Njeki ndea Yɔsɛ́phu
37
1 Yakɔ́bɔ dáiki na Kanána, ka nji nde abhakɛ dáiki kau bea mɔkɛni. 2 Cɔ, ɔkani mbinɔ ɛ́bɔkɔti ndea Yakɔ́bɔ. Yɔsɛ́phu dámɔtɛani na bana-nkabhakɛ bunde Bhilía na Jíipa daběbɔkɔti. Bii dátu moganda á basaga nkama na ngia á njaga íbɛ (17), dáoambaga bamɔgɔgɔ na bamɛmɛ kimoci na bɔ. Dáɔntɔmiaga abhabɔ nyɔngɔ ajede-jede nde dábaɔyonga gǔ abɔ. 3 Yakɔ́bɔ mmbe báɔmɔphana Isilaɛ́li, dánkondi Yɔsɛ́phu kɔnyɛnya baniki-bǒko nɛkɛ bɔbhu. Nga, dám'bɔkɔti ka kophomi akɛ. Dámophi bhɔngɔ énda n'agɛɛmanigi. 4 Bamunamakɛ dábaɔni gea abhabɔ dánkondi kɔ̌nyɛnya bɔbhu, báonkangea. Bakabɛ ye ɔyɔnga nayɛ ka bonjánja5 Yɔsɛ́phu dáde na njeki. Bii ɛ̌tɔmigi bamunamakɛ, bâ ye tɔ onkangea phɛ̂. 6 Aǒngodea: «Nenódengemisigi, ɔkani njeki nde nede ně. 7 Débeoboaga kempǔtu a nganɔ subi á ciko. Mɔngɔ ímoci, kempǔtu ínɛmɔ áǒsakoa, áǒcuma dhɛ! Kempǔtu ínɛnu bhui áotimba nɛmɔ, aǒgbuka mosa i.» 8 Bamunamakɛ báongodea: « Ande gea te, obande moamɛ, ôba na kɔkɔta gǔ asu? » Bâ goto onkangea phɛ̂ ka nyɔngɔ á njeki na yɔnga nɛkɛ.
9 Yɔsɛ́phu â goto oda na njeki nɛngbo, áɔ̌tɔmiaga bamunamakɛ, áɔyɔnga gea: « Ɔkani, nede goto na njeki! Mani, songe na basɛɛngɔa nkama na moci (11) na bágbuki moanku abɔ mosa ani.» 10 Aɔntɔmiaga abhakɛ sumbii ɛ̌tɔmigi bamunamakɛ. Abhakɛ áomphekeaga goto, áongodea: «Njeki sina ndɔ! Ande gea, eme, amakɔ na bamunamakɔ, bebhikande ogbuka moanku asu mosa akɔ? » 11 Bamunamakɛ báoba na nsengɔ ka yɛ. Cɔ, abhakɛ â gǎkɛ oianaga njeki ndɔ.
Bamunamakɛ na Yɔsɛ́phu dábansombisi
12 Cɔ, bamunamakɛ na Yɔsɛ́phu dábage ǒisa bamɔgɔgɔ na bamɛmɛ ndea abhabɔ ka kenombe á Sɛkɛ́mu. 13 Yakɔ́bɔ áongodea Yɔsɛ́phu: « Bamunamakɔ baǒisa banyama na Sɛkɛ́mu. Cɔ, bhika, neokoteka mɔtɛabɔ. » Yɔsɛ́phu áobeekea: « Eya! » 14 Yakɔ́bɔ â goto ongodea: « Ga ɔ́bɔnɛ ka bamunamakɔ na banyama kabɛ na batɔ na bɔjɛjɛ, obhikande ɔmɔtɔmia mbino. » Áonteka Yɔsɛ́phu ka toka k'eembe á Ɛbhulɔ́ni áoga na Sɛkɛ́mu.
15 Nkpa moci áondhonda n'aómameaga ka nkanda áomúsia: « Oma okaba eke? » 16 Yɔsɛ́phu áonsikisia: «Neókaba bamunayi. Neodengemisigi, ómongodea ɔma nde báoisa etuge nɛbɔ.» 17 Nkpa ndɔ áongodea: « Eya, bátoki ye oa. Nga, dɛ́bɔki na báɔyɔnga gea, bégɛni na Dhɔtáni. » Yɔsɛ́phu áotutuisa tamba áǒdhonda bamunamakɛ ka Dhotáni. 18 Bamunamakɛ báɔmɔ̌na danga. Mosa á bhiimisia abɔ, báoanga moangɔ á kusa akɛ. 19 Báɔyɔngaga sɔsɔbɛ abɔ: «Cɔ, abha-njeki-njeki abhiki. 20 Cɔ, bhikani yetɔ bémoɛni, bémakɛ mǒnda akɛ k'ecia, du! Bɛyɔngande gea nyama akae moci a ámbé angoe. Mpɔ, bɛɔnande phɔ njeki nɛkɛ abande bo.»
21 Bii Lubhɛ́ni aɔki ye bo, áokaba amisa á Yɔsɛ́phu ka njaga abɔ. Áɔyɔnga gea: « Békemoɛmbɛ.» 22 Âgoto ɔyɔnga gea: « Békedukɛni magia. Bémakeɛni ndiu k'ecia nde a ka nkanda. Békemoɛmbɛ.» Déngodi bo ka gea te ánamisɛ Yɔsɛ́phu ka njaga abɔ, ánjisɛ mɔtɛa abhakɛ.
23 Mbenɔ nde Yɔsɛ́phu ajue bhíbhí á bamunamakɛ, báomphuia bhɔngɔ enda agɛɛ-gɛɛ nɛkɛ nndɔ dáɔli. 24 Mpɔ báondhunga, báomakea k'ecia du! Ecia ndɔ dáka na kema. Ibo dákatu subi i.
25 Báoika ka eaga. Báɔɔna mɔɔmba ékombo ndea baIsumaíli na bátoki na Gilɛ́adhi na báoga na Mísii. Bangamia nɛbɔ na bákumbi kema á su ánjanja bea: obáni, jíli na manɛmánɛa.
26 Cɔ, Yúdha áǒngodea bamunamakɛ: « Bɛtɔande kema sina ka moa munamasu na sɔmɛa á nyɔngɔ á kukua akɛ? 27 Ambe bénsombisɛ na ekombo nde á baIsumaíli kanga moa akɛ. Nga, ande munamasu, ande magia asu.» Bamunamakɛ báobeekea. 28 Bii basombisigi-nkumba bunde batɔa ka Midhiáni bakidi ɔma ndɔ, bamunamakɛ na Yɔsɛ́phu báomphuia k'ecia, báonsombisa na baIsumaíli ka esombi á gbutuka bangɔa nkama íbɛ (20). Mpɔ bɔ, báonga na yɛ na Mísii.
29 Cɔ, bii Lubhɛ́ni aji goto k'ecia, Yɔsɛ́phu dákatu ye subi i. Áobhoma bhɔngɔ nɛkɛ na bɛi. 30 Áoga goto kubii bamunamakɛ báɔ, áɔyɔnga gea: « Yɔsɛ́phu nna ye ko! Cɔ, kɛ̌kɛ nde, negɛ oa? »
31 Mpɔ, báontena mǔku á mɛmɛ, báɔbhɛda bhɔngɔ enda ndea Yɔsɛ́phu báoubhia ka magia á mǔku á mɛmɛ. 32 Mbusa, báoteka bhɔngɔ ndɔ mɔtɛa abhabɔ, ka gea bangodeɛ be: «Cɔ, ɔna phɔ bhɔngɔ nde bedhondi. Beodengemisigi, ɔnjia u ka engekisa ámbe ande á miki-mǒko nɛkɔ.» 33 Yakɔ́bɔ áɔɔnjia, áɔyɔnga gea: « Eya, ande bhɔngɔ ndea miki-mǒko nɛmɔ! Nyama akae angoe, áoncoaga Yɔsɛ́phu! » 34 Mpɔ Yakɔ́bɔ áobhoma bhɔngɔ nɛkɛ, áɔ̌bɔɛa bhɔngɔ á k'ekusa. Áongamea miki-mǒko nɛkɛ k'esa ásǐ. 35 Baniki nɛkɛ bɔbhu, bǒko na bake dábaom'bhikia k'oiɔ, dâ gǎkɛ oya oiɔ bhubhui. Áɔyɔnga gea: « Ómodeketani! Negaeka tɔ okua, na neongamea miki-mǒko nɛmɔ! » Bondɔ unge abhakɛ dángamigi.
36 Cɔ, ekombo ndea baMidhiáni dábansombisi Yɔsɛ́phu na Mísii mɔtɛa Pɔtiphái, mbhɛdanigi angbóngbo ndea Phaláɔ, moamɛ á ka Mísii, mɔkɔta á batɔa émani nɛkɛ.