Yúdha na Tamáli
38
1 Ka matu ndɔ, Yúdha dákatani na bamunamakɛ, áoga oika na ntɔa ka Adhulámi moci inakɛ Íla 2 Ko, dámɔɔni nseka ndea Súa ntɔa ka Kanána, áom'boa k'eyamani. 3 Nseka ndɔ áokumba éme, áɔm'bɔkɔta miki-mǒko, Yúdha áonsua ina Ɛ́li. 4 Â goto okumba éme, áɔm'bɔkɔta miki-mǒko, áonsua ina Ɔnáni 5 Â goto om'bɔkɔta miki-mǒko, áonsua ina Cɛ́la. Cɛ́la dábɔkɔtɛani, Yúdha n'a ka nji Kijíbhu.6 Yúdha áom'bɔɛa Ɛ́li miki-mǒko nɛkɛ ange nke ina akɛ Tamáli. 7 Cɔ, tambea ndea Ɛ́li ndɔ, dákambɔngɛi *Mɔkɔta-Mokonga, kabɔndɔ Mɔkɔta-Mokonga áonkusa.
8 Yúdha áongodea Ɔnáni: « Cɔ, uubha asíi nɛsu. Ngiia ɛbɔndɛ á nka-phomi akɔ, ɔ́bɔkɔtɛ na yɛ baniki ka ina á phomiakɔ. » 9 Ɔnáni dáubhi gǎkɛ gea ɛbɔkɔti ndɔ kábɛku nɛkɛ. Kabondɔ, mbenɔ nde dáodhondanaga n'ɛbɔndɛ á nka-phomi akɛ, dáodukaga ibo ɛbɔkɔti ka odo ka gea te kamophɛmbɛ phomi akɛ baniki. 10 Tambea ndɔ dákam'bɔngɛi Mɔkɔta-Mokonga, â phɔtɔ onkusa Ɔnáni. 11 Mpɔ Yúdha áongodea Tamáli nka anakɛ gea: «Bii onde nke á kekusa, ika tɔ mɔtɛa abhakɔ kanga ɔmana na kabii miki-mǒko nɛmɔ Sɛ́la amɔtande. » Nga, dáɔnyɔnga sasakɛ gea: « Kakɛni mmbe akuɛ phɔtɔ bea bamuna-makɛ. » Tamáli áoja, áoika mɔtɛa abhakɛ.
12 Mbusa á matu énda, nseka ndea Súa, nka Yúdha dáku. Bii Yúdha dágɔbi k'ɛkusa á nkakɛ, áotaia ka Timúna kimoci na dhakɛ Íla ntɔa ka Adhulámi mɔtɛa batɔa kangadua á saa á bamɔgɔgɔ nɛkɛ. 13 Báɔntɔmia Tamáli gea: «Nyamɔtɔ akɔ ímbɔ mǒko a tai na Timúna ka kangadua saa á bamɔgɔgɔ nɛkɛ.» 14 Cɔ, dáɔni gea Sɛ́la dámɔti ye na nyamɔtɔ akɛ ímbe mǒko dákamomanisimbɛ nayɛ. Mpɔ, áǒphuia bhɔngɔ á k'ekusa nɛkɛ, áokombia keongi akɛ na phaɛka bhɔngɔ ka gea bákamuubhɛmbɛ. Áoga oika ka ngba á nji Ɛnaímu nnde dátu kaphe aga na Timúna
15 Bii Yúdha dámɔ̌ni Tamáli, áuubha te ande nke á mambɔ. Nga, dákombei keongi akɛ na bhɔngɔ. 16 Áonketea, áontunga k'aphe, áongondea gea: «Neodengemisigi bégɛ bédɛgɛ n'obɛ. » Dákaubhi gǎkɛ gea ande ɛbɔndɛ á nka anakɛ. Tamáli áongodɛa: «Bii beoga odaga n'obɛ omopande eke? » 17 Áonsikisia: «Nekophande ka baniki á mɛmɛ á k'etugɛ nɛmɔ. » Tamáli áongodea: « Cɔ, ómopa moema, na kabii ontekaeka miki á mɛmɛ. » 18 Yúdha áonsikisia: « Okondi nékophɛ moema sina? » Tamáli áongodea: « Mbanga, ngoi, na motumbɔ nde oně ka njaga. » Áomopha bhui, mpɔ báodaga na yɛ áonkumbisa éme. 19 Tamáli áosikianaga mɔtɛbɔ, áǒphuia bhɔngɔ nde dékombei ně, â goto ɔɔla bhɔngɔ nɛkɛá k'ekusa.
20 Yúdha dánteki dhakɛ ntɔa ka Adhulámi gea te ámophɛ nke ndɔ miki á mɛmɛ na bhɛda goto moema. Dhakɛ dákandondi ye gǎkɛ. 21 Íla áǒusia batɔa ka Ɛnaímu gea te: «Nke á mambɔ mmbe dáiki bhíbhí á aphe oani a koni? » Báonsikisia: «Béketanda na ka bake á mambɔ oani. » 22 Áosikianaga mɔtɛa Yúdha, áongondea gea: « Kéndhondi. Batɔa oa bámongodi gea: ‹ Ka bakɛ á mambɔ nna tanda oa. › » 23 Yúdha áongodea: « Áambɛ nkumba ndɔ ané, kasokusɛmbɛ na soni. Déntekisii miki á mɛmɛ. Cɔ, obɛ sasakɔ dókondhondi.»
24 Mbusa á basonge basaɔ, báobhika ɔntɔmia Yúdha gea: «Nka anakɔ Tamáli atungani, aye na éme. » Mpɔ Yúdha áoyɔnga gea: «Njuanisani na nsɛngɛ, bóntoboɛ. » 25 Bii dábaonjuanisa Tamáli na nsɛngɛ, áoteka mbino ka tɔmia nyamɔtɔ akɛ ímbɔ mǒko gea: «Mɛna nkumba nde a ámbé amokumbisi éme. Neodengemisigi, engekisa phɔ mbanga, ngoi na motumbɔ ámbe ande á nkpa sina.» 26 Yúdha aengekisi ye nkumba ndɔ bhui, áɔyɔnga gea: « Ayɔngi tɔ doni kɔmɔnyɛnya. Dákɛni opha akɛ miki-mǒko nɛmɔ Sɛ́la á m'boɛ k'eyamani, dékemophi. » Yúdha dákade ye nayɛ.
27 Mbenɔ nde dákaboae, áuubhikana gea ana baphase ka sɔphɔ. 28 Mbenɔ á onja, ka baphasɛ ndɔ moci áojuanisa njaga akɛ. Ngumba áɔbɔɛa u na muɛngɛ anjɛ áɔyɔnga gea: « Mmbe ambe aonjokani mosa. » 29 Mpɔ áosikisa njaga akɛ, munamakɛ áɔbɔkɔtɛana. Ngumba áɔyɔnga gea: « Aphe sina nde ouku bende? » Aonsua ina á Pɛlɛsia. 30 Mbusa, munamakɛ áɔbɔkɔtɛana n'ana muɛngɛ anjɛ ndɔ ka njaga, báonsua Jɛlab.