ye na mɔkɔta bangbó kɔmɔnyɛnya eme. Kámoimisii ka kema, tɔndɔ obɛ. Nga, onde nkakɛ. Cɔ, negeande bojede angbo bende bo, na gea bojede mosa á Mokonga? » 10 Áongodeaga Yɔsɛ́phu esa bhui. Yɔsɛ́phu dáka gǎkɛ ɔɔka. Dákaokonda énanoa bhíbhí akɛ ka gea bakadhondanɛmbɛ na yɛ.

11 Esa moci, Yɔsɛ́phu dángi subi éndu ka bhɛdanaga. Batɔa k'endu bɔbhu, ka bɔ dákatu béi. 12 Oa, nka Pɔtiphái áondhunga ka bhɔngɔ nɛkɛ, áongodea gea: « Ómodaga phɔ ně cɛɛ! » Yɔsɛ́phu â gǎkɛ on'deketea bhɔngɔ ndɔ ka njaga akɛ, áotea na nsɛngɛ. 13 Bii nke ndɔ dáɔni gea Yɔsɛ́phu an'deketei bhɔngɔ nɛkɛ ka njaga akɛ, na áontea na nsɛngɛ, 14 áokoga ka ɔphana á babhɛdanigi buangbó á k'endu nɛkɛ na ngodea abɔ gea: « Ɔnáni phɔ! Asobhikii na muƐbhulanía, yɛ a gǎkɛ onjokoa na besu. Asɛkɛdi bhíbhí ani ka gea amodɛgɛ ně, nê gǎkɛ okoga akpɛ phɛ̂. 15 Mbenɔ nde aɔki na neokoga k'ɛsɔ akpɛ, áodeketa bhɔngɔ nɛkɛ ka mpɛphɛ ani, áotea na nsɛngɛ.»

16 Dábhisi bhɔngɔ ndea Yɔsɛ́phu ka mpɛphɛ akɛ na ka bii munyakɛ asikianagande k'endu. 17 Mpɔ â yetɔ ongodeaga nyɔngɔ ndɔ bíndɔ, gea: «MuƐbhulanía nkɔbɛ mmbe dósobhikii na yɛ, abhiki bhíbhí ani ka njokoa n'eme. 18 Bii dékogi, áodeketa bhɔngɔ nɛkɛ ka mpɛphɛ ani, áotea na nsɛngɛ. » 19 Mbusa á Pɔtiphái ɔka nyɔngɔ nde nkakɛ dángodigi gea: «Cɔ, ɔna nnde nkɔbɛ nɛkɔ amogi ně », Pɔtiphái áɔbɛa phɛ̂. 20 Mɔkɔta ndea Yɔsɛ́phu áondhungisa, báomakea ka mɛkakɔ, k'ɔma nde dábaobhisaga batɔa-mɛkakɔ ndea moamɛ Phaláɔ. Yɔsɛ́phu áoika oa ka mɛkakɔ.

Yɔsɛ́phu ka mekakɔ

21 *Mɔkɔta-Mokonga dátu gǎkɛ kimoci na Yɔsɛ́phu, áongama. Aomopha bonjánja ékondi mosa á mɔkɔta á mɛkakɔ. 22 Mɔkɔta á mɛkakɔ áomopha Yɔsɛ́phu kɔkɔta á batɔa-mɛkakɔ bɔbhu bunde dába subi i. Yɛ a ámbé dáoanga kema bhui ka batɔa-mekakɔ. 23 Mɔkɔta á batɔa-mɛkakɔ dáka ye kɔɔnjia ka kema nnde Yɔsɛ́phu dáɔɔnjia, nga Mɔkɔta-Mokonga dá kimoci na yɛ. Dáɔtɔka bhɛdanaga á kema bhui ka bukpɛkpɛ á Mɔkɔta-Mokonga.